JOSUÉ 9 - Quichua Chimborazo Bible

Gabaón pueblopi causajcuna israelcunata umashcami

1Jordanmanta cai ladoman caj llajtacunapica, urcucunapi caj llajtacunapipish, pambacunapi caj llajtacunapipish, mama cucha c'uchupi caj llajtacunapipish Libanocamami Heteocunapish, amorreocunapish, cananeocunapish, ferezeocunapish, heveocunapish, jebuseocunapish causancuna. Chai llajtacunata jatun mandajcunami israelcuna Jericó pueblota, Hai pueblota imallata rurashcata yachaj chayashpaca tucuicuna tandanacushpa,

2Josuehuanpish israelcunahuanpish macanacungapaj allichirircacuna.

3Gabaón llajtapi causaj heveocunapish Jericopi causajcunata, Hai pueblopi causajcunata Josué ima shinalla chingachishcatami yachaj chayarcacuna. Chaimantami Josuehuanca mana macanacushun nishpa,

4paicunaca jatun mandajpaj randi cachashcacuna tucushpa rishunchij nishpa Josuepajmanca cashna rircacuna. Paya sacocunata, vinotapish llachapashcalla paya capachucunapi burrocunaman apachishpami rircacuna.

5Shinallataj churanacunatapish, pargatecunatapish llachapashca paya payata churashpami rircacuna. Ñanpi micuna tandatapish chaquishpa p'ulasyashcatami aparcacuna.

6Gilgalpi Josuepish israelcunapish causacun carpa huasicunaman chayashpaca:

–Ñucanchijmi yallitaj caru llajtamanta shamunchij. Cunanca ñucanchijhuan shuj ruranata ari nihuaichij– nircacunami.

7Chaimi israelcunaca heveocunataca:

–Ñucanchij c'uchullapi causajcunallataj canguichijllatajmari. ¿Maitataj cancunahuanca imata ari ninacushunri?– nircacuna.

8Heveocunaca Josuetaca:

–Ñucanchijca cancunapajta rurajcunami cashun ninchij– nijpimi Josueca:

–Cancunaca ¿picunataj canguichij? ¿Maimantataj shamunguichij?– nirca.

9Chaimi paicunaca:

–Cambajta ruraj ñucanchijca yallitaj caru llajtamantami shamurcanchij. Cancunata Mandaj Diosca tucuita rurai tucuj jatun cashcata, Egiptopi imallata rurashcatami yacharcanchij.

10Jordán jatun yacu ch'imbanijpi caj Hesbón pueblopi causaj amorreocunata jatun mandaj Sehontapish, Basán llajtapi causaj amorreocunata jatun mandaj Ogtapish imallata rurashcatami yacharcanchij. Chai jatun mandajca Astarot pueblopimi causarca.

11Chaimantami ñucanchij llajtapi causaj cunaj yuyajcunapish, chaipi causajcunapish cashna nircacuna: Ñanpi micunapaj micunata apashpa, paicunata tupanaman richij. Paicunapajman chayashpaca: Ñucanchijca cancunapajta rurajcunami cashun ninchij. Ñucanchijhuan shuj ruranata ari nihuaichij ninguichij nishpami cacharcacuna.

12Ñucanchij llajtamanta cancunata mashcanaman llujshimui punllaca, cai ñucanchij tandataca cunanlla cusashca rupajlla tandatami apamurcanchij. Cunanca tucui chaquishpa ña p'ulasyashcapishmari.

13Vinotapish mushuj capachucunapimi jundachimurcanchij. Cunanca payayashpa ñami lliquirin. Churanacunatapish, pargatecunatapish mushujtami churarimurcanchij. Yallitaj carumanta shamushpami, ña tucui payayashcahuan chayamunchij– nircacunami.

14Israelcunaca chai runacuna chashna ricuchijpica, Mandaj Diosta mana tapushpa chasquircallacunami.

15Chashnami Josueca, heveocunahuanca sumajta causanata ari ninacurca. Israelcunata pushajcunapish, Josué nishca shinallatajmi ari nircacuna.

16Ari ninacushcamanta quimsa punllapimi, israelcunaca paicunapajman shamuj runacunaca paicuna causacun c'uchulla llajta Gabaón pueblopi causajcunallataj cashcata yachaj chayarcacuna.

17Chaita yachashpa paicunata mashcanaman rishpaca, quimsa punllapimi chai runacuna causacun pueblocunaman chayarcacuna. Chai runacunaca Gabaón, Cafira, Beerot, Quiriat-jearim pueblocunamantami cashca carca.

18Israelcunaca chai pueblocunaman chayashpapish, israelcunata mandajcuna Mandaj Diospaj shutipi mana huañuchishunchu nishpa ari ninacushcamantami mana huañuchircacuna.

Chaimantami tucui israelcuna paicunata mandajcunata juchachishpa rimarcacuna.

19Chaimi israelcunata mandajcunaca:

–Ñucanchijca Mandaj Diospaj shutipimari manataj huañuchishunchu nishpa ari nircanchij. Chaimantami chai runacunataca mana imata rurai tucunchij.

20Paicunataca mana huañuchinachu canchij. Mana huañuchishunchu nishca jahua huañuchijpica, Mandaj Diosca ñucanchijhuanmi p'iñaringa– nircacuna.

21Israelcunata mandajcunaca, paicuna ari nishcata pajtachishpami, Gabaón runacunataca ama huañuchinguichijchu nishpa israelcunataca mandarca. Ashtahuanpish paicunataca tucui israelcunapaj yacuta, yantata ashtajcuna cachunmi churarca.

22Josueca Gabaón runacunata cayashpami:

–¿Ima nishpataj cancunaca cai c'uchulla llajtallapitaj causajcuna cashca jahua caru llajtamantami shamunchij nishpa ñucanchijmanca llullarcanguichij? nishpa tapurca.

23Chaimanta cunan cancunaca tucui cancunapaj causaipi ñucanchijpajta rurajcuna cachun Dios llaquichishcacunami canguichij. Yantacunata p'itishpa, yacuta ñucanchij Diospaj huasiman ashtashpami causanguichij– nircami.

24Chaimi paicunaca Josuemanca:

–Cancunata Mandaj Diosca paipajta ruraj Moisestaca cancunamanmi cai llajtacunata cuni. Cancunaca cai llajtapi causajcunataca tucuita chingachichij nishcata cancunapajta ruraj ñucanchij yachaj chayashpami, ñucanchijta huañuchinata manchashcamanta chashna nircanchij.

25Cunanca cancunapaj maquipimi canchij. Cancunapaj ima shina ashtahuan alli canata rurapaichijlla– nircacunami.

26Chashnami Josueca, Gabaón runacunata israelcuna huañuchichunca mana saquirca.

27Chai punllallatajmi Josueca, chai runacunataca tucui israelcunapaj, Mandaj Diospaj huasipaj yantata, yacuta ashtajcuna cachun churarca. Mandaj Dios maipipish paita yuyarinapaj cachun agllashpa ricuchijpica, chaipi paipaj altarman yantata yacuta ashtajcunami tucurcacuna. Gabaonitacunaca, cunan punllacamami chaillatataj rurashpa causancuna.