AMÓS 5 - Quichua Chimborazo Bible

Diosman cutirichij nishcamanta

1Israelcunalla, cancunamantaca yupashpa yupashpami huacagrini. Caita uyahuaichij.

2Israelcunaca c'arihuan manaraj chayarinacushca soltera shina cashpapish, urmashcamari. Cutinca ña mana jatari tucungachu. Quiquin allpallapitajmari urmashpa saquirishca. Paita jatarichijca, pi mana tiyanchu.

3Mandaj Jatun Diosca cashnami nin: “Israelcunaca, maijan pueblomanta huaranga runacunahuan macanacunaman llujshishpaca patsajllahuanmi tigramungacuna. Maijan pueblomanta patsaj runacunahuan macanacunaman llujshishpaca, chungallahuanmi tigramungacuna” ninmi.

4Shina cajpipish Mandaj Diosca, israelcunataca cashnami nin: “Cancuna llaquirishpa ñucata mashcashpaca, mana huañunguichijchu.

5Bet-el pueblomanca ama ringuichijchu. Gilgal pueblomanpish ama yaicunguichijchu. Beerseba pueblomanpish ama c'uchuyanguichijchu. Gilgal pueblopi causajcunaca, prezu apashcami canga. Bet-el pueblopish, tucui chingachishcami saquiringa” ninmi.

6Llaquirishpataj Mandaj Diosta mashcashpaca, mana huañunguichijchu. Ñataj Josepaj huahua huahuacunataca, ninahuan rupachishpa tucuita chingachiman. Bet-elpi causajcunaca chai ninataca, pi mana huañuchi tucungachu.

7Cashcata ruranataca, pambapimi shitanguichij. Chashna cashpamari, ajenjo jayaj shina llaquichishcanguichij.

8Pléyades, Orión shuti luzerocunatapish ruraj Diosta mashcaichij. Paica tutatapish achijyachinmi, punllatapish tutayachinmi. Paica mama cucha yacutapish mandajmi, paica chai yacutaca allpa jahuapi tsirapajmi. Paica Mandaj Dios shutimi.

9Paica c'ari c'aricunata quichujcunaman fuerzata cujmi. Chai quichujcunataca, paimi jatun patacunata urmachichun cachan.

10Paicunaca puebloman yaicuna pungupi cunashpa rimajcunataca p'iñarcacunami. Cashcata rimajcunatapish mana ricunachircacunachu.

11Shinallataj huajchacunataca sarushpa macashpami, impuestomantaca carga trigota apanguichij. Chashna quichushpami, labrashca rumicunahuan huasichircanguichij. Chai huasicunapipish mana causanguichijchu. Cancuna tarpushca, sumaj uva chagracunamanta vinollatapish rurashpa mana ubyanguichijchu.

12Ñucaca cancunataca mana cazushpa yallitaj millaita rurashcatapish, jatun juchacunata rurashcatapish yachanimi. Cashcata ruraj runata llaquichicushcatapish, chai llaquichicujcunapura tucushpa camarita japijcunatapish ricucunimi. Juezcunaca, huajchacunallatami llaquipi churanguichij.

13Chashna mana allita rurajpipish, alli yuyaiyuj runaca pitapish mana juchachishpa upalla saquinllami. Llaqui punllacunapi cashcamantami, mana imata ni tucun.

14Allita ruranallata yuyaichij, millaita ruranataca cungarichij. Chashna allita rurashpaca, causanguichijmi. Cancunaca, tucuita Mandaj Diosca ñucanchijhuanmi ninguichijmi. Cancuna chashna nishca shinallataj, Mandaj Diosca cancunahuanmi canga.

15Imapish millaitaca p'iñaichij, imapish allitaca ashtahuan ruraichijlla. Juezcunapish, cashcata rurana yuyailla caichij. Cancuna chashna tucuita allita rurajpica, tucuita Mandaj Diosca Josepaj huahua huahuacuna maijan saquirishcacunallatapish llaquingapishchari.

16Tucuita Mandaj Taita Diosca cashnapishmi nin: “Tucui plazacunapimi huacai tiyanga, tucui ñancunapimi aij, aij nishpa huacana tiyanga. Tarpuj runatapish, huacaj shamui nishpami cayangacuna. Yupashpa yupashpa huacanata alli yachajcunatapish huacachunmi cayangacuna.

17Ñuca cancunata llaquichinaman shamujpica, tucui uva chagracunapipish huacangacunami” ninmi Mandaj Diosca.

18Mandaj Dios shamuna punllata shuyacujcunalla, ¡aij imachari tucunguichij! Mandaj Dios shamuna punllataca ¿imapajtaj shuyanguichigari? Pai shamui punllaca, amsa tutami canga. Ima achijyachijpish, mana tiyangachu.

19Chai llaqui punllapica, leonta miticunaman callpacushpapish, osohuanmi tupanga. Huasipi miticugrishpaca, pata quinripi huancarijpica, culebrami ñapish caninga.

20Mandaj Dios shamui punllaca, tucuimi yallitaj amsa tucunga. Ima achijyachijpish, mana tiyangachu.

21“Cancuna cushicushpa jatun tandanacuicunata rurajpipish manataj munanichu, manataj ricunanchu. Cancuna sumaj tandanacuicunata rurashcahuanpish manataj cushicunichu.

22Ñucaman tucuita cushpa rupachijpipish, mana chasquinichu. Ñucaman imata cuna cashcata cujpipish, manataj chasquinichu. Ñucahuan alli cangapaj cancunapaj huira animalcunata ñucaman cushpa rupachijpipish, manataj ricushallapishchu.

23Achca cantajcuna cantashpapish ama p'iñachichijchu, anchuichijlla. Tocanacunapipish ama tocaichijchu.

24Ashtahuanpish cancunaca uri ricuj yacu mana chaquirij shinapish, pugyu yacu mana chaquirij shinapishmi cashcata ruranataca mana cungarina canguichij.

25Israelcunalla, cancunaca shitashca pambata chuscu chunga huatata shamucushpapish, ñucamanca imalla cuna cashcatapish cushpa huañuchinapaj ¿curcanguichijchari?

26Ashtahuanpish cancunaca Moloc, Quiún shuti dioscunapaj carpa huasitami apashpa purircanguichij. Chai dioscunapaj luzerotami rurarcanguichij.

27Chaimantami cancunataca, Damasco pueblota pasashpa huashaman cachasha” ninmi Mandaj Diosca. Paica tucuita Mandaj Taita Dios shutimi.