2 CRÓNICAS 10 - Quichua Chimborazo Bible

Israelcuna Roboamta c'ariyashcami(1 R 12.1-24)

1Roboamca, jatun mandaj cachun paita churangapaj tucui israelcuna Siquempi tandanacujpimi, chaiman rirca.

2Nabatpaj churi Jeroboamca, Salomonta miticushpa Egipto causacushpami, chaita yachaj chayarca. Chaimi Egiptomanta tigramurca.

3Israelcuna Jeroboamta chaimanta shamuchun cayachijpimi, paica tucui tandanacushca israelcunahuan Roboampajman rishpaca:

4–Cambaj yaya Salomonca ñucanchijtaca, yalli llashaj yugotami apachirca. Cunanca canca cambaj yaya llashaj yugota apachishcatapish, yallitaj sinchi ruranacunata rurachicushcatapish p'anguillayachiyari. Chashna rurajpica, cambajtaca rurashunllami– nircacunami.

5Shina nijpi Roboamca:

–Cunanca richijlla, ñucahuan rimangapajca quimsa punllapi tigramunguichij– nijpica tucuicuna tigrashpa rircallacunami.

6Chaimi Jatun mandaj Roboamca, paipaj yaya Salomón causacujpi paipaj yayaman yuyaita cuj cunaj yuyajcunataca:

–¿Ima shina cutichichuntaj cancunaca yuyaita cunguichij?– nirca.

7Shina nijpi paicunaca:

–Can paicuna munashcata rurashpa alli charijpi, paicunapaj allita rurashpa sumaj shimicunahuan cutichijpica, paicunapaj tucui causaipimi cambajta rurashpa causangacuna– nircacunami.

8Shina nijpipish Roboamca, cunaj yuyajcuna yuyaita cushcata mana uyashpami, paihuan igual huiñashca paihuan caj q'uipa huiñaicunatapish yuyaita cuchun mañarca.

9Paicunataca:

–¿Cambaj yaya yallitaj apachicushca yugomanta p'anguillayachi nishcataca, cancunaca ima shina cutichichuntaj yuyaita cunguichij?– nircami.

10Chashna nijpica Roboamhuan igual huiñai q'uipa huiñaicunaca:

–Cambaj yaya yallitaj llashaj yugota apachicushcataca, p'anguillayachiyari nijcunataca cashna rimai: Ñucapaj uchilla dedoca, ñuca yayapaj huasha lomotapish yalli racumi.

11Ñuca yaya llashaj yugota apachishca cajpica, ñucacarin cancunamanca ashtahuan yalli llashaj yugotami apachisha. Ñuca yaya cancunata azotishca cajpica, ñucacarin escorpioncunahuanmi llaquichisha ninguiyari– nircacunami.

12Jeroboamca jatun mandaj Roboam quimsa punllapi tigrangui nishca shinallatajmi tucui israelcunahuan Roboampaj quimsa punllapi shamurca.

13Chaipimi jatun mandaj Roboamca, israelcunataca cunaj yuyajcuna yuyaita cushcata mana cazushpa,

14q'uipa huiñaicuna yuyaita cushca shina sinchita cashna nishpa cutichirca: “Ñuca yaya yallitaj llashaj yugota apachishca cajpica, ñucacarin ashtahuan llashaj yugotami apachisha. Ñuca yaya azotishpa llaquichishca cajpica, ñucacarin escorpioncunahuanmi llaquichisha” nircami.

15Mandaj Diosca, Nabatpaj churi Jeroboamman Silo pueblopi causaj Ahías runahuan huillachishcata pajtachina cajpimi, Roboamca israelcuna mañashcataca mana uyarca.

16Israelcunaca paicuna mañashcata jatun mandaj Roboam mana uyajpimi, tucuicuna cashna nircacuna:

“Ñucanchijca Davidpaj huahua huahuahuanca imata mana charinchijchu. Isaipaj huahua huahuahuan japinatapish imata mana charinchijchu. ¡Tucui israelcuna, cancunapaj carpa huasicunaman richijlla! ¡Davidpaj huahua huahuacunaca cancunapaj aillucunata mandacuichijlla!”

Nishpaca israelcunaca paicunapaj carpa huasicunaman tigrarcallacunami.

17Chaimantami Roboamca, israelcunataca Judá llajtapi caj pueblocunapi causajcunallata mandashpa catirca.

18Jatun mandaj Roboamca, sinchi ruranacunapi mandaj Adoramta israelcunapajman cachajpimi, paitaca rumicunahuan shitajpi huañurca. Chaimi jatun mandaj Roboamca, carropi huichiyashcahuan Jerusalenman callparcalla.

19Israelcunaca, Davidpaj huahua huahuapuramanta c'hicanyashpami, cunancama chashna causacuncuna.