EZEQUIEL 17 - Quichua Chimborazo Bible

Aguilamanta uvamanta yuyachij parlota parlashcamanta

1Mandaj Diosca ñucataca cashnami nirca:

2“Huañujlla aichayuj runa, shuj ricuchinata ricuchishpa, yuyachij parlota israelcunapaj allichi.

3Chaimantaca paicunamanca cashna huillangui: Mandaj Jatun Diosca cashnami nin: Suni jatun alasyuj, tucui laya color plumacunayuj jatun aguilami cedro yura ñahuita Libanomanta apanaman shamurca.

4Chai yura ñahuita p'itishpami, randijcunapaj c'atujcunapaj llajtaman aparca. Chaitaca c'atujcunapaj, randijcunapaj pueblopimi churarca.

5Shinallataj allpapi tarpushca muyutapish alli allpapi tarpungapajmi aparca. Chai muyutaca sauce yurata tarpuj shinami achca yacu c'uchupi tarpurca.

6Chai muyu huiñashpaca, uchijlla manchanayaj p'angasapa uva yurami tucurca. Paipaj ramacunaca, aguilatami ricuracurcacuna. Sapicunapish ashtahuanmi sapiyarca. Chashnami chai uva yurapica, suni ramacuna huiñarca.

7Shinallataj jatun alascunayuj, achca plumacunayuj shujtaj jatun aguilapishmi tiyarca. Chai aguilapaj c'uchumanmi, uva yura sapicunapish, ramacunapish chayarca. Chai uva yurata tarpushca huachupi yacuta cacharichun nishpami, paipaj ladoman tucurca.

8Chai uva yurataca, achca ramacunayuj tucushpa alli granota p'ucuchunmi, achca yacu tiyan c'uchulla alli allpapi tarpushca carca ninmi ningui.

9Cashnapish ningui: Mandaj Jatun Diosca cashnapishmi nin: ¿Chai uva yuraca cushicushpallachu causanga? ¿Manachu paipaj sapicuna p'itirijpica, muyupish chingarishpa tucui chaquiringa? Paipaj verdijlla p'angacunaca anguyashpami, tucui chaquiringa. Paita sapimantataj aisashpa surcungapajca mana tucui fuerzahuan, mana achca runacunahuan chingachishachu.

10Riqui, cai yuraca caipimi tarpushca tiyacun. ¿Cushicushpallachu causanga? Inti llujshinmanta rupaj huaira shamushpa urmachijpica ¿manachu anguyashpa tucui chaquiringa? Verdijlla yura cashpapish, tarpushca huachullapitajmi chaquiringa ninmi ni” nircami.

11Mandaj Diosca ñucataca cashnapishmi nirca:

12“Chai mana cazuj runacunataca cashna ni: ¿Cai ricuchinacunapi imata nisha nishcataca manachu entendinguichij? nishpaca, cashna ningui: Riqui, cai ricuchinapica Babilonia llajtata jatun mandaj Jerusalenman shamushpa, cambaj jatun mandajtapish, paipaj q'uipa mandajcunatapish Babilonia llajtaman prezumi aparca.

13Shinallataj jatun mandajpaj huahua huahuacunapuramanta shuj pushajta japishpami, chai runataca imata ruranatapish pajtachichun ari nichirca. Chaimantaca cai llajtata jatun mandajcunata pushashpa rircallami.

14Jerusalenta mandajcuna ari ninacushcata pajtachishpa causachun nishpami, chashna rurarca. Chaimantami chai puebloca, ña mana ashtahuan mandai tucurca. Llaquichishcallami causarcacuna.

15Ashtahuanpish ari nij runaca paita mana cazushpami, jatun mandajpaj randi shujtaj mandajcunataca Egipto llajtaman cachashpa caballocunatapish achca runacunatapish cuchun mañarca. ¿Chashna rurajca cushicushpachu causanga imashi? ¿Quishpiringachu imashi? Ari nishcata p'aquij runaca ¿quishpiringachu imashi?

16Ñuca, causaj Mandaj Jatun Diostajmi cashna nini: Chai runaca pai ari nishcata yangata rurashpa p'aquishcamantaca, paita mandaj cachun churashca jatun mandaj mandashpa causana huasipimi Babilonia llajtapica huañunga.

17Achcacunata huañuchingapaj allpata montonashcamanta, torrecunata shayachishcamantaca achca runacunayuj cashpapish, achca soldadocunahuan cashpapish faraonca macanacuipica, imata mana rurai tucungachu.

18Maquita cushpa ari nishcata yangata rurashpa p'aquishpa cai tucui mana allicunata rurashcamantaca, manataj quishpiringachu ningui” ninmi.

19Chaimanta Mandaj Jatun Diosca cashnami nin: “Ñucaca causacunimi, ñucahuan ari ninacushcata yangata rurashpa p'aquishcamantaca, paitaca llaquichishatajmi.

20Ñuca linchihuan japishpami, huatashpa prezu apasha. Ñucata mana cazushpa millaita rurashcamantaca, Babilonia llajtaman pushamushpami llaquichisha.

21Shinallataj callpashpa miticunata yachaj soldadocunapish, tucui caishuj paipaj soldadocunapish espadapimi huañungacuna. Tucui saquirijcunaca, caita chaitami ringacuna. Chashna rurajta ricushpami, Mandaj Dios ñucataj rimashcataca yachanguichij” ninmi.

22Mandaj Jatun Diosca cashnami nin: “Jatun cedro yura retoñacuj ñahuita p'itishpami, sumaj jatun urcu jahuapi tarpusha.

23Chai caspitaca Israel llajtapi tiyaj jatun urcupimi tarpusha. Chaica ramacunayuj tucushpaca, granota p'ucushpa sumaj cedro yurami tucunga. Chai yurapica, tucui laya pajarocunami causanga, llandujlla rama ucupimi causangacuna.

24Jatun yurata urmachishcata, uchilla yurata jatunyachishcata, verdijlla yuratapish chaquichishcata, chaquishca yuratapish verdijllatami rurarcani. Mandaj Dios ñucallataj chashna rurashcatami tucui shujtaj yuracunaca yachangacuna. Mandaj Dios ñucallatajmi chashna nircani, chaitaca pajtachishatajmi” nircami.