DEUTERONOMIO 5 - Quichua Chimborazo Bible

Chunga mandashcacunata Taita Dios cushcami(Ex 20.1-17)

1Moisesca tucui israelcunata cayashpaca:

“Uyaichij Israelcuna, cunan ñuca chaitataj pajtachichun nishcacunata, pajtachinguitaj nishcacunata cancuna uyajta yachachishcataca alli alli yachashpa pajtachina yuyailla tucushpa pajtachichij.

2Horeb urcupimi Mandaj Dios ñucanchij Taita Dioshuan ñucanchijhuanca imallata ruranata ari ninacurcanchij.

3Chai ari ninacushcataca Mandaj Diosca mana ñucanchij ñaupa yayacunahuanchu ari ninacurca. Ashtahuanpish cunan ñucanchij caipi tandanacushca causajcunahuanmi ari ninacurcanchij.

4Mandaj Diosca chai urcupimi, cancunahuanca nina rupacuj chaupimanta ñahui ñahui rimarca.

5Chai nina rupacujta manchashpa, cancuna chai urcuman mana huichiyajpimi, ñucaca cancunaman Mandaj Dios imalla nishcata huillangapaj Mandaj Dioshuan, cancunahuan chaupipi carcani. Chaipimi paica:

6Ñucaca Mandaj Dios cancunapaj Taita Diosmi cani. Ñucami cancunataca Egiptopi huatashca shina llaquinayajta causacujpi llujshichimurcani.

7Ñuca ñaupajpi ama shujtaj dioscunata charingui.

8Maquihuan rurashca dios nishcacunatapish, jahua pachapi cajcunaman rijchajcunatapish, cai pachapi cajcunaman rijchajcunatapish, yacu ucupi cajcunaman rijchajcunatapish amataj rurangui.

9Chaicunataca ama cunguringuichu, paicunapajca ama imata ruranguichu. Ñucami Mandaj cambaj Taita Dios cani. Ñucaca tucuita rurai tucuj Dios, ñucapajlla cachun munajmi cani. Yayacuna millaita rurashpa ñucata p'iñachijpica quimsa huahua huahuacama mana cashpacarin chuscu huahua huahuacamami llaquichini.

10Ñucata c'uyashpa, ñuca mandashcacunata huaquichijcunataca, huaranga huaranga huahua huahuacunacama llaquijmi cani.

11Mandaj cambaj Taita Diospaj shutipica manapish rimanapica ama rimangui. Paipaj shutita manapish rimanapi rimajtaca llaquichingatajmi.

12Mandaj Dios cambaj Taita Dios canta mandashca shinallataj samana punllata ñucapajlla ch'icanchinataca ama cungaringui.

13Sujta punllata trabajangui, cambaj tucui ima ruranacunataca chai punllacunapi rurangui.

14Canchis punllapica Mandaj cambaj Taita Diospajlla punlla cashcamanta, Mandaj Diospajlla tucushpa chai punllapica ama imata rurangui. Cambaj churitapish, ushushitapish, cambajta ruraj c'aritapish, huarmitapish, cambaj huagratapish, cambaj burrotapish cambaj ima animaltapish, shujtaj llajtamanta shamushpa cambaj huasipi cajtapish amataj imata rurachinguichu. Cambajta ruraj c'aripish, huarmipish can shinallataj samarichunmi chashna rurana cangui.

15Egiptopi cashpa cancunapish huatashca shina ruraj cashcata yuyaringuichij. Mandaj Dios cancunapaj Taita Diosca paipaj tucuita rurai tucuj maquihuan, paipaj rigrata chutashpami chaimanta llujshichimurca. Chaimantami Mandaj Dios cancunapaj Taita Diosca samana punllata huaquichichun mandarca.

16Mandaj Dios cambaj Taita Dios mandashca shinallataj cambaj yayata cambaj mamata alli ningui. Chashna rurashpami Mandaj Dios cambaj Taita Dios canman cushca llajtapi unita causangui. Tucui imapipish ñaupajman ringui.

17Ama huañuchingui.

18Ama huainayangui.

19Ama shuhuangui.

20Ama pitapish manapish chashna cashcata llullashpa huillashpa llaquipi churangui.

21Shujtajpaj huarmita cashpa, paipaj huasita cashpa, paipaj allpata cashpa, paipajta ruraj c'arita cashpa, huarmita cashpa, paipaj huagrata cashpa, paipaj burrota cashpa, paipaj shujtaj ima charishcacunatapish ama munangui” nishpami mandarca.

Taita Dios rimajpi israelcuna mancharishcami(Ex 20.18-26)

22Cai mandashcacunataca Mandaj Diosmi tucui cancuna urcupi tandanacushca cajpi, nina rupacuj chaupimanta amsa p'uyu ucumanta mancharinata rimarca. Chai q'uipaca ña mana imata ashtahuan nishpami, tablajlla ishqui rumicunapi quillcashpa ñucaman curca.

23Cancunaca amsalla chaupimanta pai rimashcata uyashpa, chai urcupish nina lunyashpa rupacujta ricushpami aillucunata mandajcunapish, cunaj yuyajcunapish ñucapajman shamushpaca

24cashna nircanguichij: Mandaj Dios ñucanchij Taita Diosca pai sumaj cashcata, pai jatun cashcatami ñucanchijmanca ricuchirca. Nina rupacuj chaupimanta pai rimashcatami uyarcanchij. Mandaj Diosca runacunahuan rimajtami ricunchij. Chaita ricushpapish manamari huañunchijchu.

25Chai jatun nina lunyacujca ñucanchijta tucuchingallatajmari. Mandaj Dios ñucanchij Taita Dios rimashcata uyashpa caticushpallaca huañushunmari. ¿Maitataj caipica huañushunyari?

26Huañujlla runaca ¿pitaj nina rupacuj chaupimanta causaj Dios rimashcata uyashpa ñucanchij shina mana huañushpa causacujrajca tiyangari?

27Chaimanta Mandaj Dios ñucanchij Taita Diospajman c'uchuyashpa tucui pai imalla nishcata uyamugri. Chai q'uipaca Mandaj Dios ñucanchij Taita Dios tucui imallata canman nishcata ñucanchijman huillanguillami. Ñucanchijca uyashunllami, cazushunllami.

28Cancuna chashna nijta uyashpami, Mandaj Diosca ñucamanca cashna nirca: Cai gentecuna canta imalla nishca shimicunataca uyanimi. Tucui chai nishcacunaca allimi.

29Paicunaca cunan ima shinami ñucata manchacun chashnalla ñucata manchaj shungulla cangapishchari. Chashna cashpa ñuca mandashcacunata punllanta huaquichishpami paicunapish, paicunapaj huahuacunapaj huahuacunapish tucuipi alli ringacuna.

30Cunanca: Cancunapaj carpa huasicunaman tigrashpa richijlla nigri.

31Canca caipi ñucahuan saquiri. Tucui mandashcacunata, chaitataj pajtachingui nishcacunata, pajtachichuntaj mandashcacunata canman cusha. Chaitaca paicunaman ñuca cushca llajtaman chayashpa, chai yuyailla tucushpa pajtachichun yachachingui nircami.

32Chaimanta cunanca israelcuna Mandaj Dios cancunapaj Taita Dios mandashca shina ruraichij. Alli ladomanpish, lluqui ladomanpish manataj anchurinachu canguichij.

33Mandaj Dios cancunapaj Taita Dios mandashca ñanllapi puringuichij. Chashna rurashpami cancuna japina cashca llajtata japishpa chai llajtapica unita causanguichij, tucui imapipish ñaupajman ringuichij.