1 SAMUEL 16 - Quichua Chimborazo Bible

Samuel Davidta aceitehuan churashcami

1Mandaj Diosca Samueltaca:

–Israelcunata ama jatun mandaj cachun Saulta ñuca ña anchuchishcamantaca ¿maicamataj huacacunguilla? Can charicun gachupi aceiteta jundachishpa, Belenpi causaj Isaipajman ri. Ñucaca paipaj churicunamanta shujtami jatun mandaj cachun ña agllarcani– nircami.

2Chaimi Samuelca:

–¿Ima shinataj rishari? Saúl yachashpaca ñucataca huañuchingamari– nijpimi Mandaj Diosca:

–Shuj huarmi bizita apai: Mandaj Diosman sacrificiota cungapajmi shamurcani ningui.

3Chaita cushpa rupachingapajca Isaitapish cayangui. Chaipimi can imata rurana cashcataca yachachisha. Maijantami ñuca ricuchini, chaita aceitehuan umapi churangui– nircami.

4Samuelca Mandaj Dios nishca shinallatajmi rurarca. Belenman pai ña chayajpica, chai pueblopaj cunaj yuyajcuna manchaihuan tupanaman llujshishpaca:

–¿Cushichingapajchu shamungui?– nishpa tapujpimi,

5Samuelca:

–Ari, Mandaj Diosman cushpa rupachingapajmi shamuni. Cancunapish Diospajlla tucushpa, Diosman cushpa ñuca rupachicunman shamuichij– nirca.

Isaitapish paipaj churicunatapish Diospajllata rurashpaca, Diosman cushpa pai rupachicunmanmi cayarca.

6Paicuna ña shamujpica, Samuelca Eliabta ricushpaca: “Paitamari Mandaj Diosca jatun mandaj cachun agllashca canga” yuyarcami.

7Chaimi Mandaj Diosca Samueltaca: “Pai sumaj cashcallata, jatun runa cashcallataca ama ricuichu. Chashnacunataca ñucaca yanganchinimi. Mandaj Diosca runacuna ricuj shinallaca mana ricunchu. Runaca paipaj ñahuipi ricurishcallatami ricun. Ashtahuanpish Mandaj Diosca shungutamari ricun” nirca.

8Isaica, Abinadab churita cayashpami Samuelpaj ñaupajman pushajpi:

–Paitapish Mandaj Diosca, mana agllarcachu– nirca.

9Isaica, Sama churita Samuelpaj ñaupajman pushajpi:

–Paitapish Mandaj Diosca mana agllarcachu– nirca.

10Isaica chashnami paipaj canchis churicunatataj huashan huashan Samuelpaj ñaupajman pushajpi Samuelca Isaitaca:

–Caicunataca Mandaj Diosca pita mana agllashcachu– nirca.

11Chai q'uipami Samuelca Isaitaca:

–¿Tucui caicunallachu cambaj churicunaca?– nijpi Isaica:

–Tucuicunapaj q'uipa shuj uchilla churillami ovejacunata michicun– nijpi Samuelca Isaitaca:

–Paita pushanaman cachai. Pai chayamungacama ñucanchijca micungapaj mana tiyarishunchu– nirca.

12Chaimi Isaí paipaj churita pushanaman cachashpaca, Samuelpajman yaicuchirca. Paica puca ajcha, sumaj ñahuicunayuj, sumaj huambrami carca. Chaipimi Mandaj Diosca Samueltaca:

–Paitami jatun mandaj cachun agllarcani. Jatarishpa, aceitehuan churai– nirca.

13Chaimi Samuelca, aceitehuan caj gachuta japishpaca, paipaj huauquicunapaj chaupillapitaj Davidtaca aceitehuan churarca. Chai punllamanta pachami Mandaj Diospaj Espirituca Davidpaj jahuaman shamurca. Chai q'uipaca Samuelca jatarishpa Ramá puebloman tigrarcallami.

Davidca Saulpajta ruranapi yaicushcami

14Mandaj Diospaj Espirituca Saulmantaca anchurircami. Mandaj Diosca millai espirituta Saulpajman cachajpimi Saultaca llaquichirca.

15Chaimi Saulpajta rurajcunaca:

–Cunanca millai espíritu canta llaquichichun Mandaj Dios saquijpimi, chai espíritu cantaca llaquichicun.

16Ñucanchij amito. Cambaj ñaupajpi cambajta ruraj ñucanchijtaca, arpapi tocanata yachajta mashcachun cachai. Mandaj Dios llaquichichun saquishca millai espíritu cambaj jahuaman shamushpa llaquichicujpica, arpapi tocaj tocajpica, cambaj yuyaica ashallatapish samaringami– nircacuna.

17Saulca paipajta rurajcunataca:

–Shinashpaca maijanpish alli tocanata yachaj runata mashcashpa, caiman pushamuichij– nircami.

18Chaimi paipajta rurajcunamanta shujca:

–Ñucaca Belenpi causaj Isaipaj churitamari tocanata yachaj cashcata, c'ari c'ari, fuerzasapa, macanacunata alli yachaj, imatapish alli yuyaihuan rimaj, sumaj huambra cashcata ricurcani. Mandaj Diosca paihuanmi– nircami.

19Chaimi Saulca:

–Ovejacunata michij cambaj churi Davidta caiman cachai– nichun huillajcunata Isaipajman cacharca.

20Shina nijpimi Isaica tandata, puñu vinota, shuj chivota burroman apachishpa Saulpajman paipaj churi Davidhuan cacharca.

21David Saulpajman chayajpica Saulca paipajta ruraj cachunmi churarca. Saulca Davidta achcata c'uyashpami, paipaj macanacunata apajta rurarca.

22Chai q'uipami Saulca Isaimanca: “Davidtaca ñucahuan causachun saquilla paica ñuca ñahuipica allimi ricurishca” nishpa rogachun cacharca.

23Llaquichichun Dios saquishca millai espíritu Saulpaj jahuaman shamujpi David arpata japishpa tocajpica, millai espíritu Saulmanta anchujpimi ashata samarishpa cushicuj carca.