ROMANOS 9 - Quichua Chimborazo Bible

Israelcunapuramantapish mana israelcunapuramantapish Diosca agllashcami

1Cristomantami ima shina cashcatataj mana llullashpa, ñuca yuyaipi jucha illaj Espíritu yuyachishca shina huillagrini.

2Ñucaca jatun llaquitami charini. Chai nanaica ñuca shungupi caticunllami.

3Aichamanta ñuca familia huauquicunata c'uyashcamantaca, ñucallataj Cristomanta anchushpa, paicunapaj randi llaquichishca caimanchari.

4Paicunaca israelcunami. Paicunataca Diosca quiquin huahuacunatami rurarca. Paicunapurapimi sumaj cashcahuan ricurirca, paicunahuanmi ari ninacurca. Paicunamanmi Mandashcatapish curca, paillata adoranatapish yachachirca, cusha nishcapish paicunapajmi.

5Paicunaca callari yayacunapaj huahua huahuacunami. Aichamantaca paicunapurapimi Cristoca shamurca. Paica tucui ima tiyajcunapaj jahuapi caj Diosmi. Paitaca, huiñai huiñaita alli nishca cachun. Chaica chashnatajmi.

6¿Israelcunaman Dios cusha nishcachu mana pajtashca? Manataj chashnachu, ashtahuanpish israelcunapaj huahua huahuacunamari mana tucuicuna israelcunataj cashca.

7Abrahampaj huahua huahuacuna cashpapish, manamari tucuicuna paipaj huahuacunatajchu. Ashtahuanpish: “Isaacmantami cambaj huahua huahuacunatajca canga” ninmi.

8Cashnami nisha nin: Aicha munaillamanta huahuacunaca, mana Diospaj huahuacunatajchu. Ashtahuanpish Dios cushami nishcamanta huahua huahuacunami, paipaj huahuacunatajca.

9Cushami nishca shimica cashnami: “Shamuj huata cunan shina punllallapitajmi tigramusha. Chaipajca Saraca, shuj churitami charinga” nishcami carca.

10Ashtahuanpish mana chaillachu, Rebecapish ñucanchij yaya Isaacpajtaca, shuj cutinllapimi ishqui churita chichurca.

11Paicuna manaraj huacharijpi allitapish, mana allitapish manaraj rurajpimi, Diosca pai agllasha nishca shina agllarca. (Dios agllanaca mana rurashcacunamanta cashcata ricuchingapaj, ashtahuanpish pai agllasha nishca shina agllana catichunmi chashna rurarca).

12Chaimi Diosca Rebecamanca: “Punta churimi q'uipa churipajta ruranga” nirca.

13Quillcachishcapipish: “Jacobtami c'uyarcani, Esautaca p'iñarcanimi” ninmi.

14Shina cajpica ¿imatataj nishun? ¿Diosca cashcata mana rurajchari? ¡Manataj chashnachu!

15Diosca Moisesmanca: “Ñuca llaquisha nishcatami llaquisha, ñuca alli casha nishcahuanmi alli casha” ninmi.

16Chashna cajpica maijanpish mana pai munashcamantachu, mana pai ima allita rurashcamantachu agllan, ashtahuanpish Dios llaquij cashcallamantami agllan.

17Quillcachishcapica Faraonmanca: “Ñuca poderta canpi ricuchingapaj, ñuca shutipish tucui cai pachapi huillashca cachunmi, cantaca jatun mandajta churarcani” ninmi.

18Chashna cashpami Diosca, maijanta llaquisha nishcataca llaquin, maijanpaj shunguta sinchiyachisha nishpaca sinchiyachin.

19Ashtahuanpish canca: “Shinashpaca ¿ima nishpataj Diosca runacunata juchachin? ¿Pitaj paipaj munaitaca jarcai tucunman carcari?” ninguichari.

20Riqui canca, ¿pitaj canguiyari Diosta chashna rimangapajca? Allpamanta vasoca, paita rurajtaca: “¿Ima nishpataj ñucataca cashna rurarcanguiyari”? ningachu.

21Allpamanta vasota rurajca ¿manachu chai masallamantataj shujtaca allipaj, caishujtaca ima yangapajlla rurai tucun?

22Diospish pai p'iña cashcata, paipaj poderta ricuchisha nicushpapish, p'iñarishpa chingachingapaj rurashca vasocunataca ¿ima nishpataj mana utca chingachishpa shuyacunlla?

23Diosca, pai sumaj canahuan charij cashcataca pai llaquingapaj rurashca vasocunamanmi ricuchisha nirca. Paicunapish paipaj sumaj canapi cachunmi, ñaupaman chashna allichirca.

24Chai allichishca vasocunallatami cayarca. Judiocunapurallamantaca mana cayarcachu, ashtahuanpish mana judiocunapuramantapishmi cayarca. Chaicunaca ñucanchijllatajmi canchij.

25Chashnallatajmi Oseas libropipish nin:

“Mana ñucapaj cajcunataca, ñucapajmi canguichij nishami.

Mana c'uyashcatapish, ñuca c'uyashcami nishami.

26Maipimi Diosca:

“Cancunaca mana ñucapaj cajcunachu canguichij” nirca, chaillapitajmi:

“Causaj Diospaj huahuacuna” nishcacunami canguichij” ninmi.

27Shinallataj Isaiaspish, israelcunamanta huillashpaca: “Israelpaj huahua huahuacunaca, mama cuchapi tiyaj allpa shina achcacuna cashpapish, saquirijcunallami quishpichishca canga.

28Jatun Diosmi cai pachapica, pai llaquichisha nishcataca cashcata rurashcahuan utca tucuchinga” nishcami.

29Isaías ñaupaman nishca shinallatajmi:

“Tucuita Mandaj Jatun Diosca mirarinapaj mana puchuchishca cajpica, Sodoma shinami tucunchijman carca.

Gomorramanpish rijchajmi tucunchijman carca” nishcami.

Crijpi justificashcami

30Shina cajpica ¿imatataj nishun? Mana judiocunaca justificachun mana mashcajcuna cashpapish, justificashca canamanmi chayashca. Chaica crijpimi justifican nisha ninmi.

31Ashtahuanpish israelcunaca, Mandashcapi nishcata rurashpa justificashca canaman chayashun nishpapish mana chayarcacunachu.

32¿Ima nishpashi chashna tucurca? Paicunaca Mandashcapi nishcacunata rurashpalla, justificashca canata mashcashpami, mana crishpa chashna tucurcacuna. Chaimantami paicunaca, ñitcana rumipi ñitcarcacuna.

33Cashnami quillcashca tiyacun:

“Riquichij, ñucaca Sionpimi ñitcachij rumitaca, urmachij jatun rumitaca churani.

Maijanpish paipi crijtaca, mana pingachishcachu canga” ninmi.