1 CORINTIOS 9 - Quichua Chimborazo Bible

Apóstol imallata rurai tucushcami

1¿Manachu apóstol cani? ¿Manachu imatapish ruraipaj cani? ¿Manachu ñucanchijta Mandaj Jesustaca ricurcani? ¿Manachu cancunaca, Mandaj Jesuspajta ñuca trabajashcata ricuchijcuna canguichij?

2Shujtajcunapaj mana apóstol cashpapish, cancunapajca apostoltajmi cani. Cancuna Mandaj Jesuspi shujlla tucushpami ñucaca apóstol cashcata ricuchij selloca canguichij.

3Ñucata juchachijcunamanca, ima shina cashcatami huillasha nini:

4¿Manachu ñucanchijpish micui tucunchij, ubyai tucunchij?

5¿Manachu caishuj apostolcuna shina, Mandaj Jesuspaj huauquicuna shina, Cefas shinallatajpish shuj crij panita ñucanchijpaj huarmi cachun japishpa pushai tucunchij?

6¿Ñucahuan Bernabellahuanchu ñucanchij trabajashcallahuantaj huillacushunlla?

7¿Maijantaj quiquin charishcallahuantaj soldado tucushca? ¿Maijantaj uva chagrata tarpushpaca, p'ucujpi mana micun? ¿Maijan michijtaj paipaj canllamanta lecheta capishpa mana ubyan?

8Caitaca mana ñuca yuyaillamantachu nini. ¿Manachu Mandashcapipish caitaca nin?

9Moisés Mandashcapica, cashnami quillcashca tiyacun: “Trillaj huagrataca ama shimita huatangui” ninmi. ¿Diosca huagracunatachu llaquishca canga?

10¿Manachu ñucanchijta llaquishpa, ñucanchijpajtaj chashna quillcashca canga? Yapujca japina yuyaimi yapun, trillajpish granota chasquina yuyaimi trillan.

11Ñucanchijca Diospajtami cancunapurapica tarpurcanchij. Chaimanta ¿charinacunallata cancunamanta mañashpa tandachinaca chaita yallichu canga?

12Caishuj huillajcuna cancunamanta chasquicujpicarin, ñucanchijcarin chasquinatatajmi charinchij.

Chashna cajpipish ñucanchijca mana mañashcanchijchu. Ashtahuanpish Cristomanta alli huillaita huillacushca ama jarcarichunmi, ñucanchijca tucui llaquita apanchijlla.

13Diospaj huasipi paipajllata trabajajcunaca chaimantami micuncuna, shinallataj altarpi servijcunapish chai altarmantami japincuna. Chaitaca ¿manachu yachanguichij?

14Chashnallatajmi Mandaj Jesusca, alli huillaita huillajcunaca alli huillaimanta causachun mandarca.

15Ashtahuanpish ñucaca, chai japina cashcataca mana japishcanichu. Cancuna ñucaman cuchun nishpapish mana quillcanichu. Ñucata jatunyachinata pi manaraj quichujpi huañunami alli canman.

16Alli huillaita huillashpaca, imamanta mana jatun tucunachu cani. Ashtahuanpish huillanataj cashcamantami huillani. ¡Alli huillaita mana huillashpaca aij ñucalla!

17Chaimanta ñuca munaihuantaj rurashpaca, japina cashcatami charisha. Ashtahuanpish mana ñuca munaihuantaj rurashpaca, rurachun nishpa mingashcallatami pajtachini.

18¿Imataj ñuca japinaca? Cristomanta alli huillaitaca imata mana japishpa huillana, alli huillaimanta ñuca japina cashcahuan pita mana llaquichinami.

19Chaimanta ima shinapish achcacuna quishpirichunmi, pipajta ruraj mana cashpapish, tucuicunapajta ruraj tucurcani.

20Judiocunahuan cashpaca, judiocuna quishpirichunmi, judío shina tucurcani. Mandashca ucupi cajcunahuan cashpaca, paicuna quishpirichunmi, (Mandashca ucupi ñuca mana cashpapish) paicuna shina tucurcani.

21Mandashcata mana charijcunahuanca, paicuna quishpirichunmi (Dios mandashca illaj ñuca mana cashpapish), Mandashca illaj shina tucurcani. (Ashtahuanpish Cristo mandashca ucupimi cani).

22Irquicunata sinchiyachingapajca, irquicunahuanca irquimi tucurcani. Tucuicunahuanmi paicuna ima shina cajpipish, paicuna shina tucurcani. Pipish quishpirichunmi chashna tucurcani.

23Alli huillaita huillangapaj, chai alli huillaita huillashcamanta ñucapish huillajcunahuan japingapajmi chashna rurani.

24Estadiopi callpajcunaca tucuicunami callpantaj, shina cashpapish japina cashcataca shujllami japin. Chaitaca ¿manachu yachanguichij? Chashna japingapajca callpaichijtagari.

25Maijanpish mishanacujca tucuimantami jarcarin. Paicunaca chingarijlla coronata japingapajmi chashna rurancuna. Ashtahuanpish ñucanchijcarin, mana chingarij coronata japingapajmi chashna ruranchij.

26Chashnami ñucaca mishanataj yuyaihuan callpani. Macanacushpapish, mana huairallapi huajtaj shina huajtanichu.

27Ashtahuanpish ñuca cuerpotaca huajtashpatajmi cazuchini. Caishujcunaman huillacushca jahua, ñucallataj ama anchuchishca cangapajmi chashna rurani.