DANIEL 11 - Quichua Chimborazo Bible

1Media llajtamanta caj Darío mandai callari huatapish ñucallatajmi paimanca c'ari c'ari cana yuyaita cushpa sinchiyachircani.

Janaj llajta jatun mandajpish ura llajta jatun mandajpish

2Cunanca ñucaca chashnataj tucuna cashcatami canmanca ricuchigrini: Persia llajtapica, quimsa jatun mandajcuna tiyangarajmi. Quimsapaj q'uipa jatun mandajca ñaupaman mandajcunatapish yalli ashtahuan achcata charijmi tucunga. Paica pai achcata charishcahuan c'ari c'ari tucushpami, Grecia llajtata mandajhuan macanacunga.

3Chai q'uipaca shuj c'ari c'ari jatun mandajmi jataringa. Paica yallitaj jatun tucushpa pai munashcata rurashpami tucuita mandanga.

4Ashtahuanpish chashna rurashpa pai mandai callarijpica, pai mandanataca chingachishpami, chuscundij ladoman chaupinga. Chai mandanataca mana paipaj huahua huahuacuna japingachu. Pai mandacushca shinapish mana cangachu. Pai mandacushcata quichujcunami mandangacuna.

5Ura lado llajtata japij jatun mandajca ashtahuan c'ari c'arimi tucunga. Shina cashpapish, pai churashca mandajcunamanta shujmi, paita yalli c'ari c'ari canga. Pai mandanaca ashtahuan ashtahuan jatun tucushpami catinga.

6Asha huatacunapica tandalla canatami ari ninacunga. Ura llajtata jatun mandajpaj ushushi, janaj lado llajtata jatun mandajhuan cazarashpami sumaj causaita ari ninacunga. Shina cashpapish paicuna chashna yuyarishcaca mana sinchita catingachu. Chai huarmitapish paita pushamujcunatapish, paipaj cusatapish, paipaj huahuacunatapish, paihuan cajcunatapish huañuchingami.

7Chashna tucujpipish chai huarmipaj sapipuramanta retoñashca shujmi, paipaj soldadocunahuan shamushpa janaj lado llajtata jatun mandajhuan macanacushpa paicuna sinchi cashcataca urmachishpa tucuita mishanga.

8Chaipi tiyaj dioscunatapish, cullquita yacuyachishpa rurashca dioscunatapish, cullquimanta, curimanta rurashca sumaj charinacunatapish Egiptomanmi apanga. Chai q'uipaca uni huatacunatami janaj lado llajtata jatun mandajhuanca mana macanacunga.

9Asha huatacuna q'uipaca janaj lado llajtata jatun mandajca, ura lado llajta mandanata quichungapajmi ringa. Ashtahuanpish paipaj llajtaman tigrangallami.

10Chaimi chai jatun mandajpaj churicunaca yallitaj p'iñarishpa, achca soldadocunata tandachinga. Paicunaca tucuicuna utca uriyashpami yacu tapaj shina tucuita tapashpa ringa. Chaimantaca jatun mandajpaj torrecamami ringacuna.

11Chaimi ura lado llajtata jatun mandajca yallitaj p'iñarishpa, janaj lado llajtata jatun mandajhuan macanacungapaj llujshinga. Janaj lado llajtata mandajca yallitaj achca soldadocunahuan cashca cashpapish, tucuicunami ura lado llajtata jatun mandajpaj maquipi urmanga.

12Chashna tucujpica, ura lado llajtata jatun mandajca paipaj shungupi yallitaj jatun tucushpami huaranga huarangacunata huañuchinga. Pai chashna jatun tucushcaca mana unipajchu canga.

13Janaj lado llajtata jatun mandajca ñaupata yalli achca soldadocunatami tandachinga. Ña uni huatacuna q'uipaca yallitaj achca soldadocunayuj, alli macanacunacunayuj tucushpami, ura lado llajtata jatun mandajhuan macanacungapaj cutin tigranga.

14Chai huatacunapica, achcacunami ura lado llajtata jatun mandajta p'iñashpa jataringacuna. Muscuipi can ricushca pajtachunmi cambaj llajtapuramantapish yallitaj millai runacuna jataringa. Ashtahuanpish paicunaca mana mishangacunachu.

15Janaj lado llajtata jatun mandaj uriyashpaca, baluartecunata shayachishpami sinchi pircayuj pueblotaca japinga. Chashna rurajpica, ura lado llajta soldadocunaca mana ch'imbapurai tucungacunachu. Ashtahuan c'ari c'ari soldadocunapish mana ch'imbapurai tucungacunachu. Fuerza illaj shina cashcamantami chashna tucunga.

16Janaj lado llajtamanta uriyajca, pai munashcatami ruranga. Paihuan ch'imbapurajca pi mana tiyangachu. Paica tucuita chingachishpami sumaj llajtapi saquiringa.

17Chai q'uipaca ura lado llajtata japingapajca sumaj causaita charinata ari ninacuj tucushpami, tucui pai mandacushca fuerzahuan allichiringa. Chaipajmi paipaj ushushitaca ura lado llajtata jatun mandajmanca cunga. Ashtahuanpish pai yuyashca shina mana rurarijpi chai pajtashcamanta cushicunaca mana tiyangachu.

18Chai janaj lado llajtata mandajca mama cucha uripi tiyaj llajtacunapi causajcunata mishashpami, achca llajtacunata japinga. Chashna ruracujtaca soldadocunata mandaj shujmi paihuan ch'imbapurashpa paita mishanga. Paita chashna mishajpica, ura lado llajtata pingaichicushcaca paipaj jahuallamantajmi tigranga.

19Chaimi janaj lado llajtata jatun mandajca paipaj quiquin pueblopi caj torreman tigranga. Chaipica paica ñitcarij shinami urmashpa chingaringa. Paimantaca pi mana yuyaringachu.

20Paipaj randica shujtaj jatun mandajmi tiyaringa. Chai mandajca pai mandanata jatunpi churangapajmi impuestota japijcunata churanga. Ashtahuanpish paica pi p'iñaj mana tiyajpipish, jatun macanacui mana tiyajpipish asha punllacunallapimi huañunga.

21Paipaj randica, mana mandaj canapaj caj yallitaj millai runami mandaj tucunga. Paica cungaillapi shamushpami mandanataca umashpalla japinga.

22Ña mandanapi cashpaca, paita p'iñajcunataca jatun yacu jundashpa, tucuita apaj shinami chingachinga. Paihuan ari ninacuj mandajndijmi huañuchinga.

23Ama macanacungapaj nishpa paihuan ari ninacujcunatapish umangami. Macanacunaman ashalla gentecunahuan llujshishpapish paimi mishanga.

24Ima llaqui illajlla sumajta, achcata charijyashpa causacujpimi, paica chaiman yaicushpa paipaj yayacunapish, paipaj yayacunapaj yayacunapish mana chashna llaquichishcata llaquichinga. Macanacuipi mishashpa quichushpa japishca achca charinacunataca paipaj soldadocunahuanmi chaupinacunga. Sinchi pircayuj pueblocunata ima shina japinatapish alli allimi yuyaringa. Shina cashpapish, asha punllacunacamallami chashna ruranga.

25C'ari c'ari tucushpa nina sindirij shina p'iñarishpami, ura llajtata jatun mandajhuan macanacungapaj achca soldadocunahuan ringa. Ura lado llajtata jatun mandajpish ashtahuan c'ari c'ari achca soldadocunahuan tucushpami macanacuj shayaringa. Ashtahuanpish paica paipaj soldadocunallataj umajpimi, mana mishanga.

26Paipaj sumaj micunata micujcunallataj llaquichijpimi, paipaj soldadocunataca mishanga. Achcacunami huañungacuna.

27Chai ishqui jatun mandajcunaca paicunapaj shungupica llaquichina yuyaillami cangacuna. Mezapi micushpa tiyacushpapish caishujpish chaishujpish llullangacunami. Shina cashpapish punlla manaraj pajtashcamantaca, maijanpish mana imata rurangachu.

28Janaj lado llajtata jatun mandajca achca charinacunahuanmi paipaj llajtaman tigranga. Paipaj shungupica, jucha illaj Dioshuan israelcuna ari ninacushcata p'iñashpa pai munashcata rurashpa llaquichishpami, paipaj llajtamanca chashna tigranga.

29Tigrana punlla pajtajpimi, ura lado llajtamanca cutin tigranga. Chaipica ñaupaman shinaca mana macanacui tucungachu.

30Quitim llajtamanta soldadocuna barcocunapi shamushpami, paitaca mishanga. Chaimi paica pingai tucushpa huashaman tigrashpaca, yallitaj p'iñarishpa israelcuna Dioshuan ari ninacushcata p'iñashpa pai munashca shina llaquichinga. Dioshuan ari ninacushcata p'aquijcunahuan parlanacushpami paicunapaj allita ruranga.

31Paipaj soldadocunaca Diospaj huasitapish, torretapish yangatami ruranga. Punllanta Diosman cushpa rupachinatapish saquichingami. Chaita saquichishpaca millanana chingachijtami chaipi churanga.

32Dioshuan ari ninacushcata p'aquishpa causacujcunatami catinanqui shimicunata rimashpa inquitanga. Ashtahuanpish Taita Diosta rijsijcunaca sinchi sinchi tucushpa mana umaringacunachu.

33Diospaj cajcunapuramanta yachaisapa cajcunaca achcacunatami yachachingacuna. Chai punllacunapica maijancunataca espadahuanmi huañuchinga. Maijancunataca ninahuanmi rupachinga. Maijancunataca prezumi apanga. Chashna rurashpaca paicuna ima charishcacunatapish apangacunami.

34Paicuna chai llaquihuan cajpica, ashata ayudangami. Achcacunami catinanqui shimicunata rimashpa paicunahuan tandanacuj tucungacuna.

35Diosmanta yachaisapa cajcunamanta maijancunapish ima mapa illajllata, chuyata, yurajllata rurashca cangapajmi llaquichishca canga. Paicuna llaquita apanaca punlla pajtangacamallami canga. Shina cajpipish chai punlla pajtanapajca illanrajmi.

36Chai jatun mandajca, pai munashcata rurashpa, tucui dioscunapaj jahuapi cashcatami yuyanga. Tucui dioscunapaj Taita Diostapish millai shimicunahuan rimashpami uyajcunapajca catinajlla uyaringa. Paica Dios p'iñarishpa llaquichingacamami tucui imapipish alli llujshinga. Paita ima shina llaquichina cashcapish pajtangatajmi.

37Paipaj yayacunapaj Diostapish mana cazungachu. Huarmicunapaj c'uyaitapish mana munangachu. Ima diostapish mana manchangachu. Tucuicunapaj jahuapi cashcatami yuyanga.

38Taita Diosta adoranapaj randica, macanacuipi ayudaj nishca diostami adoranga. Chaica paipaj yayacuna mana rijsishca diosmi canga. Paica curita, cullquita, sumaj rumicunata, achca valij sumaj charinacunata chai diosman cushpami adoranga.

39Shujtaj dioshuan tucushpami, mana urmachipaj muyundij sinchi pircayuj pueblocunatapish japinga. Chai diosta adorajcunataca allicunami canguichij nishpami, achcacunata mandaj cachun churanga. Paicunaman cuna cashcataca allpacunatami chaupishpa cunga.

40Huatacuna ña pajtamujpimi, ura lado llajtata jatun mandajca paihuan macanacugringa. Chaimi janaj lado llajtata jatun mandajca carrocunahuan, caballopi tiyarishca gentecunahuan, achca barcocunahuan tucushpa ura lado llajtata jatun mandajhuan macanacungapaj jatun acapana shina jataringa. Paica ura lado llajtaman yaicushpaca tucuita mishashpami ringa.

41Sumaj llajtamanpishmi yaicunga. Achca llajtacunami paipaj maquipi urmangacuna. Shina cajpipish Edom, Moab llajtacunaca quishpiringami. Amonitacunami ashtahuan yallica quishpiringacuna.

42Shujtaj llajtacunatapish ashtahuan ashtahuanmi mishashpa catinga. Egipto llajtapish mana quishpiringachu.

43Egiptocunapaj curita, cullquita, ima sumaj charinacunataca paimi doñoyanga. Libia, Etiopía llajtacunaca paita catijcunami tucunga.

44Inti llujshin ladomantapish, janaj ladomantapish huillanacuna shamushpami manchachinga. Chaita uyashpaca jatunta p'iñarishpami achcacunata chingachingapaj huañuchingapaj llujshinga.

45Pai mandashpa tiyana huasitaca mama cuchahuan, Diospajlla jucha illaj sumaj urcuhuan chaupipimi shayachinga. Ashtahuanpish pai tucurinaca chaipimi canga. Paita ayudajca pi mana tiyangachu.