ESTER 9 - Quichua Chimborazo Bible

Judiocunaca paicunata p'iñajcunata huañuchishcamanta

1Huatapaj chunga ishqui quilla Adar shuti quillapaj chunga quimsa punllapimi, judiocunaca jatun mandaj mandashcata rurana carca. Israelcunata p'iñajcunapish paicuna munashca shina llaquichishpa charingapajca, chai punllallatatajmi shuyarcacuna. Ashtahuanpish tigramanmi llaqui tucurcacuna. Judiocunarajmi paicunata p'iñajcunataca, paicuna munashca shina llaquichircacuna.

2Jatun mandaj Asuero mandacun tucui llajtacunapi caj pueblocunapimi, judiocunaca paicunata p'iñashpa llaquichisha nicujcunahuan macanacungapaj tandanacurcacuna. Judiocunata p'iñajcunaca, paicunata yallitaj manchashpami, paicunahuanca mana macanacui tucurcacuna.

3Jatun mandajllataj tucui llajtacunapi churashca mandajcunapish, satrapacunapish tucui caishuj mandajcunapishmi Mardoqueota mancharcacuna. Chaimantami judiocunapajca, tucui chai mandajcunallataj allita rurarcacuna.

4Jatun mandajca pai mandacunpica, Mardoqueotami tucuicunamanta yalli allipi churarca. Chaitaca, tucui llajtacunapimi yachaj chayarcacuna. Mardoqueoca ashtahuan ashtahuanmi tucuita mandashpa catirca.

5Judiocunaca, paicunata p'iñajcunataca paicuna munashca shinami llaquichircacuna. Shinallataj espadacunahuan huañuchircacunapishmi.

6Jatun mandaj causacun Susa pueblollapimi, 500 runacunata huañuchircacuna.

7-9Shinallataj chai pueblollapitajmi Parsandata, Dalfón, Aspata, Porata, Adalía, Aridata, Parmasta, Arisai, Aridai, Vaizata shuti runacunatapish huañuchircacuna.

10Chai chunga runacunaca, judiocunata p'iñaj Amanpaj churicunami carca. Amanca, Hamedatapaj churimi carca. Tucui chaicunata huañuchishpapish, paicuna imalla charishcacunataca mana japircacunachu.

11Jatun mandaj Asueroca, pai causacun Susa pueblopi mashnacunata huañuchishcataca, chai punllallatajmi yachaj chayarca.

12Chaimantami paica jatun mandaj Ester huarmitaca cashna nirca:

–Ñuca causacun cai Susa pueblopica, judiocunaca, ñami 500 runacunata huañuchircacuna. Shinallataj Amanpaj chunga churicunatapishmi huañuchircacuna. Ñuca mandacun caishuj llajtacunapicarin imallatapishchari rurarcacuna. ¿Imatataj ashtahuan rurachun ningui? Mañailla, ñucaca mandashallami– nircami.

13Chashna nijpimi, Esterca cashna nirca:

–Can jatun mandajpaj yuyaipi alli cajpica, cunan punllapaj mandashcapi nicushca shinallataj cayapish rurachun saquipayari. Cai Susa pueblollapi judiocuna chashna rurachun saquipangui. Shinallataj Amanpaj chunga churicunatapish sipina caspipi huarcuchipangui– nircami.

14Chashna nijpimi jatun mandajca, chashnallataj rurachun pai mandashcataca Susa pueblopi causajcunaman huillachirca. Chaimantami Amanpaj chunga churicunataca, sipina caspipi huarcurcacuna.

15Susa pueblopi causaj, judiocunaca Adar shuti quillapaj chunga chuscu punllapimi cutinllataj tandanacurcacuna. Chashna tandanacushpami, chai llajtapi causajcunataca, 300 runacunata huañuchircacuna. Chashna huañuchijpipish paicuna imalla charishcataca manataj japircacunachu.

16-17Caishuj llajtacunapi causaj, judiocunaca chai Adar shuti quillapaj chunga quimsa punllapimi paicunata p'iñajcuna huañuchinaman shamujpi, mitsarishpa macanacungapaj tandanacurcacuna. Chashna tandanacushpaca chai p'iñajcunahuan macanacushpami, jatun llaquipi canamantaca llujshircacuna. Chai p'iñajcunataca, 75.000 runacunatami huañuchircacuna. Chashna huañuchishpapish paicuna imalla charishcacunataca manataj japircacunachu. Chai cayandij chunga chuscu punllapimi, jatun micuita rurashpa, cushicushpa samarircacuna.

18Susa pueblopi causaj, judiocunaca chai quillallapitajmi chunga quimsa punllapipish, chunga chuscu punllapipish tandanacushpa, paicunata p'iñajcunahuan macanacurcacuna. Chashna macanacushpaca, chai cayandijllataj chunga pichca punllapimi jatun micuita rurashpa, cushicushpa samarircacuna.

19Chashna quishpirishcamantami, judiocunaca muyundij jatun pirca illajlla pueblocunapi causajcunapish, chai pueblocuna muyundij llajtacunapi causajcunapish yuyarincuna. Paicunaca, Adar shuti quillapaj chunga chuscu punllapimi chaita yuyarishpa, jatun micuita rurashpa cushicurcacuna. Shinallataj c'uchullapi causajcunapurahuanca, caishuj chaishuj convidanacunata cunacushpami cushicuncuna.

Purim nishca fiestata huatanta yuyarichun mandashcami

20Mardoqueoca, tucui imalla tucushcacunatami quillcachirca. Chai quillcacunataca, jatun mandaj Asuero mandacun tucui llajtacunamanmi c'uchulla llajtacunamanpish, caru llajtacunamanpish cacharca. Judiocunapajmi chashna cacharca.

21Adar shuti quillapaj chunga chuscu punllatapish, chunga pichca punllatapish huatanta yuyarichunmi mandarca.

22Chai quillcacunallapitajmi, judiocuna paicunata p'iñajcunamanta quishpirishcata yuyachirca. Shinallataj chai quillapi jatunta caparirishpa huacana cashca cashpapish, yallitaj cushicushcatapishmi yuyachirca. Huatanta chaita yuyarishpa chai punllacunapi jatun micuita rurashpa, caishuj chaishujhuan imallatapish cunacushpa, huajchacunamanpish carashpa cushicuchunmi mandarca.

23Mardoqueo chashna mandashpa quillcachishcamantami, judiocunaca paicuna ña callarishca shinallataj huatanta chashna yuyarinapaj saquirircacuna.

24Agagpaj huahua huahuacunapura Hamedatapaj churi Amanca, tucui judiocunata p'iñaj cashpami, tucui paicunata huañuchinata yuyarishca carca. Paicunata ima punlla huañuchinata yachangapajca, Pur nishca suertetami rurarca.

25Chaimantami Esterca, jatun mandajhuan rimangapaj rirca. Chaita huillajpimi jatun mandajca, judiocunata Amán jatun llaquita rurasha nicushcamantaca, paillatataj chashna llaquichichun mandashpa quillcachirca. Chaimantami Amantaca, paipaj churicunandij sipina caspipi huarcuchun mandarca.

26-27Pur nishca suerteta Amán rurashcamantami, yuyarina ishqui punllacunataca Purim nincuna.

Judiocuna huañunataj cashca jahua causashcataca, paicuna quiquinllatajmi alli yacharcacuna. Chaimantami quillcashpa mandashca shina chai ishqui punllacunataca mana cungarishpa, huatanta chai punllacunapitaj yuyarinapaj saquirircacuna. Paicunapaj huahua huahuacunapish, paicunapura tucujcunapish chaitaca mandashcapi nishca shinatajmi rurarcacuna.

28Chai Purim nishca punllacunataca, judiocunaca tucui paicunapaj huahua huahuacunapish, quiquin huasi ucupuracunapish mai llajtapi, mai pueblopi causashpapish mana cungarishpa huatanta yuyarichun nircacunami.

29Abihailpaj ushushi jatun mandaj Ester huarmipish, Judá llajtamanta caj Mardoqueopishmi Purim nishca jatun punllacunataca tucuicuna mana saquishpa yuyarichun, shuj cutihuan yuyachishpa mandashpa quillcarcacuna.

30Chai punllacunataca, jatun mandaj Asuero mandacun, 127 llajtacunapi causaj tucui judiocunapajmi cacharcacuna. Chai quillcacunapica tucuicunata cushichingapajmi, sumaj shimicunahuan yuyachishpa quillcarcacuna.

31Chai quillcacunapica, Judá llajtamanta caj Mardoqueohuan, jatun mandaj Ester huarmihuanca, ñaupaman paicuna mandashca shinapish, paicunallataj huahua huahua chai Purim nishca punllacunapica chai punllacunapitaj huatanta yuyarina tucushca shinapish yuyarichunmi mandarcacuna. Shinallataj chai punllacuna chayajpica paicunapish, paicunapaj huahua huahuacunapish mana micushpa huacashpa Diosta mañashcata yuyarishpa chashna rurachunmi mandarca.

32Chai Purim nishca punllacunata tucuicuna yuyarichunca, Estermi mandarca. Chai mandashcataca, shuj libropimi quillcachirca.