2 CORINTIOS 3 - Quichua Chimborazo Bible

Mushuj ruranata ari nishcapi rurajcunami canchij

1Ñucanchijllatajchari ¿allimi canchij ninata callaricunchij? Mana cashpaca shujtajcuna shinachu ¿allimi nishca quillcata cancunaman ricuchina canchij? mana cashpaca ñucanchijta ¿allicunami nishca quillcatachu cancunata mañashcanchij?

2Cancunamari ñucanchij ima shina cashcata ricuchij quillcacunaca canguichij. Tucui gentecuna rijsishca, rezashca ñucanchij shungupi quillcashca quillcacunamari canguichij.

3Cancunaca Cristo quillcashca, ricunalla quillcami canguichij. Ñucanchijmi chaitaca cancunaman curcanchij. Cancunaca mana tintahuan quillcashcachu canguichij, ashtahuanpish causaj Diospaj Espirituhuanmi quillcashca canguichij. Shinallataj mana tablajlla rumipi quillcashcachu, ashtahuanpish tablajlla aicha shungupimi quillcashca canguichij.

4Chaitaca Cristomantami Diospaj ñaupajpica, chashnataj cashcata yachanchij.

5Mana ñucanchijllamantataj imatapish rurangapaj yachashca canchijchu. Ashtahuanpish ñucanchij imatapish rurai tucunaca Diosmantami shamun.

6Mushuj ruranata ari nishcapi ruraj cachunpish, paillatajmi yachachirca. Chaica mana quillcashcamantachu, ashtahuanpish Diospaj Espiritumantami. Quillcashpa mandashcaca huañuchijmi, ashtahuanpish Diospaj Espirituca causaita cujmi.

7Tablajlla rumicunapi quillcashca huañuchij mandashcacunapish, achij nicuj sumajmi carca. Moisespaj ñahuipish achij nicuj cajpimi, israelcunaca paipaj ñahuitaca mana ricui tucurcacuna. Chai achij nicujca chingarijllami carca.

8Espíritu rurachicunca ¿manachu chaitapish yalli achij nicuj sumaj canga?

9Jatun llaquiman cachaj mandashcapish achij nicuj sumaj cashca cajpica, Dios justificanata huillanacarin ashtahuan sumajmari.

10Chai mandashcaca sumaj cashca cashpapish, cunan cai ashtahuan sumaj huillanahuan ch'imbapurajpica, imapish mana canchu.

11Chai chingarijlla mandashcapish achij nicuj sumaj ricurishca cajpica, manataj chingarij huillanacarin ashtahuan achij nicuj sumajmari.

12Chaimantami chashnataj cana cashcataca, tucui shunguhuan ñahui ñahui huillanchij.

13Ñucanchijca, mana Moisés shina ñahuita linsohuan taparinchijchu. Chai tucurijlla achij nicuj chingaricujta israelcuna ama ricurachunmi, Moisesca taparij carca.

14Ashtahuanpish paicunaca imamanta chashna tucucushcataca mana entendircacunachu. Cunan punllacunapish chashnallatajmi tucuncuna. Ñaupaman Quillcachishcata rezashpapish, chai linsohuan tapashca shina cashpami mana entendincuna. Chaitaca Cristollami anchuchin.

15Moisés quillcashcacunata paicuna rezajpica, cunan punllacunacamami chai linsoca, paicunapaj shungupica jarcacunraj.

16Shina cajpipish Mandaj Jesusman maijan cutirijpica, chai linsoca anchuchishcami canga.

17Mandaj Jesusca Espiritumi. Mandaj Jesuspaj Espíritu maipi canpica, ña cacharichishcami.

18Chaimi tucui ñucanchijca, ña mana ñahuita tapashca shina ricushpa, Mandaj Jesús sumaj cashcataca, espejo shina ricuchicunchij. Mandaj Jesuspaj Espiritullatajmi ñucanchijtaca, pai sumaj caj shina tucungacama ashtahuan ashtahuan shujtajyachicunlla.