NÚMEROS 15 - Quichua Chimborazo Bible

Ofrendacunata ima shinalla cunata mandashcami

1Mandaj Dios Moisesta mandashpaca cashnami nirca:

2“Israelcunataca cashna nishpa mandai: Cancuna causachun ñuca cusha nishca llajtaman ña yaicushca q'uipaca,

3Mandaj Diosman cushpa rupachina ofrendata cunguichij. Chaicunataca vacacunata cashpa, ovejacunata cashpa Diosman cushpa tucui rupachina cajpi, Diosman cushpa huañuchina cajpipish, cushami nishcata pajtachishpa cucushpapish, mana cashpaca cuna munaita charishcamanta cucushpapish, mana cashpaca cancunapaj jatun fiestapi Mandaj Diosman cuna cashcata cucushpapish, Mandaj Diospaj mishquiman ashnacuj cachun cunguichij.

4Chaicunata Mandaj Diosman cucujca, shuj efa ashtahuan alli cutata chungapi chaupishca shuj parteta, shuj hinta chuscupi chaupishca shuj parte aceitehuan chapushcahuan cuchun.

5Diosman animalta cushpa ña rupachishca cashpapish, tucuita cushpa rupachishca cashpapish cada malta c'ari ovejahuan tallinapaj vinotaca shuj hinta chuscupi chaupishca shuj parteta apamuchun.

6Carnerohuan cungapajca, chungapi chaupishca ishqui parte ashtahuan alli cutata, shuj hinta quimsapi chaupishca shuj parte aceitehuan chapushcahuan cuchun.

7Tallina vinotaca shuj hinta quimsapi chaupishca shuj parteta cuchun. Chashna cujpimi Mandaj Diospajca mishquiman ashnacuj canga.

8Shuj huagrata cushpaca, Diosman cushpa tucui rupachinapaj cashpa, mana cashpaca Diosman cushpa rupachinapaj cashpa, cuna tucushcata pajtachingapaj cashpa, sumaj causaimanta Mandaj Diosman cunapaj cashpapish,

9chai huagrahuanca chungapi chaupishca quimsa parte ashtahuan alli cutata, shuj hinta ishquipi chaupishca shuj parte aceitehuan chapushcahuan cuchun.

10Tallina vinotaca shuj hinta ishquipi chaupishca shuj parteta cuchun. Chaimi cushpa rupachishcacunaca Mandaj Diospajca mishquiman ashnacuj canga.

11Cada huagrahuan ima shina cunata, cada carnerohuan ima shina cunata, cada malta c'ari ovejahuan ima shina cunata, cada chivohuan ima shina cunataca,

12mashna animal cajpipish cada animalhuan ima shina cuna cashca shinallataj cuchun.

13Mandaj Diospaj mishquiman ashnacuj cachun rupachishpa cucushpaca, tucui israelcuna chashna rurashpa cuchun.

14Maijan mana israelcuna shamushpalla cancunapurapi causacushpapish, mana cashpaca causaitataj cancunahuan causacuj cashpapish, mishquiman ashnacuj cachun Mandaj Diosman rupachishpa cunapaj cusha nishpaca, cancuna ima shina cuj cashca shinallataj cuchun.

15Israelcuna cashpapish, cancunahuan causacuj mana israelcuna cashpapish ima shinalla rurashpa pajtachinataca chai shina mandashcallatajmi charinguichij. Chaitaca cancunapaj huahua huahuacunapish, cancunahuan causacuj mana israelcunapaj huahua huahuacunapish chai shinallataj ruracuchunlla. Chashna rurashpami mana israelcunaca, cancuna shinallataj Mandaj Diospaj ñaupajpica cangacuna.

16Israelcuna cashpapish, cancunahuan causacuj mana israelcuna cashpapish chai shinallataj mandashcata, chai shinallataj rurashpa pajtachinatami charinguichij” nircami.

17Mandaj Dios Moisesta mandashpaca cashnami nirca:

18“Israelcunataca cashna nishpa mandai: Cancunata ñuca pushacun llajtaman ña chayashpaca,

19chai llajtapi p'ucushca granocunata micui callaringapajca, puntaca Mandaj Diosmanraj cunguichij.

20Trigota trillashpa ñucamanraj cuj shinallataj, punta trigo cutata masashpaca, chai masamanta punta rurashca tortataca ñucamanraj cunguichij.

21Tandata rurangapaj masashpaca, Mandaj Diosmanraj cunguichij. Chaitaca cancunapaj huahua huahuacunapish chai shinallataj ruracuchunlla.

22Mandaj Dios Moisesman huillachishca cai mandashcacunamanta maijanta cashpapish mana alli yuyarishpa, mana tucuita pajtachingachari.

23Tucui cai mandashcacunataca Mandaj Diosca Moisesman pai huillachi punllamanta tucui cancunapaj huahua huahuacuna pajtachicuchunlla mandashcami.

24Tucui israelcuna cai mandashcacunata mana tucuita yuyarishcamanta mana tucuita pajtachishpa juchallishpaca, tucuicunamanta shuj huagrata apamushpa Mandaj Diosman cuchun. Chaitaca Mandaj Diospaj mishquiman ashnacuj cachunca, paiman cushpa tucui rupachichun. Chaihuan cunapajca mandashcapi ima shina cuna nishca shinallataj Diosman cuna granocunatapish, tallina vinotapish cuchun. Paicunapaj juchamanta cuchunca shuj chivota cuchun.

25Paicuna chaita cujpimi, curaca tucui israelcunapaj juchamanta Diosman cunga. Chaipimi mana alli yuyarishcamanta mana tucui pajtachishcataca perdonashca canga. Mana alli yuyarishcamanta mana tucuita pajtachishca cashpaca, tucuicunami Diosman cuna cashcatapish, Mandaj Diosman cushpa rupachina cashcatapish, juchamanta cushpa rupachinatapish Mandaj Diospaj ñaupajpi cungacuna.

26Chashna rurajpimi tucui israelcunatapish, paicunahuan causaj mana israelcunatapish mana alli yuyarishcamanta mana tucuita pajtachishcataca tucuicunata perdonashca canga.

27Mana alli yuyarishcamanta maijan cashpapish shujlla mana tucuita pajtachishpa juchallijca, paipaj juchamantaca shuj huatayuj chivota Diosman cuchun.

28Mana alli yuyarishpa mana tucuita pajtachishpa Mandaj Diospaj ñaupajpi juchallishcamanta cushcataca, curami chai runamanta Mandaj Diosman cushpa Dioshuan alli tucunacuchinga. Chashna rurajpimi, perdonashca canga.

29Israelcuna cashpapish, cancunahuan causacuj mana israelcuna cashpapish mana alli yuyarishpa mana tucuita pajtachishpa juchallishcamantaca chai shina mandashcallatatajmi charinguichij.

30Israelcuna cashpapish, mana israelcuna cashpapish jatun tucushpa mana cazuj cashcamanta, Mandaj Dios mandashcata yuyaipi cashca jahuallataj juchallingachari. Chashna rurajtaca israelcunapaj chaupimanta anchuchishca cachun.

31Mandaj Dios rimashcata mana cazushpa pai mandashcata yangapi churaj runataca tucuitaj chingachishca cachun. Paipaj juchaca paipaj jahuapimi canga” nircami.

Samana punllapi mana huaquichirij runata huañuchishcami

32Shitashca pambapi israelcuna cashpaca, paicunapuramanta shuj runa samana punllapi yantata pallacujtami japircacuna.

33Yantata pallacujta japishpaca, Moisespaj, Aaronpaj, tucui israelcunapaj ñaupajmanmi pusharca.

34Chai runataca imata ruranata manaraj huillajpimi, paitaca carcelpi churarcacuna.

35Chaipimi Mandaj Diosca, Moisestaca: “Chai runaca huañunatajmi can. Chaimanta carpa huasicunamanta caruman llujshichishpa tucui israelcuna rumicunahuan shitashpa huañuchichij” nirca.

36Chaimi israelcunaca Mandaj Dios Moisesta mandashca shinallataj carpa huasicunamanta caruman llujshichishpa, huañungacama rumicunahuan shitarcacuna.

Churana filocunapi flecoscunata churachun mandashcami

37Mandaj Dios Moisesta mandashpaca cashnami nirca:

38“Israelcunataca cashna nishpa mandai: Churana filocunataca flecosyujta rurachun. Chai flecoscunapica, cada flecospi azul puchcamanta rurashca bolacunata churachun. Chaitaca cancunapaj huahua huahuacunapish chashna ruracuchunlla.

39Chai flecoscunata ricushpami, Mandaj Dios tucui mandashcacunata yuyaringuichij. Chaipica tucui imalla mandashcacunata chaitataj rurashpami pajtachinguichij. Cancunapaj shungu munashcata ruranacunapi, ñahui ricushcata ruranacunapica ña mana huainayanguichijchu.

40Chashnami tucui ñuca mandashcacunataca yuyarishpa chaitataj pajtachinguichij. Cancunapaj Diospaj ñaupajpica ima jucha illajllami canguichij.

41Ñucaca cancunapaj Dios cangapaj Egiptomanta cancunata llujshichij, cancunata Mandaj Diosmi cani. Mandaj Dios ñucaca cancunapaj Diosmi cani ninmi” nircami.