NÚMEROS 28 - Quichua Chimborazo Bible

Taita Diosman punllanta cunami(Ex 29.38-46)

1Mandaj Dios Moisesta mandashpaca cashnami nirca:

2Israelcunata mandashpaca cashna ni: Ñucaman cuna cashcatapish, ñucapaj micuna cachun cusashpa cunatapish ñuca mandashca punllapitaj cuchun mandai. Chai cushcacunaca ñucapajca mishquijlla ashnacujmi canga.

3Paicunataca Mandaj Diosman cushpa rupachinataca caicunata cuchun mandai: Shuj huatata charij ishqui malta c'ari ovejata punllanta cuchun. Chaicunaca ima mana tucushca cachun. Chai shina cushpa tucui rupachinataca punllanta cucuchunlla.

4Shuj malta c'ari ovejataca tutamanta cuchun, caishuj malta c'ari ovejataca chishita cuchun.

5Chaquishca granotaca shuj efata chungapi chaupishca shuj parte ashtahuan alli cutata, olivasta tacashca shuj hin aceiteta chuscupi chaupishca shuj parte aceitehuan chapushcahuan cuchun.

6Mandaj Diospaj mishquijlla ashnacuj cachun cushpa Mandaj Diosman punllanta cunataca, Sinaí urcupi mandashcami.

7Tallina vinotaca shuj hinta chuscupi chaupishca, shuj parteta cada malta c'ari ovejahuan cuchun. Ashtahuan alli vinotaca Diospajlla ucupi Mandaj Diospaj ñaupajpi tallichun.

8Caishuj malta c'ari ovejataca chishita cuchun. Tutamanta imallahuan cushca shinallataj cuchun. Tallina vinotapish tutamanta cushca shinallataj cuchun. Chai cushcacunaca Mandaj Diospajca mishquijlla ashnacujmi canga.

Taita Diosman samana punllacunapi cunami

9Samana punllapica, shuj huatayuj ishqui c'ari ovejata cuchun. Chaicunaca ima mana tucushca cachun. Chaquishca granotaca shuj efata chungapi chaupishca ishqui parte ashtahuan alli cutata aceitehuan chapushcahuan cuchun. Tallina vinotapish cuchun.

10Cushpa tucui rupachinata, tallina vinota, punllanta cucushca jahuapish samana punllapi cushpa tucui rupachinataca cada samana punllapi cucuchunlla.

Taita Diosman quillanta cunami

11Quilla callari punta punllapica ishqui bizita, shuj carnerota, shuj huatayuj canchis c'ari ovejata Mandaj Diosman cushpa tucui rupachichun. Chai animalcunaca ima mana tucushca cachun.

12Bizicunahuanca cada bizihuan shuj efata chungapi chaupishca quimsa parte ashtahuan alli cutata aceitehuan chapushcahuan cuchun. Carnerocunahuanca cada carnerohuan shuj efata chungapi chaupishca, ishqui parte ashtahuan alli cutata aceitehuan chapushcahuan cuchun.

13Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cuchun. Chai cushcacunaca Mandaj Diospajca mishquijlla ashnacujmi canga.

14Tallina vinotaca cashna cuchun: Bizicunahuanca cada bizihuan shuj hinta ishquipi chaupishca shuj parte vinohuan cuchun. Carnerocunahuanca cada carnerohuan shuj hinta quimsapi chaupishca shuj parte vinohuan cuchun. Shuj huatayuj c'ari ovejacunahuanca cada ovejahuan shuj hinta chuscupi chaupishca shuj parte vinohuan cuchun. Mandaj Diosman cushpa tucui rupachinataca, quilla callari punllapica, cada quilla huata jundatataj cucuchunlla.

15Cushpa tucui rupachinata, tallina vinota punllanta cucushca jahuapish, juchamanta Mandaj Diosman cunataca shuj chivota cuchun.

Taita Diosman jatun fiestacunapi cunami(Lv 23.1-44)

16Mandaj Diospaj Pascua punllaca huatapaj punta quilla, chai quillapaj chunga chuscu punllapimi canga.

17Chai quillapaj chunga pichca punllapica jatun fiesta cachun. Chaipica canchis punllacunata levadura illajlla tandata micunguichij.

18Fiesta callari punta punllapica tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

19Chai punllacunapi Mandaj Diosman cushpa rupachinataca ishqui bizita, shuj carnerota, shuj huatayuj canchis c'ari ovejacunata cushpa tucui rupachinguichij. Chai animalcunaca ima mana tucushca cachun.

20Bizicunahuanca cada bizihuan shuj efata chungapi chaupishca quimsa parte alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

21Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

22Juchallishcamanta Mandaj Dioshuan alli tucungapajca shuj chivota cunguichij.

23Tucui caicunataca cada tutamanta punllanta cushpa tucui rupachicushca jahuapish cunguichij.

24Chai fiestapica, Mandaj Diospaj mishquijllata ashnacuj cachunca micunatapish, cushpa rupachinacunatapish, canchis punllapitaj chai shinallataj ruranguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

25Fiesta tucuri canchis punllapica, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

Punta p'ucushca granocunata Diosman cunami(Lv 23.9-22)

26Punta p'ucushca mushuj granocunata Mandaj Diosman cucui semana fiesta punllapipish, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

27Mandaj Diospaj mishquijlla ashnacuj cachun cushpa tucui rupachinataca, ishqui bizita, shuj carnerota, shuj huatayuj canchis c'ari ovejacunata cunguichij.

28Chaicunahuan cuna cutataca bizicunahuanca cada bizihuan shuj efata chungapi chaupishca, quimsa parte ashtahuan alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

29Shuj huatayuj c'ari ovejacunahuanca, cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

30Cancunapaj juchacunamantaca shuj chivota cunguichij.

31Cushpa tucui rupachinata, tallina vinotapish punllanta cuna cashcataca chai punllacunapipish ama saquinguichijchu. Chai animalcunaca ima mana tucushca cachun.