ÉXODO 33 - Quichua Chimborazo Bible

Diosca cancunahuanmi risha nishcami

1Mandaj Diosca Moisestaca:

–Egiptomanta can llujshichimushca israelcunata pushashpa huichi rilla. Abrahamman, Isaacman, Jacobmanca: Cai llajtataca cambaj huahua huahuacunamanmi cushatajmi nircani. Israelcunataca chaiman pushashpa rilla.

2Canta ñaupashpa richunca angeltami cachasha. Chai llajtamantaca cananeocunata, amorreocunata, heteocunata, ferezeocunata, heveocunata, jebuseocunatapishmi llujshichishpa cachasha.

3Lechepish, sacha chuspipaj mishquipish yacu shina tiyan llajtaman richij. Cancuna yallitaj rumi shungucuna cashcamanta, ñucaca mana cancunahuan rishachu. Ñuca cancunahuan rishpaca ñanpi cancuna ima mana allita rurajpica, tucuicunata chingachishallatajmari– nircami.

4Israelcunaca chashna llaquichinata uyashpami, llaquilla cashcata ricuchij churanata churarircacuna. Shujllapish sumajta allichirishca churanacunata churarishcapish mana carcachu.

5Mandaj Diosca Moisestaca:

–Israelcunataca cashna ni: Cancunaca yallitaj rumi shungucunami canguichij. Ñuca cancunapaj chaupiman ashata huichiyashpaca tucuicunatami chingachiman. Sumajta allichirishcacunata churarishcacunata anchuchichij. Cancunahuan ñuca imata rurana cashcata yuyaringapaj nigri– nircami.

6Chaimi israelcunaca Horeb urcumanta ri callari pachamanta chai sumaj churanacunataca ña mana churarircacuna.

7Moisesca Diospaj carpa huasita apashpami, israelcunapaj carpa huasicunamanta caruman shayachishpa, chaitaca Dioshuan tupanacuna nishpa shutichirca. Mandaj Diosta maijanpish mashcajca Dioshuan tupanacuna carpa huasimanmi, israelcunapaj carpa huasicunamanta llujshishpa rijcuna carca.

8Israelcunapaj carpa huasicunamanta Moisés llujshishpa Diospaj carpa huasiman rijpica, tucui israelcunami paicunapaj carpa huasi pungucunapi shayarishpa, Dioshuan tupanacuna carpa huasiman Moisés yaicungacama chaparacujcuna carca.

9Diospaj carpa huasiman Moisés yaicujpica, suni p'uyu uriyamushpami Diospaj carpa huasi pungupi shayarij carca. Chai ñaupajmantami Mandaj Diosca Moiseshuan rimaj carca.

10Diospaj carpa huasi pungupi suni p'uyu shayarijta israelcuna ricushpaca, jatarishpami paicunapaj quiquin carpa huasi pungupi Diosta adorarcacuna.

11Mandaj Diosca Moiseshuanca maijan paihuan alli apanacujhuan rimacuj shinami ñahui ñahui rimaj carca. Chai q'uipaca Moisesca, carpa huasicunaman tigrajllami carca. Moisespajta ruraj Nunpaj churi Josueca, Diospaj carpa huasimantaca manataj anchurijchu carca.

12Moisesca Mandaj Diostaca:

–Riqui quiquinca ñucataca: Cai israelcunata huichiyachi ninguimi. Pita ñucahuan cachanataca manamari huillanguichu. Ashtahuan cashnapish nircanguimi: Cambaj shutitaca rijsinimi. Canca ñuca ñahuipica allimi ricuringui ninguimi.

13Ñuca cambaj ñahuipi allitaj ricurishca cajpica, can ima shina cashcata ñuca alli rijsishpa ñucapish canpi shunguta churashpa ashtahuan cambaj munaita rurangapaj cambaj ñanta ricuchichunmi rogani. Cai israelcunaca can agllashcacunamari– nircami.

14Chaimi Mandaj Diosca:

–Ñucatajmi canhuanca risha. Ñucami samachisha– nirca.

15Shina nijpi Moisesca:

–Quiquintaj mana ñucanchijhuan rina cashpaca, caimantaca ñucanchijtaca ama llujshichichu.

16Can mana ñucanchijhuan rijpica ¿ima shinataj ñucapish can agllashca israelcunapish canpi shunguta churashpa ashtahuan cambaj munaita rurashunyari? Chashna cajpimi ñucanchijca shujtaj llajtacunamanta ñucanchijtaca ch'icanyachishca cashcata yachashun– nircami.

17Shina nijpi Mandaj Diosca Moisestaca:

–Canca ñuca ñahuipi alli ricurishcamanta, cambaj shutitapish ima shina cajta rijsishcamantaca can nishcataca rurashami– nirca.

18Chaimi Moisesca:

–Can jatun cashcata ñucaman ricuchihuai– nirca.

19Shina nijpimi Mandaj Diosca:

–Ñuca alli cashcataca tucuitami canman ricuchigrini. Ñucaca Mandaj Dios cashcatapish cambaj ñaupajpimi huillasha. Ñuca pita llaquisha nishcatami llaquisha. Ñuca c'uyasha nishcatami c'uyasha.

20Ashtahuanpish ñuca ñahuitatajca, manataj ricui tucunguichu. Ñuca ñahuita ricushpaca, pi mana causai tucungachu– nircapishmi.

21Mandaj Diosca cashnapishmi nirca:

–Riqui, ñuca c'uchupimi shuj c'aca rumi tiyan. Chai jahuapi shayari.

22Ñuca jatun achij nicuj cashcahuan pasagrishpaca cantaca c'aca rumi chijtarishca ucupi churashpami ñuca pasangacama ñuca maquihuan tapasha.

23Ña pasashpa ñuca maquita anchuchijpica, ñuca huashallatami ricungui. Ñuca ñahuitatajca, manataj ricunguichu– nircami.