1 JUAN 5 - Quichua Chimborazo Bible

Jesusta crishpami cai pachataca mishana

1Jesustaca Cristo cashcata maijanpish crijca, Diosmanta huacharishcami. Diosta maijanpish c'uyajca, paipaj huahuacunatapish c'uyanmi.

2Pai mandashcacunata cazushpa, paipaj huahuacunata c'uyashpami Diosta c'uyacushcataca yachanchij.

3Diosta c'uyacushcataca pai mandashcacunata cazushpami ricuchina. Pai mandashcacunata cazunaca mana sinchichu.

4Diosmanta maijanpish huacharishca cajca, cai pachapi millaita ruranataca mishanmi. Cai pachapi millaita ruranataca, Jesusta crishcami mishachin.

5¿Pitaj cai pachapi millaita ruranataca mishan? Jesusca Diospaj Churi cashcatataj crijmi mishan.

Jesucristomantaca Diospaj Espiritumi huillacun

6Jesucristo shamushcataca yacumi yahuarmi ricuchin. Mana yacullachu ricuchin, ashtahuanpish yacupish yahuarpishmi ricuchin. Diospaj Espiritupish chaitami ricuchin. Espirituca mana llullajmi.

7Jahua pachapica cai quimsami huillacun. Paicunaca: Yaya, Rimai Shuti, Jucha Illaj Espiritumi. Cai quimsaca shujllami.

8Cai pachapipish quimsami huillacuncuna. Chaicunaca: Espíritu, yacu, yahuarmi. Chai quimsandijmi chaillatataj huillancuna.

9Gentecuna huillashcata chasquishpaca, Dios paipaj Churimanta huillashcatacarin chaitapish yallimari chasquina canchij.

10Diospaj Churipi maijanpish crijca, pai quiquinllapitajmi huillajtaca charin. Diosta maijanpish mana crijca, paitaca llullatami ruran. Paipaj Churimanta Dios huillashcatami mana crishca.

11Chai huillashcacunaca caimi: Diosca ñucanchijmanca, huiñai causaitami cushca. Chai causaica, paipaj Churipimi.

12Diospaj Churihuan maijanpish shujlla cajca, causaitami charin. Diospaj Churihuan maijanpish mana shujlla cajca, causaitaca mana charinchu.

13Caicunataca Diospaj Churipi crishpa pai yuyailla cajcunaca huiñai causaita ña charishcata yachachunmi quillcani.

14Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij.

15Paica ñucanchij ima mañashcatapish uyajlla cashcata yachashpami, imata mañashcatapish ña charina cashcatataj yachanchij.

16Maijan huauqui mana huañuiman apaj juchata ruracujta ricushpaca, paimanta Diosta mañachun. Pai mana huañuiman apaj juchata rurashca cajpica, Diosca causaita cungami. Huañuiman apaj juchapish tiyanmi. Chaimantaca mana mañachun ninichu.

17Tucui imapish millaita ruranaca juchami. Shina cajpipish huañuiman mana apaj juchapish tiyanmi.

18Diosmanta maijanpish huacharishca cajca, juchata mana rurashpa catij cashcataca yachanchijmi. Paitaca Diospaj huahua cajpimi huaquichin. Diabloca paipica mana tuparinchu.

19Ñucanchijca Diospaj huahuacuna cashcatami yachanchij. Cai pachapi millaita rurajcunaca diablopaj ucupimi.

20Ashtahuanpish Diospaj Churi shamushcatami yachanchij. Paimari mana llullaj Diosta rijsi tucunata curca. Chaimantami paipaj mana llullaj Churi Jesucristohuan shujlla canchij. Paimi mana llullaj Dios, huiñai causaitapish cuj.

21Huahuacuna, rurashcalla dioscunataca amataj adoranguichijchu. Chashna cachun.