JEREMÍAS 28 - Quichua Chimborazo Bible

Hananías shuti llulla huillajmanta

1Jatun mandaj Sedequías, Judá llajtata mandai callarishcaca, chuscu huatallami carca. Chai huatapaj pichca quillapimi, Azurpaj churi Hananías shuti huillajca ñucataca rimarca. Paica Gabaón pueblomantami carca. Paimi ñucataca Mandaj Diospaj huasipi, curacunapaj ñaupajpi tucui chaipi cajcunapaj ñaupajpi cashna nirca:

2–Tucuita Mandaj, israelcunapaj Diosca cashnami nin: Babilonia llajtata jatun mandaj churashca yugotaca p'aquigrinimi.

3Chai Babilonia llajtata jatun mandaj Nabucodonosor cai ñuca huasimanta llujshichishpa, paipaj llajtaman apashca charinacunataca cunanmanta ishqui huatallapimi caiman tigrachimugrini.

4Shinallataj cai Judá llajtamanta Babilonia llajtaman prezu apashcacunatapishmi tigrachimusha. Joacimpaj churi, cai Judá llajtata jatun mandaj Coniastami, tucui caishuj apashcacunandijta tigrachimusha. Ñucatajmi Babilonia llajtata jatun mandaj churashca yugotaca p'aquisha ninmi Mandaj Diosca– nircami.

5Huillaj Hananías chashna nijpica, Dios ima nishcata huillaj Jeremiasca curacunapaj ñaupajpi, tucui chaipi tandanacushcacunapaj ñaupajpimi Mandaj Diospaj huasipica rimarca.

6Dios ima nishcata huillaj Jeremiasca cashnami nirca:

–Chashna cachun, Mandaj Diosca can nishca shina rurashca cachun. Mandaj Diospaj huasimanta apashca charinacunatapish, tucui prezu apashcacunatapish Babilonia llajtamanta utcami caiman tigrachishpa cachangacuna nishpa can huillashcataca, Mandaj Diosca chashnataj rurashpaca allitajchari canmanri.

7Shina cajpipish cunanca cantapish, tucui caipi cajcunatapish ñuca rimashcata uyai.

8Ñaupa huatacunaca, canpish, ñucapish manaraj huacharijpimi, shujtaj huillajcunapish tiyashca. Paicunaca jatun llajtacunapi, achca llajtacunapi jatun macanacuicunapish, llaquicunapish, ungüicunapish tiyanatami huillashcacuna.

9Maijan huillajpish sumaj causai tiyanata huillajpica, pai nishca shinataj pajtajllapimi, Mandaj Diostaj huillachun cachashca cashcaca ricurin– nircami.

10Chashna nijpica huillaj Hananiasca, Dios ima nishcata huillaj Jeremiaspaj cunga tullumanta yugota japishpami p'aquirca.

11Chai q'uipaca Hananiasca, tucui chaipi cajcunapaj ñaupajpimi cashna nirca:

–Mandaj Diosca cashnami nin: Babilonia llajtata jatun mandaj Nabucodonosor churashca yugotaca, tucui llajtacunapaj cungamanta anchuchishpami, cai yugota p'aquishca shina p'aquigrini. Cunanmanta ishqui huatallapimi chaita ruragrini ninmi– nijpica, Jeremiasca rircallami.

12Dios ima nishcata huillaj Jeremiaspaj cunga tullumanta yugota japishpa Hananías p'aquishca q'uipa unillapimi, Mandaj Diosca Jeremiastaca cashna nirca:

13“Ri, Hananiasta cashna nigri: Mandaj Diosca cashnami nin: Caspi yugotaca p'aquinguitajmari. Ashtahuanpish cunanca fierro yugotami rurachigrini ninmi.

14Tucuita Mandaj israelcunapaj Diosca cashnapishmi nin: Babilonia llajtata jatun mandaj Nabucodonosorta servishpa causachunca, tucui llajtacunapaj cunga tullupimi fierro yugota churani. Tucuicunami paita servishpa causangacuna. Sacha animalcunatapishmi, pai munashcata rurachun paipaj maquipi churani ninmi nigri” nircami.

15Chashna mandajpimi, Dios ima nishcata huillaj Jeremiasca, huillaj Hananiastaca cashna nirca:

–Riqui Hananías, cantaca mana Mandaj Dioschu huillanaman cachashca. Canca cai runacunataca can llullashcallapimari shunguta churachingui.

16Chaimanta Mandaj Diostajmi cashna nin: Canca paicunamanca ñucata c'ariyashpa shayarina yuyaitamari cushcangui. Chaimanta cantaca cai pachamanta anchuchigrinimi. Cai huatallatajmi huañungui ninmi– nircami.

17Huillaj Hananiasca, chai huatallatajmi chai huatapaj canchis quillapi huañurca.