1Israelcunataca Mandaj Diosca alli cashca cachun nichunllataj munacushcata ricushpami, Balaamca ñaupacunaman ishqui cutin tapushca shinallatajca mana tapugrirca. Ashtahuanpish shitashca pamba ladoman muyurishpami shayarirca.
2Chaimantaca israelcunaca cada aillu ch'ican ch'ican paicunapaj carpa huasicunata shayachishpa tiyacujtami ricurca. Diospaj Espíritu paipaj jahuaman shamujpimi,
3paica Dios huillachishcata cashna huillarca:
“Beorpaj churi Balaamca cashnami nin.
Alli ricushpa huillaj runaca cashnami nin.
4Taita Dios imalla nishcacunata uyashpa huillajca cashnami nin.
Paica urmarcami.
Ñahui pascashcami urmarca.
Chaipica Pailla Tucuita Rurai Tucuj Dios muscuipi shina ricurishpa huillashcatami uyarca.
5¡Jacob cambaj carpa huasicunaca yallitaj sumajmari.
Israel cambaj causanaca yallitaj sumajmari!
6Israelcunapaj carpa huasicunaca larca yacucuna shina huachujllami.
Jatun yacu uripi tiyaj huertacuna shinami.
Mandaj Dios tarpushca áloe yuracuna shinami.
Yacucuna uripi tarpushca cedro yuracuna shinami.
7Israelcunapaj yacuca jicharicunmi.
Paicunapaj huahua huahuacunami yallitaj achca yacuta charingacuna.
Israelcunata jatun mandajca, Agagta yallimari.
Pai mandanaca jatunyachishcamari.
8Egiptomanta llujshichimuj Taita Diosca, búfalo huagra shina fuerzayujmi.
Israelcunaca paicunata p'iñaj llajtacunataca millpungami.
Paicunapaj tullucunatapish ñutungami.
Israelcunaca paicunapaj flechacunahuan pasajtami satingacuna.
9Pacajlla chaparashpa siricuj león shinami cangui.
Pacajlla chaparashpa siricuj mama león shinami cangui.
¿Pitaj cantaca rijchachi tucungari?
¡Cancunata alli cashca cachun nijcunaca, alli cashca cachun.
Cancunata imapish tucushca cachun nijcunaca, jatun llaqui tucushca cachun!” nircami.
Q'uipa punllacunapi imalla tucunata Balaam huillashcami10Shina nijpimi, Balacca, Balaamhuan nina sindirij shina p'iñarishpa maquicunapi huajtarishpa cashna nirca:
–Cantaca, ñucata p'iñajcunata imapish tucushca canman nichunmi pushamurcani. Ashtahuanpish canca ñucata p'iñajcunataca, ñamari quimsa cutin alli cashca cachun ningui.
11Cunanca cambaj llajtaman utca rilla. Ñucaca canmanca ñuca munashcatami cusha nircani. Ashtahuanpish Mandaj Diosmari canman chashna cunataca jarcan– nircami.
12Chaimi Balaamca:
–Ñucata pushanaman can cachashcacunamanca manachu ñucapish cashna nircani:
13Jatun mandaj Balac, paipaj huasi ucu junda cullquita, curita ñucaman cujpipish Mandaj Dios mandashcata mana cazushpa ñuca munaimanta allitapish mana allitapish mana rurai tucunichu. Ashtahuanpish Mandaj Dios imata rimachishcallatami ñucaca nisha nircanitaj shiná.
14Cunanca ñucaca ñuca gentecunapajmanmi ña rigrini. Shina cashpapish, q'uipa punllacunapi israelcuna cambaj gentecunata imata rurana cashcata huillangapaj shamui– nircami.
15Chaipica shamuj punllacunapi imalla tucuna cashcatami cashna nishpa huillarca:
“Beorpaj churi Balaamca cashnami nin.
Alli ricushpa huillaj runaca cashnami nin.
16Taita Dios imalla nishcacunata uyashpa huillajca cashnami nin.
Paica urmarcami.
Ñahui pascashcami urmarca.
Chaipica Pailla Tucuita Rurai Tucuj Dios muscuipi shina ricurishpa huillashcatami uyarca.
17Imalla tucunataca ricunimari.
Chaica mana cunan punllachu chashna tucunga.
Shamuj punllapi imalla tucunataca ashallatamari ricuni.
Chaica caimi:
Jacobmantaca LUZEROMI llujshinga.
Israelmantaca mandana varami llujshinga.
Moabtaca rinrin jahuanijllapimi chugrichinga.
Setpaj huahua huahuacunataca tucuimi chingachinga.
18Edomtaca japingacunami.
Seirtapish japingacunami.
Paicunata p'iñajcunami japingacuna.
Israelcunaca jatun milagrocunatami rurangacuna.
19Jacobmantaca tucuita mishajmi llujshinga.
Jatun pueblopi saquirishcacunatapish chingachingami” nircami.
20Amaleccunata ricushpapish shamuj punllacunapi paicuna imalla tucunatami cashna huillarca:
“Amalecca llajtacunapaj umami.
Ashtahuanpish tucuitaj chingachishcami canga” nircami.
21Ceneocunata ricushpapish, shamuj punllacunapi paicuna imalla tucunatami cashna huillarca:
“Ceneocuna cancuna causanaca pi mana cuyuchipaj sinchimari.
Cancunapaj tazinca peña urcupimari.
22Ashtahuanpish, ceneocunaca tucuitaj chingachishcami canga.
Asiriocuna prezu apajpimi, chashna tucunga” nircami.
23Chai q'uipaca shamuj punllacunapi imalla tucuna cashcataca cashnapishmi nirca:
“Tucui chaicunata Taita Dios chashna rurajpica ¡aij!, ¿pitaj causangari?
24Mama cucha chaupipi caj Quitim llajtamantaca jatun barcocunami shamunga.
Chaicunaca Asiriatami llaquichinga.
Hebertapish llaquichingami.
Chashna ruraj cashpapish tucuitaj chingachishcami canga” nircami.
25Chai q'uipaca, Balaamca, paipaj llajtamanmi tigrarca. Balacpish pai maiman rina cashcaman rircallami.
Who We AreWhat We EelieveWhat We Do
2025 by iamachristian.org,Inc All rights reserved.
