2 CORINTIOS 11 - Quichua Chimborazo Bible

Apóstol Pablomantapish manapish apóstol cajcunamantapish

1¡Loco shina ñuca rimarishcata uyai tucunguichijpishchari! Ima shinapish uyapaichigari.

2Cancuna shujtajpaj ama tucuchun ninaca, Diosmantami shamun. Cancunataca shujlla cusahuan cazarachingapajmi ari nishcata charini, paica Cristomi. C'arihuan manaraj chayarinacushca chuyatami, paipajman chayachina cani.

3Chashna cajpipish culebra achca yachaj cashpa Evata umashca shinallataj, cancunatapish tucui shunguhuan mana nij tucushpalla Cristota c'uyacushca yuyaicunata ima shinapish umashpa cungachinatami manchacuni.

4Ñucanchij huillashca q'uipa, maijanpish Jesusmanta shujtaj shina huillaj shamujtaca sumajta uyanguichijllami. Espirituta chasquishca jahuamari, shujtaj espirituta chasquinguichij. Alli huillaita uyashca jahuamari, shujtaj shina huillashcatapish sumajta uyanguichij.

5Apostolcunami canchij nij jatun tucushcacunamantaca ñucaca imapi paicunamanta yalli uchilla cashcataca mana yuyanichu.

6Ñucaca maipish cachun rimashpapish, yachaipica mana chashna canichu. Chaitaca ima shinapish tucuipi rurashcahuanmi, cancunamanca ricuchircanchij.

7Ñucaca mana jatun tucushpa Diospaj alli huillaita, imata mana mañashpa huillashpaca cancunata jatunyachingapajmi chashna huillarcani. ¿Chashna rurashpachu juchallircani?

8Cancunapajta rurangapajca tandanacushca shujtaj crijcunapajtami, paicuna cullquita cujpica, shuhuaj shina tucurcani.

9Cancunapajpi cashpaca ñuca causanapajca pita mana mañarcanichu. Macedoniamanta shamuj huauquicunami, ñuca causanapajca curca. Paicuna cujpimi, cancunataca imata mana p'iñachircani, chashnalla catinatami munani.

10Cristopaj mana llulla shimica ñucapimi. Chaimanta ñuca sumajyarinataca Acaya llajtacunapi pi mana jarcangachu.

11¿Ima nishpataj chashna rimani? ¿Cancunatachu mana c'uyani? Diospish chaitaca yachanmi.

12Ñucanchij shina huillashpa cushicushun nijcuna ama cushicuchunmi, ñuca ima shina ruracushcataca chashnallataj ruracushalla.

13Chaicunaca nij tucushcalla apostolcunami, umashpa purijcunallami, Cristopaj apostolcuna shina tucujcunallami.

14Chaicunataca, imata mana manchachinchu. Satanasllatajpish, achij nicuj ángel shina tucunllami.

15Chashna cajpica, Satanaspajta rurajcunapish cashcata rurajcuna shina tucujpica, ima mushuj mana canchu. Chaicunaca, paicuna ima shina rurashca shinallatajmi tucuringacuna.

Pabloca apostoltaj cashcamanta llaquita apashcami

16Ñucataca pi ama locomi yuyachunmi cutinllataj cashna nigrini: Chashna yuyacushpapish, ñuca ashata jatun tucungapaj loco shina rimashcata uyapaichij.

17Chashna rimashpaca, mana Mandaj Jesús munashca shina rimanichu, ashtahuanpish jatun tucusha nishpatajmi loco shina rimarini.

18Achcacuna aicha yuyashca shina jatun tucucujpica, ñucapish chashnallatajmi jatun tucusha.

19Cancunaca yachajcuna cashpami, rumi shungucunataraj uyanguichijlla.

20Cancunata maijan huatashcata shina charijpipish, maijan millpusha nicujpipish, maijan cancunapajta quichujpipish, maijan jatun tucushca cajpipish, maijan ch'ajyachijpipish chaicunatarajmi ahuantanguichijlla.

21Caitaca pinganacujpipishmi nisha nini. Ñucanchijca paicuna rurashca shina ruranapajca irqui shinami carcanchij.

Shina cashpapish shujtajcuna imapipish jatun tucujpimi, (ñucapish loco shina rimarini).

22¿Paicunaca hebreocunachu? Ñucapish chaillatajmi cani. ¿Israelcunachu? Ñucapish chaillatajmi cani. ¿Abrahampaj huahua huahuacunachu? Ñucapish chaillatajmi cani.

23¿Paicunaca Cristopajta rurajcunachu? (Loco shina rimarij cashpapish ñucamari paicunamanta yalli trabajani). Mana yupaipajta azotishcami carcani, carcelpi churashcami carcani, tauca cutinmi huañunallapi carcani.

24Judiocuna pichca cutin, quimsa chunga iscunta azotishcami carcani.

25Quimsa cutinca caspihuan macashcami carcani, shuj cutinca rumicunahuan shitashcami carcani. Ñuca ricun barco quimsa cutin yacupi huashicujpimi cazi ahogarircani, shuj cutinca shuj punlla shuj tutatami, mama cucha yacupi carcani.

26Tauca cutinmi ñancunapi, jatun yacucunapi, shuhuacuna manchai, ñuca llajtapi causajcuna manchai, mana judiocuna manchai, pueblocunapipish, shitashca pambacunapipish huañuchina manchai, mama cucha yacupi huañuna manchai, crij canchij nij tucujllacuna manchaipishmi carcani.

27Shaicuitami trabajarcani, tauca cutinmi mana dormishca carcani. Yaricaihuan, yacunaihuanmi carcani, tauca cutinmi ayunarcani, churana illajlla achca chirihuanpishmi carcani.

28Ima shujtajcunamantapish yallica punllantami, maipipish tandanacushca crijcuna yuyailla cani.

29Maijan ungushca shina cajpica, ñuca chashna cashca shinatami yuyani. Maijanta pandachijpica yallitajmi llaquirini.

30Imamanta jatun tucuna cajpica, ñucaca imata mana rurai tucuj shina cashcamantami, jatun tucusha.

31Ñuca mana llullacushcataca, ñucanchijta Mandaj Jesucristopaj Yaya, Taita Diosmi yachan. Paica huiñai huiñaita alli nishcami.

32Damascopi ñuca cajpica, chai llajtata mandachun jatun mandaj Aretas churashca mandajmi, ñucata japingapaj chai pueblomanta llujshina pungucunapi chapajcunata churarca.

33Chashna cajpipish, pueblo muyundij pirca shuj ventanata shuj canastapi cacharijpimi, paicunapaj maquimantaca quishpirircani.