ROMANOS 6 - Quichua Chimborazo Bible

Juchata ama rurangapajca huañushcami nishcami

1Shina cajpica ¿imatataj nishun? Mana c'uyaipajta c'uyana yallitaj mirarichunca ¿ashtahuanchu juchallishpa catishun?

2¡Amataj chashnaca yuyashunchij! Juchata ama rurangapajca huañushcacunami canchij. ¿Maitataj juchallapitajca causashunri?

3Cristo Jesuspi bautizashcacunaca, tucuicunami paipaj huañuipi bautizashcacuna canchij. Chaitaca ¿manachu yachanguichij?

4Bautizarishcamantami paipaj huañuipi paihuan pambashca canchij. Ima shinami Yayapaj sumaj poderhuan Cristoca huañushcacunapaj chaupimanta causarirca, chashnallataj ñucanchijpish mushuj causaipi causashunchij.

5Pai huañushca shina paihuan shujlla tucushca cashpaca, pai causarishca shinallatajmi causarishun.

6Ñucanchij mauca causaitaca, Cristohuan chacatashca cashcatami yachanchij. Juchapajta ama ashtahuan rurangapaj, juchasapa cuerpota chingachingapajmi chashna chacatarcanchij.

7Cristohuan huañujca, juchamantaca cacharichishcami.

8Cristohuan huañushca cashpaca, paihuan causanatapish crinchijmi.

9Huañushcacunapaj chaupimanta causarishca Cristoca, ña mana huañuna cashcataca yachanchijmi. Huañuica paitaca mana ashtahuan mandai tucunchu.

10Cristo huañushpaca tucuicunapaj juchamantami, shuj cutinlla huañurca. Ashtahuanpish causacushpaca, Diospajmi causacun.

11Shinallataj cancunapish juchata ama rurangapajca, huañushca cashcata yuyaichij. Ashtahuanpish ñucanchij Mandaj Cristo Jesuspi Taita Diospaj causacushcata yuyaichij.

12Cancunapaj huañujlla cuerpota, jucha mandachunca ama saquichijchu. Chaimanta aicha munaicunataca ama cazuichijchu.

13Shinallataj cancunapaj cuerpopi caj miembrocunataca, millaita rurachichun juchamanca ama cuichijchu. Ashtahuanpish huañushcacunapaj chaupimanta causarishcataj cashcamantaca, cancunaca Diosman curichij. Cambaj cuerpopaj mienbrocunatapish, cashcata rurachichun Diosman cuichij.

14Chaipica, juchaca cancunataca mana ashtahuan mandai tucungachu. Ña mana Mandashca ucupi canguichijchu, ashtahuanpish mana c'uyaipajta c'uyajpaj ucupimi canguichij.

Cashcata rurashpa servijcunami

15¿Imatataj nishun? ¿Ña mana Mandashca ucupichu canchij, ashtahuanpish mana c'uyaipajta c'uyajpaj ucupimi canchij nishpaca juchallicushunllachu? ¡Amataj chashnaca yuyashunchij!

16Maijanpaj esclavo tucushpaca, cazungapaj esclavo tucushcataca ¿manachu yachanguichij? Chashnallataj juchapaj esclavo cajpipish huañuimanmi chayachin, ashtahuanpish Diosta cazushcamantaca cashcata rurashpa causajtami ruran.

17Ashtahuanpish ñaupaca juchapaj esclavocuna cashca cashpapish, Diosmanta ima shina canata cancunaman yachachishcatami shungumanta cazushcanguichij. Chaimantami Diostaca pagui nini.

18Juchamanta cacharichishca cashpami, cashcata rurajcuna tucushcanguichij.

19Cancuna mana jahualla yachai tucujpimi, cancuna yachanallata rimagrini: Ñaupaca cancunapaj cuerpopi caj miembrocunataca mapallata, millaillata servingapajmi millaiman curcanguichij. Chai shinallataj cunanca, cancunapaj cuerpopi caj miembrocunataca, jucha illajlla tucungapaj cashcata rurajta servingapaj curichij.

20Juchapaj esclavocunaraj cashpaca, cashcata ruranahuanca imata mana charircanguichijchu.

21Cancuna cunan pingaricuncunata rurashcamantaca ¿ima allitataj charircanguichij? Chaicunaca huañuimanmi chayachin.

22Ashtahuanpish cunanca juchamanta cacharichishca, Diospajta rurajcunami canguichij. Chaimanta japinataca, jucha illaj canata, tucuripica huiñai causaitami charinguichij.

23Juchaca huañuitami cun. Ashtahuanpish Taita Dios c'uyashpalla cushcaca, ñucanchij Mandaj Cristo Jesuspi huiñai causaimi.