LEVÍTICO 5 - Quichua Chimborazo Bible

1“Maijanpish imata ricushca cajpi, uyashca cajpi tapujpi mana huillashpaca juchallisha nishpataj juchallishcami tucunga.

2Imapish mapacunapi tuparijca charina animal huañushcapi cashpa, mana charina animal huañushcapi cashpa, huijsahuan llucashpa purij animal huañushcapi cashpa tuparijca, tuparishcata mana yachashca cashpapish mapa tucushcamanta juchallishcami tucunga.

3Maijanpish imamanta mapayashcapi tuparijca mapayangami. Mapayashca runapi tuparijpish mapami tucun. Tuparishcata mana yachashca cashpapish, q'uipata yachaj chayashpaca juchayujmi canga.

4Maijanpish ima allita cashpa, mana allita cashpapish, mana alli yuyarishpa quiquin shimihuantaj rurashatajmi ningachari. Ima cajpipish manapish alli yuyarishpa chashna rurashatajmi nishpa quiquin shimihuantaj nij runaca imata nicushcata mana alli yuyarishpa chashna nishca cashpapish q'uipata yachaj chayashpaca chashna nishcacunamantaca juchallishataj nishpa juchallishcallatajmi tucunga.

5Maijan cashna shinacunata rurashca cashpaca imapi juchallishcata huillachun.

6Chai juchallishcamanta cuna cashcata Diosman cungapajca, paipaj canlla animalcunamanta shuj huarmi ovejata cashpa, shuj malta chivata cashpa apamuchun. Chai juchamantaca cura Mandaj Diosman cuchun.

7Chai juchamanta cuna cashcata Diosman cungapaj malta ovejata mana charishpaca, ishqui urpita cashpa, ishqui palomata cashpa apamuchun. Shujtaca juchamanta cuna cashcata cunapaj, caishujtaca tucuita cushpa tucui rupachinapaj apamuchun.

8Chaicunataca curapajman apachun. Chai curaca juchamanta cuna cashcataraj Diosman cushpa, cungata torcishpalla huañuchichun ashtahuanpish ama p'itichun.

9Juchamanta cushca animalpaj yahuartaca, altar shuj ladopi tsirapachun. Puchushca yahuartaca altar chaquipi capichun. Chashnaca juchamanta Diosman cushcami canga.

10Caishuj animaltaca, Mandaj Diosman tucuita cushpa tucuita rupachina cashca shinallataj rupachichun. Chai juchallijmanta cura chashna Mandaj Diosman cujpimi, Mandaj Diosca chai juchallijpaj juchataca perdonanga.

11Chai juchallij ishqui urpipaj mana cashpaca, ishqui palomapaj mana pajtata charishpaca chai juchallijca alli cutata shuj efata chungapi chaupishca shuj mirgata apamuchun. Juchamanta Diosman cuna cashcamanta chai cutapica aceitetapish, inciensotapish ama churashpa apamuchun.

12Chaitaca curapajman apachun. Chai cutataca yuyarinapaj cachun cura, paipaj maqui jundata japishpa altar jahuapi Mandaj Diosman cushca rupacun jahuapi churashpa rupachichun. Chaica juchamanta Diosman cushcami canga.

13Maijan chai shina juchacunata rurashcamantaca chai juchacunamantaca cura Mandaj Diosman cuchun. Chashna rurajpimi paica perdonashca canga. Tucui saquirishca cutaca Diosman cushca grano shinallataj curapajmi” nircami.

Juchacunata perdonachun Taita Diosman cushcami

14Mandaj Diosca Moisestaca cashnami nirca:

15“Maijanpish Mandaj Diospajlla cajta paiman cuna cashcata mana alli yuyarishcamanta mana tucuita cushpaca juchayujmi tucun. Chai juchamantaca oveja canllamanta ima mana tucushca shuj carnerota apamuchun. Chai carneroca Diospaj carpa huasipi tiyaj siclo cullqui shinallataj cullquipi mashna valishcata ricushpa apamuchun. Chaica juchamanta cuna cashcata Diosman cushcami canga.

16Mandaj Diospaj ch'icanchishpa cuna cashcata mana tucuita cujca, mashnata mana cushcatapish tucuita cuchun. Cada chungamanta pichcahuan mirachishpapish cuchun. Chaitaca curaman cuchun. Tucui chaicunata ña apamujpica cura chai juchamanta, cushca carnerota Diosman cushpa rupachijpimi, Mandaj Diosca chai juchataca perdonanga.

17Mandaj Dios mandashpa caitaca mana ruranachu nishca mandashcacunamanta maijan mandashcata mana yachashcamanta rurashpapish juchayujmi tucunga. Yachashca jahua juchallishca shinallataj juchayujmi tucunga.

18Chai juchamanta Diosman cuna cashcata cungapajca, oveja canllamanta ima mana tucushca shuj carnerota curapajman apamuchun. Chai carnerota cujca, juchamanta cunapaj pajta cashcata, mana pajta cashcata ricushpa cuchun. Chai carnerotaca, Mandaj Diosman cushpa cura rupachichun. Chashna cujpimi mana yuyashcapi juchallishcataca Mandaj Diosca perdonanga.

19Mana yuyarishcamanta chashna rurashca cashpapish Mandaj Diospaj ñaupajpica paita p'iñachishpa juchallishcallatajmi tucun”.