ISAÍAS 59 - Quichua Chimborazo Bible

Israelcunapaj juchacunata Diosman huillashcami

1Riqui, Mandaj Diosca cancunata mana quishpichingapajca, mana maqui utuchu.

Paipaj rinrinpish mana uyangapajca, mana uyajchari.

2Ashtahuanpish cancuna millaita rurashcamari, cancunahuan cancunapaj Taita Dioshuan ch'icanchishca.

Cancunapaj juchacunamari cancuna mañashcata ama uyachun Taita Diospaj ñahuita tapan.

3Cancunapaj maquicunaca, yahuarhuan mapamari.

Cancunapaj dedocunaca millaihuan jundamari.

Cancunapaj shimicunaca llullallatami rimancuna.

Cancunapaj c'alluca millaillatami riman.

4Cashcata ruranamantaca pi mana caparinchu.

Pi mana cashcata ricushpa mandanchu.

Yangallapimi shunguta churancuna.

Yangallatami rimancuna.

Millaillatami chichun.

Millaitami huachan.

5Culebra luluncunatami ugllancuna.

Pitapish urmachingapajca araña shinami ahuancuna.

Maijanpish chai luluncunata micushpaca huañungami.

Chai lulunta tugyachijpica, culebracunami llujshinga.

6Paicuna ahuashcaca churarinapajca mana valinchu.

Paicuna rurashcacunahuanca pi mana c'atari tucunchu.

Paicunapaj rurashcacunaca millaillami.

Paicunapaj maquicunapica millaita ruranallami tiyan.

7Paicunapaj chaquicunaca millaita ruranallamanmi callpan.

Ima juchachina illajlla runacunata huañuchingapajmi callpancuna.

Paicunapaj yuyaicunaca millaita ruranallatami yuyancuna.

Paicunapaj ñancunapica, chingachina llaquichinallami tiyan.

8Sumaj causana ñantaca mana rijsircacunachu.

Cashcata ruranaca paicunapaj ñanpica mana tiyanchu.

Paicunapaj chaqui ñancunaca huishtumi.

Maijanpish chai ñanta purijca sumaj causaitaca mana rijsingachu.

9Chaimantami cashcata ruranaca, ñucanchijmanta anchurishca.

Ima mana pandata ruranataca mana pajtashcanchijchu.

Achij punllata shuyashpapish amsallapitajmi canchij.

Achijyachijta shuyashpapish amsallapitajmi purinchij.

10Ñahui mana ricujcuna shinami, patacunapi tantiacunchijlla.

Ñahui illajcuna shinami tantiashpalla purinchij.

Chaupi punllapish amsa tutapi shinami ñitcarinchij.

Huañushcacuna amsa ucucunapi caj shinami amsa ucucunapi canchij.

11Tucui ñucanchijmi osocuna shina huacarinchij.

Palomacuna shinami llaquinayajta huacanchij.

Cashcata ruranata shuyajpipish mana tiyanchu.

Quishpirinata shuyajpipish, ashtahuanpish ñucanchijmanta carupimari.

12Ñucanchij canta c'ariyashcacunamari cambaj ñaupajpica mirarishca.

Ñucanchij juchacunallatajmi ñucanchij juchayuj cashcataca ricuchin.

Ñucanchij millaita rurashcacunaca ñucanchijllahuantajmari.

Ñucanchij juchallishcacunataca allimi rijsinchij.

13Mandaj Diostamari c'ariyashcanchij, mana rijsishca shinami tucushcanchij, ñucanchij Taita Diosmanca huashatamari ricuchishcanchij.

Ashtahuan huashalla llaquichinatami yuyarircanchij.

Ñucanchij shungupi llullanata chichushcatami rimarcanchij.

14Chaimantami ñucanchij mana pandashpa mandanaca huashaman tigrarishca.

Cashcata ruraj canaca carumanmi saquirishca.

Mana llulla canaca plazapi mandajcunapitajmi ñitcarishca.

Mana pandashpa mandaj canamanca mana chayai tucuncunachu.

15Mana llullaj canaca jarcarishcami.

Millaita ruranamanta anchurijtaca prezurcacunami.

Cashcata rurashpa mandanata chingachijta ricushpami, Mandaj Diospaj ñahuipica mana pai munashca ricurirca.

16Chaita ruracujpipish pi mana jarcaj tiyajta ricushpami Mandaj Diosca mancharirca.

Chaimantami Mandaj Diosca paipaj quiquin maquihuan quishpichingapaj shamunga.

Pai cashcata rurashcami paica cashcata ruraj cashcata ricuchinga.

17Chaimi paica pechopi fierro churanata churarishca shina cashcata ruranata churarirca.

Cascota umapi churarij shinaca quishpichijtaj cashcatami churarirca.

Paita mana cazushcamanta llaquichina cashcata ricuchij churanatami churarirca.

Jatunta p'iñarishpa llaquichina yuyaihuan huañucuj cashcata ricuchij jahua churanahuanmi pillurirca.

18Chashnami paita p'iñajcunataca paicuna ima shinalla rurashca shinallataj llaquichingapaj jatunta p'iñarishca canga.

Chashnami paita p'iñajcunamanca paicuna japina cashca shinallataj cunga.

Mama cucha c'uchupi causajcunamanpish paicuna japina cashca shinallatajmi cunga.

19Paica Mandaj Dios p'ucujpica jatun yacu huajiashpa shamuj shinami shamunga.

Chaipica Mandaj Diospaj shutitaca inti huashicunmanta callarishpami manchangacuna.

Inti llujshin ladomanta callarishpami pai sumaj cashcataca alli ningacuna.

20“Quishpichijca, Sionmanmi shamunga.

Jacobpaj huahuacuna millaita ruracushcamanta cutirijcunata quishpichingapajmi shamunga” ninmi Mandaj Diosca.

21“Paicunaman ñuca ari nishcata ricuchinaca caimi canga ninmi Mandaj Diosca.

Ñuca Espirituta paicunapi churajpi, ñuca shimita paicunapaj shimipi churajpica, canmantaca chaicunaca manataj anchungachu.

Cambaj huahua huahuacunamantapish manataj anchungachu.

Cambaj huahuacunapaj huahua huahuacunamantapish manataj anchungachu.

Chaicunaca cunanmanta huiñaicama manataj anchungachu” ninmi Mandaj Diosca.