NAHUM 3 - Quichua Chimborazo Bible

1Nínive pueblolla, canca huañuchina, llullana, shuhuana, quichunataca manataj saquinguichu. Chashna millai cashcamantaca ¡aij imachari tucungui!

2Anguhuan azotishca, carreta ruedacuna c'ulun nishcamari uyarin. Caballocuna callpamucuj shamuncuna, carretacuna saltashpa c'ulun nicujmari uyarin.

3Caballocunapi tiyarishcamari shamuncuna, espadacunapish, lanzacunapish achij nicunmari, mana yupaipaj achcacunami huañungacuna. Chai huañushcacunallapitajmi ñitcarishpa urmangacuna.

4Huainayaj huarmi shina sumaj ricurishpami, shujtajcunahuan yallitaj huainayarcangui, brujianata alli yachachijmi carcangui. Llajtacunapi causajcunatapish huainayachishpa, brujiashpami urmachircangui. Chashna mana allita rurashcamantami, chai llaquicunaca japinga.

5Tucuita Mandaj Diosca cashnami nin: “Riqui Nínive, cantaca llaquichigrinimi. Cambaj churanataca huichi llatanashpami, ñahuita tapachisha. Shujtaj llajtacunapaj ñaupajpimi lluchullata shayachisha. Canta pingachishcataca, llajtata jatun mandajcunamanmi ricuchisha.

6Cambaj jahuapica millanana mapatami shitasha. Chai mapahuanmi cantaca tapachisha, jatun mapata shinami cantaca p'iñangacuna.

7Canta ricujcunaca canmanta anchuringacunami. Ashtahuanpish paicunaca: Niniveca llaquinayajmari tucushca ¿pitaj paitaca llaquingari? ¿Maipitaj canta cushichijcunataca mashcashari? ningacunami.

8Nínive, ¿canca Nilo jatun yacu c'uchupi tiyaj Tebas pueblotapish yallimi cani yuyanguichu? ¿Chai pueblo shina yacucunahuan muyundijta muyunchishcachu cangui? Chai pueblopaj macanacuna baluarte shinaca, mama cuchami carca, jarcaj jatun pirca shinaca yacucunami carca.

9Etiopía llajtaca paita pacajmi carca. Egiptopi causajcunapish cuidanataca manataj saquinchu. Fut llajtapi, Libia llajtapi causajcunapish paita ayudajcunami carca.

10Chashna cajpipish, paitaca prezumi aparcacuna. Paipaj huahuacunatapish, ñan esquinacunapi japishpami patapi huajtarcacuna. C'aricunatapish, suerteta rurashpami aparcacuna. Jatun nishcacunatapish, cadenacunahuan huatashpami prezu aparcacuna.

11Cantapish machachingami, huichcashpami churangacuna. Canta p'iñajcuna llaquichinaman shamujpica, canpish maipi miticunata mashcanguimi.

12Muyundij pircacunaca, alli granushca higo yura shinami canga. Micusha nicujcuna higo yurata cuyuchijpi, higocuna paicunapaj shimipitaj urmaj shinami urmangacuna.

13Riqui, cambaj soldadocunaca huarmicuna shinallami canga. Cambaj pueblopi tiyaj pungucunaca canta p'iñajcuna yaicuchun tucui pascaringallami. Fierro aldabacunatapish ninami tucuita rupachinga.

14Macanacui punllapajca yacuta ashtangui. Muyundij pircacunataca ashtahuan allichiyari. Lodota sarushpa, ladrillota rurangui. Cambaj hornota alli allichiyari.

15Chaipimi ninapi tucui rupangui. Cantaca espadahuanmi huañuchingacuna. Pulgón c'urucuna q'uihuata tucuchij shinami tucuchingacuna. Canca langosta c'urucuna shinapish, p'ichachaucuna shinapish mirariyari.

16Canca c'atujcunata, randijcunataca jahua pachapi tiyaj luzerocunatapish yallitami mirachircangui. Cantaca langosta c'urumi mirga mirgata rurashpa micurca. Chai q'uipaca callpashpami rirca.

17Langostacunaca p'uyu shina amsayashpa shamushpami, chiri punllapica pirca jahuapi tiyarincuna. Ashtahuanpish inti shamujpica rinllacunami. Paicuna maipi causashcatapish pi mana yachanchu. Chai shinallatajmi jatun mandajcunapish chingarinllacuna.

18Asiria llajtata jatun mandajlla, cambaj michijcunaca dormicuncunami. Cambaj soldadocunaca samaricuncunami. Cambaj llajtapi causajcunaca urcucunamanmi caita chaita rincuna, paicunata tandachijca pi mana tiyanchu.

19P'aquirishcata alliyachinapaj jambica mana tiyanchu. Cambaj chugrica, mana jambipajmi. Canca tucuicunatami llaquichishpa causarcangui. Chaimanta can llaqui tucushcata uyajcunaca, tucuicunami maquicunata huajtangacuna” ninmi.