DEUTERONOMIO 27 - Quichua Chimborazo Bible

Mandashcata rumipi quillcashcami

1Moisespish israelcunata cunaj yuyajcunapish israelcunataca cashnami nirca:

“Cunan ñuca cancunaman quillcashpa mandashcacunataca tucuita pajtachinguichij.

2Jordán yacuta ch'imbashpa, Mandaj Dios cancunapaj Taita Dios cushca llajtaman yaicungapaj ch'imbai punllaca, jatun rumicunata shayachishpa calhuan llambujllata ruranguichij.

3Lechepish, sacha chuspipaj mishquipish yacu llujshicuj shina tiyaj llajtata Mandaj Dios cancunapaj Taita Dios cancunapaj ñaupa yayacunaman nishca shinallataj cancunaman cushca llajtaman yaicushca q'uipaca chai rumicunapica tucui cai mandashcapi nishcacunata quillcanguichij.

4Cancunata cunan ñuca mandashpa shayachinguichij nishca rumicunataca ña Jordán yacuta ch'imbashpa Ebal urcupi shayachishpa calhuan llambujllata ruranguichij.

5Mandaj Dios cancunapaj Taita Diospaj shuj altartapish chaillapitaj rumicunahuan ruranguichij. Chai rumicunataca ama ima fierrocunahuan labranguichijchu.

6Mandaj Dios cancunapaj Taita Diospaj altartaca mana p'aquishca rumicunahuan rurashpa chai altar jahuapi, Mandaj Dios cancunapaj Taita Diosman tucuita cushpa tucui rupachinguichij.

7Sumaj causaimanta cunapajpish animalta huañuchishpa Taita Diosman cunguichij. Chai aichataca Mandaj Dios cancunapaj Taita Diospaj ñaupajpi micushpa cushicunguichij.

8Chai rumicunapica cai mandashcapi tucui imalla nishcacunata ricunallata quillcanguichij” nishpami mandarca.

9Chai q'uipaca Moisesca levita curacunahuan tandanacushpami israelcunataca cashna nirca:

“Israelcuna, upajlla uyaichij. Cunanca Mandaj Dios cancunapaj Taita Diospajllacunami tucushcanguichij.

10Mandaj Dios cancunapaj Taita Dios rimashcata uyashpa pai mandashcacunata, pai chaitataj pajtachichun nishcacunata cunan ñuca cancunaman yachachishcacunataca tucuita pajtachinguichij” nircami.

Dios mandashcata p'aquijca llaqui tucuna cashcami

11Chai punllallatajmi Moisesca, israelcunataca cashna yachachirca:

12Jordán yacuta ña ch'imbashpaca tucui israelcuna alli canata huillangapajca Gerizim urcu jahuapica: Simeonpaj, Levipaj, Judapaj, Isacarpaj, Josepaj, Benjaminpaj aillucunami chai urcu jahuapi cangacuna.

13Llaqui tucuna cashcata huillangapajpish Ebal urcu jahuapica: Rubenpaj, Gadpaj, Aserpaj, Zabulonpaj, Danpaj, Neftalipaj aillucunami chaipi cangacuna.

14Chaipimi levitacunaca caparishpa tucui israelcunataca cashna ningacuna:

15Maijanpish caspita diostajllata rurajcunapish, imata yacuyachishpa diostajllata rurajcunapish, imatapish ruranata yachajcuna maquihuan rurashca Diostajllacunata pacashpa charijcunaca Mandaj Dios millananatami rurangacuna. Chaicunaca llaqui tucushca cachun nijpica tucuicuna: Chashnataj cashca cachun ninguichij.

16Maijanpish paipaj yayata paipaj mamata yanganchishpa p'iñajcunaca llaqui tucushca cachun nijpica, tucuicuna: Chashnataj cashca cachun ninguichij.

17Maijanpish shujtajpaj allpa maillata cashcata ricuchij rumita anchuchijca llaqui tucushca cachun nijpica, tucuicuna: Chashnataj cashca cachun ninguichij.

18Ñahui mana ricujta shujtaj ñanta cachaj runaca llaqui tucushca cachun nijpica, tucuicuna: Chashnataj cashca cachun ninguichij.

19Shujtaj llajtamanta shamujcunata, yaya mama illaj huahuacunata, viudacunata, maijanpish chaicunapaj imalla rurana cashcata mana rurashpa, ashtahuanpish shujtajman tucujca llaqui tucushca cachun nijpica, tucuicuna: Chashnataj cashca cachun ninguichij.

20Maijanpish paipaj yayapaj huarmihuan siririshpa paipaj yaya llatanashpa ricunata ricujca llaqui tucushca cachun nijpica, tucuicuna: Chashnataj cashca cachun ninguichij.

21Maijanpish animalhuan chayarinacujca llaqui tucushca cachun nijpica, tucuicuna: Chashnataj cashca cachun ninguichij.

22Yayamanta cashpa, mamamanta cashpa lapanihuan siririjca llaqui tucushca cachun nijpica, tucuicuna: Chashnataj cashca cachun ninguichij.

23Maijanpish paipaj suegrahuan siririjca llaqui tucushca cachun nijpica, tucuicuna: Chashnataj cashca cachun ninguichij.

24Maijanpish cungaillapi pita huañuchijca llaqui tucushca cachun nijpica, tucuicuna: Chashnataj cashca cachun ninguichij.

25Maijanpish imapi mana juchachipaj runata huañuchingapaj cullquita chasquijca llaqui tucushca cachun nijpica, tucuicuna: Chashnataj cashca cachun ninguichij.

26Maijanpish cai mandashcacunata chaitataj tucuita mana pajtachijca llaqui tucushca cachun nijpica, tucuicuna: Chashnataj cashca cachun ninguichij.