JOB 37 - Quichua Chimborazo Bible

1Chaimantami ñuca shunguca,

ñalla llujshicuj shina jahuata

saltaricun.

2Pai rimarijpi c'ulun nishcata

alli uyaichigari.

Paipaj shimimanta llujshicuj c'ulun

nishcatapish uyaichigari.

3Chai c'ulun nishcataca, jahua pacha

ucunijtami cachan.

Relampacunatapish tucui cai pachatami

cacharin.

4Chai relampacunata cachashca q'uipapish,

c'ulun nishcaca uyarinrajmi.

Paipaj sinchi rimashcapish, c'ulun

nishpami uyarin.

Pai rimashcata ñucanchij uyajpipish,

paica mana upallanchu.

5Taita Diosca pai rimashcahuanmi,

mancharinata c'ulun nichin.

Paica ñucanchij mana yuyaita japipaj

mancharinacunatami ruran.

6Paica: Rasutapish, garhuatapish,

manchanayaj tamyatapish, allpaman uriyai

nishpa uriyachinllami.

7Chashnami runacunataca tucuicunata,

paicuna imalla ruracushcataca saquichin.

Pai tucuita rurai tucuj cashcata

tucuicunallataj yachaj chayachunmi

chashna ruran.

8Tamyacujpica animalcunapish, paicuna

causana jutcucunaman yaicushpami,

chaipi tiyancuna.

9Ura ladomantaca jatun acapanami shamun,

janaj ladomantaca chiri huairami shamun.

10Taita Dios p'ucujpimi rasupish tucun.

Chaimantami jatun yacucunapish

rumi shina sinchiyan.

11P'uyuta yacuyachishpami allpapi

yacuta regan.

Paipaj luzhuanmi p'uyutapish anchuchin.

12Cutinllataj pai mandajpimi, cai

pachapi pai mandashca shina rurangapaj

p'uyucunaca tucui muyundijta purin.

13Taita Diosca chai tucuitaca

huaquinpica llaquichingapaj,

huaquinpica pai rurashca allpata

c'uyashcamanta, huaquinpica llaquishcata

ricuchingapajmi cachan.

14Job runalla, caita alli uyai.

Taita Dios cashna mancharinacunata

rurashcataca alli yuyari.

15¿Taita Dios ima shina cai tucuita

tandachij cashcatapish,

jahua p'uyupi ima shina achij nichij

cashcatapish yachanguichu?

16¿Canca shujtaj shujtaj p'uyucuna

tiyashcatapish, alli yachaita charij

cai tucui sumajcunata ima shina

rurashcatapish yachanguichu?

17Ura ladomanta rupaj huaira shamushpa,

allpata rupajyachijllapipish,

cambaj churanahuanca t'itachinguimari.

18¿Yacuyachishpa mana p'aquirij espejota

ruraj shinachu canca Diostaca jahua

pachata rurashpa ayudarcangui?

19Paita imata nina cashcata

ñucanchijman yachachihuai.

Ñucanchijca amsapi cashcamantaca,

ima alli yuyaita mana charinchijchu.

20¿Ñuca rimashpa huillanaca allichu

canga?

Runaca mashnata yuyacushpapish, amsa

yuyaicunallahuantajmi saquiringa.

21Ashtahuanpish cunanca jahua pachapi

tiyacuj achij nicujtaca, mana ricui

tucuipajchu.

Huaira shamushpa p'uyucunata p'ichajpimi,

ricunalla canga.

22Janaj ladomantami quillujllata achij

ninga.

Mandaj Diosca mana entendipaj

jatun Diosmari.

23Tucuita Rurai Tucuj Diosca,

yallitaj jatun poderyujmi.

Paitaca mana pajtai tucunchijchu.

Paica jatunta llaquichi tucushpapish,

mana llaquichingachu.

24Chai tucuita ricushpami,

tucuicuna mancharingacuna.

Quiquin shungullapi alli yachaj

tucushcacunataca, mana c'uyanchu

nircami.