2 REYES 15 - Quichua Chimborazo Bible

Judá llajtata Azarías mandashcami(2 Cr 26.3-5, 16-23)

1Jeroboam Israel llajtata ishqui chunga canchis huatata ña mandacujpimi, Judá llajtata jatun mandaj Amasiaspaj churi Azariasca, Judá llajtata mandai callarirca.

2Azariasca mandai callarinapajca chunga sujta huatayujmi carca. Pichca chunga ishqui huatatami, Jerusalenpi mandarca. Paipaj mamaca, Jerusalenllamantataj Jecoliasmi carca.

3Azariasca, tucui imapipish paipaj yaya Amasías shinallatajmi Mandaj Diospaj ñaupajpica, ima pandata mana rurarca.

4Shina cashpapish, lomacunapi tiyaj altarcunapi israelcuna sacrificiota ruracushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu.

5Chaimi Mandaj Diosca, chai jatun mandajtaca huañungacama lepra ungüihuan llaquichirca. Paica ch'ican huasipimi pailla causarca. Paipaj churi Jotammi mandana huasipi imalla rurana cashcata mingui tucushpa tucui gentecunata mandarca.

6Azarías ashtahuan imalla rurashcata, tucui pai imalla rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

7Azarías paipaj ñaupa yayacunahuan dormijpica, ñaupa yayacunata churashcallapitajmi, Davidpaj pueblopi churarcacuna. Paipaj randica paipaj churi Jotammi mandarca.

Israel llajtata Zacarías mandashcami

8Azarías Judá llajtata quimsa chunga pusaj huatata ña mandacujpimi, Jeroboampaj churi Zacariasca, Israel llajtata mandai callarirca. Paica sujta quillallatami, israelcunataca mandarca.

9Paica paipaj ñaupa yayacuna shinallatajmi Mandaj Diospaj ñaupajpica, millaita rurarca. Nabatpaj churi Jeroboam juchallishpa israelcunata juchallichishca shina juchallinataca mana saquircachu.

10Paitaca Jabes runapaj churi Salummi, shujtajcunahuan huashalla yuyarinacushpa, tucuicunapaj ñaupajpi paita huañuchishpa pai mandaj tucurca.

11Zacarías ashtahuan imalla rurashcata, ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

12Mandaj Diosca Jehutaca: “Cambaj churicunataca chuscu huahua huahuacunacamami israelcunata mandachun saquisha” nishcami carca. Chaica chashnatajmi pajtarca.

Israel llajtata Salum mandashcami

13Judá llajtata Uzías quimsa chunga iscun huatata ña mandacujpimi, Jabespaj churi Salumca Israel llajtata mandai callarirca. Paica shuj quillallatami Samariapi mandarca.

14Pai mandacujpica, Gadi runapaj churi Manahemca, Tirsamanta Samariaman huichi shamushpami Jabespaj churi Salumtaca Samariapi huañuchishpa pai mandaj tucurca.

15Salum ashtahuan imalla rurashcata, shujtajcunahuan huashalla yuyarinacushpa Zacariasta huañuchishcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

16Manahemca, Tifsa pueblotaca tucui chingachishpami chaipi imalla tiyashcatapish tucui aparca. Tirsa muyundijpi causajcunatapish chai pueblo punguta mana pascasha nijpimi chashnallataj rurashpa, chichu huarmicunatapish huijsacunata lliquirca.

Israel llajtata Manahem mandashcami

17Judá llajtata Azarías quimsa chunga iscun huatata ña mandacujpimi, Gadi runapaj churi Manahemca, Israel llajtata mandai callarirca. Paica chunga huatatami Samariapi mandarca.

18Paica Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca paipaj tucui causaipi mana saquircachu.

19Asiria llajtata jatun mandaj Pul runaca israelcunahuan macanacungapajmi shamurca. Chaimi Manahemca israelcunata mandachunca paillatataj churachun 1.000 talento cullquita Pul runaman curca.

20Asiria llajtata jatun mandajman chai tucui cullquita cunapajca Manahemca, israelcunataca ashtahuan charijcunatami cada shujta pichca chunga siclo cullquita mañarca. Chaita cujpica Asiria llajtata jatun mandajca, Israelpi mana saquirishpa tigrarcallami.

21Manahem ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

22Manahem paipaj ñaupa yayacunahuan dormijpica, paipaj randica paipaj churi Pekaiami mandarca.

Israel llajtata Pekaía mandashcami

23Judá llajtata Azarías pichca chunga huatata ña mandacujpimi, Manahempaj churi Pekaiaca, Israel llajtata mandai callarirca. Paica ishqui huatatami Samariapi mandarca.

24Paica Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca mana saquircachu.

25Pekaiataca Remaliaspaj churi Peka, paipaj soldadocunata mandajllatajmi shujtajcunahuan huashalla yuyarinacushpa mandana huasipi Samariapi huañuchirca. Paihuanca Argob, Arie runacunatapishmi huañuchirca. Galaadmanta pichca chunga runacunahuan tucushpa huañuchishpami, Pekaca mandaj tucurca.

26Pekaía ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

Israel llajtata Peka mandashcami

27Judá llajtata Azarías pichca chunga ishqui huatata ña mandacujpimi, Remaliaspaj churi Pekaca, Israel llajtata mandai callarirca. Paica ishqui chunga huatatami Samariapi mandarca.

28Peka runaca Mandaj Diospaj ñaupajpica, millaitami rurarca. Nabatpaj churi Jeroboam, juchallishpa israelcunata juchallichishca shina juchallinataca mana saquircachu.

29Israel llajtata Peka mandacui huatacunami, Asiria llajtata jatun mandaj Tiglat-pileser shamushpaca, Ijón, Abel-bet-maaca, Janoa, Cedes, Hazor, Galaad, Galilea llajtacunata, Neftalipaj tucui llajtacunatapish japishpa chaipi causajcunataca tucuita Asiriaman prezu aparca.

30Uziaspaj churi Jotam, Judá llajtata ishqui chunga huatata ña mandacujpimi, Remaliaspaj churi Pekataca, Ela runapaj churi Oseas shujtajcunahuan huashalla yuyarinacushpa huañuchishpa pai mandaj tucurca.

31Peka ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

Judá llajtata Jotam mandashcami(2 Cr 27.1-9)

32Israel llajtata Remaliaspaj churi Peka ishqui huatata ña mandacujpimi, Uziaspaj churi Jotamca Judá llajtata mandai callarirca.

33Jotamca mandai callarinapajca ishqui chunga pichca huatayujmi carca. Paica Jerusalenpimi chunga sujta huatata mandarca. Paipaj mamaca Sadocpaj ushushi Jerusami carca.

34Jotamca, paipaj yaya Uzías shinallatajmi Mandaj Diospaj ñaupajpica, ima pandata mana rurarca.

35Chashna cashpapish, lomacunapi tiyaj altarcunapi israelcuna sacrificiota ruracushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu. Mandaj Diospaj huasi jahua lado pungutaca Jotammi rurarca.

36Jotam ashtahuan imalla rurashcata, tucui pai imalla rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

37Chai huatacunallapitajmi Mandaj Diosca, Judá llajtapi causajcunata llaquichichunca, Siria llajtata jatun mandaj Rezinta, Remaliaspaj churi Pekata cachanata callarirca.

38Jotam huañushpa paipaj ñaupa yayacunahuan dormijpica, ñaupa yayacunata churashcallapitajmi Davidpaj pueblopi churarcacuna. Paipaj randica paipaj churi Acazmi mandarca.