ISAÍAS 32 - Quichua Chimborazo Bible

Cashcata ruraj jatun mandaj tiyanamanta

1Riqui, shuj mandajmi cashcata rurashpa mandagrin.

Pai churashca mandajcunapish cashcata rurashpami mandanga.

2Chai runaca huairata miticuna shinami canga.

Jatun acapanamanta paca tucuna shinami canga.

Chaquishca pambacunapi yacu llujshicuj shinami canga.

Yallitaj rupai punllapi llandurina rumi urcu shinami canga.

3Paita ricujcunapaj ñahuicunaca, mana amsayangachu.

Paita uyajcunapaj rinrincunaca allimi uyaracungacuna.

4Rumi shungucunapish, yachangapajtajmi entendingacuna.

Mana rimai tucuj c'allucunapish entendinallata utca rimajcunami canga.

5Millai runaca alli nishcaca manataj cangachu.

Umacujlla runaca alli nishcaca manataj cangachu.

6Millai runaca millaillatami riman.

Paipaj shungupica millaita ruranallatami yuyarin.

Mandaj Diosta yanganchishpa c'amingapajmi chashna millai yuyailla tucun.

Yaricaihuan cajmanpish ama cungapaj, yacunaihuan cajmanpish yacuta ama cungapajmi chashna tucun.

7Umacujlla runapaj macanacunacunaca

umana yuyaihuan sumaj shimicunata rimarij tucushpa, llaquichingapaj huashalla yuyarishpa, millaicunallata yuyarinami.

Mitsarinata mana yachajcunata llulla shimicunahuan mishangapajmi chashna tucun.

Mandajcunahuan tucushpa huajchacunata llaquichingapajmi chashna tucun.

8Ashtahuanpish alli yuyaiyuj runaca alli yuyaihuan allicunallatami yuyarin.

Paica alli yuyaicunallata yuyarij cashcamantami jatunyachishca canga.

Jerusalén pueblopi causaj huarmicunata rimashcami

9¡Imata ruranata mana yuyarij huarmicuna jatarichij!

¡Ima llaqui shamunata mana yuyashpa causacuj huarmicuna, ñuca cunashcata chasquichij!

10Ima llaqui tucunata mana yuyashpa causacuj huarmicuna, caimanta huata asha punllacuna q'uipaca jatun mancharinami tiyanga.

Uvata cozichana mana tiyashcamanta, ima shujtaj granocunata cozichana mana tiyashcamantami chashna manchai tiyanga.

11Ima ruranata mana yuyarij, ima llaqui japinata mana yuyashpa causacuj huarmicuna chujchuichigari, aij nishpa huacaichigari.

Sumaj churanacunata llujshichishpa, cañamazuhuan chumbillirichigari.

12Llaqui punlla chayamujpica, sumaj chagracuna, alli uva chagracuna tiyashcata yuyarishpami, shungupi huajtarishpa huacangacuna.

13Ñuca agllashcacunapaj llajtapica casha yuracuna, casha q'uihuacunallami huiñanga.

Cushicuna huasicunapipish, cushicuna pueblocunapipish tucuipimi chaicunalla huiñanga.

14Mandajcuna tiyana huasicunapish shitashcami saquiringa.

Pueblopi gentecuna bullacushcapish ña mana uyaringachu.

Torrecunapish, muyundij pircacunapish achca huatacunata shitashca jutcucunallami canga.

Chaicunapica sacha burrocuna causana, huagracunapaj corralmi canga.

15Jahua pachamanta paipaj Espirituta Dios cachashpa, ñucanchijpi churangacamami chashna canga.

Espíritu ñucanchijpi cajpica shitashca pambacunapish, alli granota p'ucuj allpacunami tucunga.

Alli granota p'ucuj allpacarin yallitaj alli granota p'ucujmi tucunga.

16Shitashca pambapica cashcata rurashpa mandanami tiyanga.

Alli chagracunapica cashcata ruranami tiyanga.

17Cashcata ruraj mandaj mandashcamantami sumaj causai tiyanga.

Cashcata rurashpa mandacujpimari samarinapish, ima manchai illajlla canapish huiñaita canga.

18Ñuca agllashcacunaca ima llaqui mana tiyan llajtapimi causangacuna.

Pi mana cuyuchipaj llajtapi caj huasicunapimi causangacuna.

19Urcucunata rundujpica, pueblopi causajcunaca tucuimi cumuringa.

20¡Yacu uricunapi tarpushpa causajcuna huagracunatapish, burrocunatapish cacharishpa charijcuna cushicuichij!