PROVERBIOS 22 - Quichua Chimborazo Bible

1Alli nishca canaca jatun charij

canatapish yallimari.

Tucuicuna rijsishca alli runa canaca

cullquita, curita charishcatapish yallimari.

2Charij runahuan huajcha runahuan

ishquimi purin.

Mandaj Diosllatajmi ishquitataj rurashca.

3Alli yuyaiyuj runaca, ima llaqui japina

cajpica anchurinmi.

Ashtahuanpish yachai illaj runaca,

quiquin chaquihuan llaquipi yaicunllami.

4Mandaj Diosta manchashpa mana jatun

tucujcunaca charijyancunami.

Alli nishca canatapish, sumaj

causaitapishmi japincuna.

5Millaita ruraj runapaj ñanpica

cashacunapish, tsagnarinacunapishmi tiyan.

Quiquin causaita cuidajca, chai

ñanmanta anchurinmi.

6Cambaj huahuataca uchilla cajpiraj,

alli yachachingui.

Chashna yachachijpica, yuyajyashpapish

manataj cungaringachu.

7Charij runaca, huajchacunapaj

jatun mandajmi.

Cullquita surcujcunapish cullquiyujpajta

rurajmi tucun.

8Mana allita tarpujca, llaquicunatami

tandanga.

Manchanayajta jatun tucushpa causacushcataca,

tucuchishca cangami.

9Llaquishpataj huajchaman carajmanca,

allicunatami cunga.

10Mana cazushpa asij runataca,

llujshichishpa cachailla.

Pai rijpica p'iñanacushpa

rimanacuipish tucuringami.

Pingaipi churajpish illangami.

11Shungupi ima millaita mana yuyashpa,

sumajta rimaj runataca, jatun mandajpish

c'uyashpa paihuan apanacungami.

12Mandaj Diosca alli yachana

tiyachunmi ricuracun.

Ashtahuanpish mana cazujcuna imata

ruracujtaca pandachinllami.

13Q'uilla runaca, imata mana

rurangaraicullami: “Ñanpi león

chapacunca, ñucata japishpa

huañuchingamari” nin.

14Huainayaj millai huarmi rimashca

shimicunaca, urmana jatun jutcu

shinami.

Mandaj Dios p'iñashcacunami chai

huarmihuan juchapi urmancuna.

15Huambracunapaj shungupica, rumi shungu

canaca aichayashpa tiyanllami.

Shina cajpipish anguhuan macajpica,

chai yuyaicunata cungarinmi.

16Quiquinllataj charijyangapaj cashpapish,

charijcunaman tigra cungapaj cashpapish,

huajchacunata quichujca huajchallatajmi

saquiringa.

Yachajcuna cunashca shimicunami

17Yachaisapacuna yachachishca shimicunataca,

tucui yuyaihuan uyangui.

Ñuca cushca alli yachaitapish, tucui shunguta churashpa yachangui.

18Cai shimicunata shungupi aparishpaca, mishquichij shinami cushicungui.

Shujtajcunaman yachachingapajpish, shimi

jahuami charingui.

19Cai shimicunataca Mandaj Diospi shunguta churachunmi canmanpish

cunantaj yachachini.

20Cunashpapish, alli yachanata

cushpapish ¿manachu quimsa cutin quillcarcani imatagari?

21Cai shimicunataca mana llulla

cashcata yachachunpish, cai mana llullaj shimicunataca, canta cachajcunaman tigra huillagrichunpishmi

quillcarcani.

22Huajcha runataca huajcha cashcamanta, ama imatapish quichunguichu.

Imahuan mana mitsaripaj cajta ricushpa, mandajcunapajman apashpa ama llaquichinguichu.

23Paicunata quichujcunataca, Mandaj Diosmari paicunata mitsashpa causaita quichunga.

24Jahualla p'iñarijhuanca, amataj apanacunguichu.

Chashna p'iñarijllahuanca, ama

tandalla puringuichu.

25Ñataj paicunahuan tandanacushpa,

paicuna shina purinata yachanguiman.

Chaita yachashpaca canllatajmari huascata cungapi churaringui.

26Ama shujtajcuna shina pipajpish garante tucushpa, canllataj huataringuichu.

27¿Maitataj shujtajllamantaca cullquita mana cui tucushpa, can dormina camandij quichuchinguiyari?

28Cambaj allpa muyundijpi, ñaupa cambaj yayacuna churashca rumicunataca

ama caishujpaj allpaman tanganguichu.

29¿Imata ruranatapish alli yachaj runa maipi cajta ricushcanguichu?

Paica yanga runacunapajtaca mana ruranchu, ashtahuanpish jatun mandajpajmari imatapish ruran.