ÉXODO 29 - Quichua Chimborazo Bible

Aarontapish paipaj churicunatapish Diospajlla cachun ch'icanchishcami(Lv 8.1-36)

1Ñucapajlla curacuna cachun ch'icanchingapajca cashnami rurana cangui: Huagracunamanta ima mana tucushca shuj malta huagrata, ishqui carnerocunata,

2levadura illajlla tandata, aceitehuan rurashca levadura illajlla tortillata, ñañu jatun tortillatapish levadura illajllata rurashpa aceitehuan jahuata llihuingui. Chaicunataca tucuimanta yalli alli trigo cutahuan rurangui.

3Chaicunataca canastapi churashpa, malta huagrandij, ishqui carnerocunandij cungui.

4Aarontapish, paipaj churicunatapish Dioshuan tupanacuna carpa huasi punguman pushashpa armachishpa,

5churanacunata japishpa Aaronmanca tunicata, efodpaj ucuta churanata, efodta, pectoralta churachishpa efodta chumbillichinahuan chumbillichingui.

6Paipaj umapica mitrata churachingui. Mitrapica: MANDAJ DIOSCA JUCHA ILLAJMI nishpa quillcashca ñañujlla latata huatangui.

7Chai q'uipaca ñucapajlla ch'icanchina aceiteta japishpa, paipaj umapi tallishpa ñucapajlla cachun ch'icanchingui.

8Paipaj churicunatapish cayashpa, túnica churanacunata churachingui.

9Aarontapish, paipaj churicunatapish chumbillinahuan chumbillichingui. Tiaracunatapish huatangui. Aarontapish, paipaj churicunatapish ñucapajlla cachun chashna ch'icanchingui. Curacuna canaca huiñai huiñaita paicunapajllami saquiringa.

10Chai q'uipaca, Dioshuan tupanacuna carpa huasiman malta huagrata apangui. Chaipi Aaronpish, paipaj churicunapish paicunapaj maquicunata chai huagrapaj uma jahuapi churachuncuna.

11Chai huagrataca, Dioshuan tupanacuna carpa huasi pungupi Mandaj Diospaj ñaupajpi huañuchingui.

12Malta huagrapaj yahuarta japishpa, cambaj dedohuan altar gachucunapi churangui. Saquirishca yahuartaca tucuita altar chaquipi tallingui.

13Chunllullicunapi, yana shungupi, riñoncunapi tiyaj huirataca tucui llujshichishpa ñuca altarpi rupachingui.

14Malta huagraca juchamanta ñucaman cushca cashcamanta aichatapish, caratapish, majadatapish carpa huasicunamanta canllaman rupachingui.

15Chai carnerocunamanta shuj carnerota japingui. Aaronpish, paipaj churicunatapish chai carneropaj uma jahuapi paicunapaj maquicunata churachun.

16Chai carnerota huañuchishpa, yahuartaca altar jahuapipish, altar muyundijpipish tsirapangui.

17Chai carneropaj aichataca mirga mirgata p'itishpa, chunllullicunatapish chaquicunatapish maillashpa mirga mirga aichacuna jahuapi uma jahuapi churangui.

18Mandaj Diosman cushcaca pai munashca shina mishquiman ashnacuj cachun, chai carneropaj aichataca tucuita altar jahuapi rupachingui.

19Caishuj carnerotapish japingui. Aaronpish, paipaj churicunatapish carneropaj uma jahuapi paicunapaj maquicunata churachun.

20Chai carnerotapish huañuchishpa, yahuarta japishpaca Aarontapish, paipaj churicunatapish paicunapaj alli lado rinrin ucu lado puntapi churangui. Paicunapaj alli lado maqui mama dedopipish, alli lado chaqui mama dedopipish churangui. Saquirishca yahuartaca altar jahuapipish, altar muyundijpipish tsirapangui.

21Altar jahuapi caj yahuartapish, ñucapajlla ch'icanchingapaj churana aceitetapish japishpa Aaronpaj jahuapipish, paipaj churicunapaj jahuapipish paicunapaj churanacunapipish tsirapangui. Chashna rurajpimi Aaronpish, paipaj churicunapish, paicunapaj churanacunapish ñucapajlla ch'icanyachishca saquiringa.

22Chai carneroca ñucapajlla ch'icanchingapaj cushca cashcamanta chupata, chunllullipi, yana shungupi, ishqui riñoncunapi tiyaj huirata riñoncunandij llujshichingui. Alli lado changatapish japingui.

23Levadura illajlla tandacunata Mandaj Diosman cushcata canastapi tiyacujta japishpa shuj jatun tandatapish, aceitehuan chapushpa rurashca tandatapish, shuj ñañu tortillatapish,

24Aaronpaj maquicunapipish, paipaj churicunapaj maquicunapipish churangui. Paicunaca chaicunataca Mandaj Diosman caiman chaiman cuyuchishpa cushca cachunmi caiman chaiman cuyuchishpa cunga.

25Chai q'uipaca paicunapaj maquicunamanta japishpa Mandaj Diosman cushcaca pai munashca shina mishquiman ashnacuj cachun, tucuita cushpa rupachinahuan tandachishpa altarpi rupachingui.

26Ñucapajlla cachun Aaronta ch'icanchingapaj cushca carneropaj pecho aichata japishpa caiman chaiman cuyuchishpa Mandaj Diosman cushca cachun, Mandaj Diospaj ñaupajpi caiman chaiman cuyuchingui. Chaitaca can japingui.

27Aarontapish, paipaj churicunatapish Mandaj Diospajlla cachun ch'icanyachingapaj cushca carneropaj pecho aichata caiman chaiman cuyuchishpa cushcatapish, Mandaj Diosman ricuchishpa cushca changa aichatapish paicunapaj cachun cungui.

28Israelcunaman huiñaipaj chaitataj pajtachichun nishpa cushca mandashcapi nishca shinallataj Mandaj Diosman ricuchishpa cushca cashcamanta chaicunaca Aaronpajpish, paipaj churicunapajpishmi canga. Israelcuna Mandaj Dioshuan alli cangapaj paiman ricuchishpa cushcacunaca Mandaj Diosman ricuchishpa cushca cashcamanta curacunapajmi canga.

29Aarón cura cashpa churana churanacunataca paipaj huahua huahuacunami japishpa catinga. Chai churanacunata churachishpa paicunatapish aceiteta umapi churashpa ñucapajllata rurachun.

30Dioshuan tupanacuna carpa huasipi Aaronpaj randi paipaj churicuna Diospajta rurai callarinata chasquingapajca canchis punllacunata chai churanata churarishca cachun.

31Diospajta ruraj cachun ch'icanchingapaj cushca carnero aichataca Diospajlla ch'icanchishcapi yanuchun.

32Aaronpish, paipaj churicunapish carneropaj aichatapish, canastapi tiyaj tandatapish Dioshuan tupanacuna carpa huasi pungupi micuchun.

33Chai aichataca Mandaj Diospaj cura canata chasquichun paicunapaj juchamanta cushpa paicunata Mandaj Diospajlla cachun ch'icanyachinapaj cushca aicha cashcamanta shujtajcunaca pi ama micuchun curacunalla micuchun.

34Ñucapajlla cachun ch'icanchingapaj cushca aicha cashpa, tanda cashpa cayandijpaj ashallapish saquirijpica tucui rupachingui. Ñucapajlla ch'icanchishca cashcamanta mana micunachu.

35Aaronta, paipaj churicunataca ñuca ima shinalla mandashca shinallataj rurangui. Ñucapajlla cachun ch'icanyachinataca canchis punllatami rurana cangui.

36Juchamanta cuna malta huagrataca cada punlla cuchun. Paipaj juchamanta altarpi cushpa chai altartaca mapa illajta rurangui. Chai altar ñucapajlla cachunpish aceitehuan churangui.

37Chai altar chuyayachunca canchis punllata animalta cushpa rupachishpa ñucapajllata rurangui. Chaipimi chai altarca ñucapajlla ch'icanyachishca canga. Chai altarpi ima tuparijpish ñucapajlla ch'icanchishcami tucunga.

Diosman punllanta imallata cunami(Nm 28.1-8)

38Caitami altar jahuapi cuna cangui: Shuj huatayuj ishqui ovejacunatami punllanta cushpa rupachicunalla cangui.

39Chai ovejacunamanta shujtaca tutamantami cuna cangui, caishujtaca chishimi cuna cangui.

40Tutamantaman cuna malta ovejataca chuscu libra yalli alli cutata olivosta tacashpa llujshichishca litro aceitehuan chapushcata cungui. Tallina vinotapish shuj litrota cungui.

41Ña chishiyajpica caishuj malta ovejatapish tutamantaman ima shina cushca shinallataj tallina vinondijllataj cungui. Chaica Mandaj Diospajca pai munashca shina mishquiman ashnacujmi canga.

42Tucui caicunapi nishca shinataca cancunapaj huahua huahuacuna Mandaj Diosman tucui cushpa rupachicuchunllacuna. Chaitaca Dioshuan tupanacuna carpa huasi pungupi Mandaj Diospaj ñaupajpi cuchuncuna. Ñucaca chaipimi cancunahuan parlanacungapaj cancunahuan tandanacusha.

43Chaipimi israelcunahuanca ñucaca tandanacusha. Ñuca tucuita rurai tucuj cashcahuan chaipi cajpimi, chaica ñucapajlla ch'icanchishca saquiringa.

44Dioshuan tupanacuna carpa huasitapish, chaipi tiyaj altartapish ñucapajllatami rurasha. Aarontapish, paipaj churicunatapish ñucapajta ruraj curacuna cachunmi ñucapajllata rurasha.

45Ñucaca israelcunapaj chaupipimi causasha. Ñucaca paicunapaj Diosmi casha.

46Chaimi ñucataca Mandaj paicunapaj Dios cashcata yachangacuna. Paicunapaj chaupipi causangapaj Egiptomanta paicunata llujshichimuj cashcatapishmi yachangacuna. Ñucami Mandaj paicunapaj Dios cani.