1 PEDRO 1 - Quichua Chimborazo Bible

Allillachu canguichij nishcami

1Jesucristopaj apóstol Pedromi, quiquin llajtamanta llujshishpa caita chaita rishpa Pontopi, Galaciapi, Capadociapi, Asiapi, Bitiniapi causacujcunaman quillcani.

2Dios Yayaca paipaj yachaihuan ñaupaman yuyarishca shina agllashcami canguichij. Paita cazuchunmi, Jesucristopaj yahuarhuan maillashpa paipaj Espirituhuan jucha illajta rurashcacuna canguichij. Mana c'uyaipajta c'uyaj canata, sumaj causaitapish ashtahuan mirachishca cachun ninimi.

Huiñaita causagrina yuyailla canami

3Ñucanchijta Mandaj Jesucristopaj Dios Yayataca, alli nishca cachun. Paica, ñucanchijta jatunta llaquij cashcamantami huañushcacunapaj chaupimanta Jesucristota causachishpa, huiñaita causagrina yuyailla cachun, ñucanchijtaca cutin huacharichirca.

4Mana ismuj, mana mapayaj, mana chingarij herenciata jahua pachapi huaquichishcata cancuna japij cachunmi chashna rurarca.

5Cancunaca crishcamantami Diospaj maquipi huaquichishca canguichij. Pai quishpichishcata tucuri punllapi ricuchingacamami chashna huaquichishca canguichij.

6Chaimanta cunanca, crijtaj cashcata ricuna ch'ican ch'ican llaquicunahuan ashacama llaquichishca cashpapish, cancunaca achcatami cushicucunguichij.

7Cancunata crijtaj cashcata ricushcaca, sumaj curitapish ashtahuan yallimari. (Chingarijlla curitapish ninapi rupachishpami, alli cashcata mana alli cashcataca ricuna) Llaquita apashpaca, shamuj punllapi Jesucristo ricurijpica alabashca, alli nishca, sumajyachishcami canguichij.

8Cancunaca mana ricushpapish, Jesucristotaca c'uyanguichijmi. Cunan mana ricushpapish paipi crishcamantami, mana huillai tucuipaj jatun sumaj cushicuihuan cancunaca cushicucunguichij.

9Crishcamanta cancunapaj alma quishpichishca cashcamantami, chashna cushicucunguichij.

10Mana c'uyaipajta c'uyashpalla cancunata quishpichina punlla shamunataca Profetacunami huillarcacuna. Chashna huillacushpapish Dios ima shina quishpichinata rurashcataca callarishpa tapushpami yachashun yuyacurcallacuna.

11Cristo ima shina llaquita apanata, pai llaquita apashca q'uipa jatunyachishca canatapish paicunapi caj Cristopaj Espiritumi ñaupaman manaraj chashna tucujpi, profetacunamanca yachana yuyaita cushca. Chashna yachana yuyaita cujpimi ¿pitaj chai Cristoca canga? ¿ima punllataj chashnaca tucunga? nishpa yuyacushcallacuna.

12Profetacuna chashna yuyacujpipish Diosllatajmi paicuna yachashun nicushcaca mana paicunapaj cashcata, ashtahuanpish ñucanchijpaj cashcata ricuchishca. Chai profetacuna huillacushcataca jahua pachamanta cachashca Jucha Illaj Espíritu huillachijpimi, alli huillaita cancunaman cunan huillacuncuna. Caicunataca jahua pacha angelcunapishmi yachaiman yuyacuncuna.

Jucha illajlla causachun cayashcami

13Chaimanta alli yuyaihuan chumbillirishca shina caichij, alli yachaj caichij. Jesucristo shamujpi mana c'uyaipajta c'uyashcata chasquishcaman chayana yuyailla caichij.

14Alli cazuj huahuacuna shina caichij. Ñaupa manaraj yachashpa ruracushca mapa munaicunataca ama ruraichijchu.

15Ashtahuanpish cancunata agllajca, ima jucha illajllami. Shinallataj cancunapish tucui causaipi ima jucha illajlla caichij.

16Quillcachishcapica: “Ñucaca ima jucha illajmi cani, cancunapish ima jucha illajlla caichij” ninmi.

17Tucui imalla rurashcata, mana ñahuita ricushpalla ricuchij Diosta Yaya nishpa mañajcuna cashpaca, cai pachapi pasacujlla shina causashcacamaca tucuipi paita manchashpa causaichigari.

18(Cancunapaj ñaupa yayacunamanta chasquishca yangalla causaimantaca Diosmari cancunataca llujshichirca) Mana ismuj curihuan, cullquihuanchu llujshichirca, chaitaca yachanguichijmi.

19Ashtahuanpish ima mapa illajlla, chuya malta oveja shina, Cristopaj sumaj yahuarhuanmi llujshichishcacuna canguichij.

20Paitaca manaraj cai pachata rurashpami, huañunami nishca carca. Chaitaca cancunata c'uyashcamantami, cai punllacunapi ricuchishca.

21Huañushcacunapaj chaupimanta causachishpa jatunyachij Diostaca Jesucristomantami crircanguichij. Cancuna Diosta crishpa pai yuyailla cachunmi chashna rurarca.

22Espíritu yuyaita cujpimi, mana llullata huillashcataca cazushcanguichij. Ama nij tucushpalla huauquindijcuna shina c'uyanacunapajmi cancunapaj almataca chuyayachishcacuna canguichij. Chaimanta caishuj chaishuj tucui shunguhuan mapa yuyai illajlla c'uyanacuichij.

23Cancunaca huañujlla yayamantaca, mana cutin huacharishcanguichijchu. Ashtahuanpish huiñaita causaj, mana tucurij Diospaj Shimita uyashcamantaca, mana huañuj yayamantami huacharishcanguichij.

24Quillcachishcapica:

“Tucui gentecunaca, q'uihua shinallami.

Paicuna sumaj cashcapish, q'uihua sisa shinallami.

Quihua chaquirijpica, sisapish urmanllami.

25Ashtahuanpish Jatun Diospaj shimipi nishcaca huiñaita pajtacungallami” ninmi.

Chai Shimimantami alli huillaitaca cancunaman huillacun.