LEVÍTICO 20 - Quichua Chimborazo Bible

Mana cazujta llaquichinami

1Mandaj Diosca Moisesta mandashpaca:

2“Israelcunamanca cashna nishpa huillangui: Israelcuna cashpa, israelcunapurapi causaj mana israelcuna cashpa maijanpish Moloc nishca diosman maijan paicunapaj churita cujca huañungatajmi. Paitaca quiquin llajtacunami rumicunahuan shitashpa huañuchingacuna.

3Chai runahuan p'iñarishpami paitaca israelcunapuramanta anchuchisha. Moloc nishca diosman paipaj churita cushpa, ñucapajlla ch'icanchishca huasita mapayachishcamanta, jucha illaj ñuca shutitapish yanganchishcamantami chashna rurasha.

4Moloc nishca diosman churicunata cujcunataca yachashca jahuallataj israelcunaca mana yachashca shina tucushpa mana huañuchijpipish,

5ñucaca chai runahuan paipaj familiahuanpish p'iñarishpami israelcunapuramanta anchuchisha. Chai runa shinallataj Moloc nishca Diosta catishpa huainayajcunandijmi israelcunapuramanta anchuchisha.

6Muspachij yumbucunata, mana cashpaca adivinocunata maijanpish uyashpa paicunata catishpa huainayajcunahuan p'iñarishpami, paicunataca israelcunapuramanta anchuchisha.

7Ñucaca Mandaj Dios cancunapaj Taita Dios cashcamanta, cancunaca ñucapajlla tucushpa ima jucha illajlla caichij.

8Ñuca chaitataj pajtachichun nishcacunata huaquichishpa chaitataj pajtachina yuyailla ruraichij. Mandaj Dios ñucami cancunataca ñucapajlla cachun ch'icanchij cani.

9Maijanpish paipaj yayata paipaj mamata imapish tucushca canman nijca huañungatajmi. Paillataj paipaj yayata paipaj mamata imapish tucushca canman nishcamanta huañushpaca paipaj jahuallatajmi canga.

10Maijanpish shujtajpaj huarmihuan huainayajpica, c'aritapish huarmitapish mana llaquishpalla huañuchichun.

11Maijanpish paipaj yayapaj huarmihuan siririjca, paipaj yaya llatananatami llatanan. Chaimanta c'aritapish huarmitapish huañuchichun. Chai yahuarca paicunapaj jahuallatajmi.

12Maijanpish paipaj churipaj huarmihuan dormijca, yallitaj millaitami ruran. Chaimanta ishquindijtataj huañuchichun. Paicunapaj yahuarca paicunapaj jahuallatajmi.

13Maijanpish c'aripurallataj huarmihuan shina siririshpaca millananatami ruran. Chaicunataca ishquindijtataj huañuchichun. Paicunapaj yahuarca paicunapaj jahuami canga.

14Maijanpish shuj huarmita paipaj mamandij paipaj huarmi cachun japijca yallitaj millaitami ruran. Chaimanta chai runatapish, ishquindij huarmitapish rupachichun. Chashna rurajpimi cancunapurapi yallitaj millaita rurajca mana tiyanga.

15Maijanpish animalhuan chayarijtaca huañuchichun. Chai animaltapish huañuchichun.

16Maijan huarmipish animal paipi chayarichun chai animalpajman c'uchuyajpica, chai huarmitapish chai animaltapish ama llaquishpalla huañuchichun. Paicunapaj yahuarca paicunapaj jahuallatajmi.

17Maijanpish yayamanta cashpa, mamamanta cashpa paipaj panita llatanashpa ricujca, chai panipish paipajta ricujca millananatami ruran. Chaimanta paicunataca tucui israelcuna ricucunpi huañuchichun. Paipaj panita llatanashpa ricushca juchamantaca paillatajmi llaquita apanga.

18Maijanpish quillanta shamuna yahuarhuan caj huarmihuan dormishpa llatanashpa ricujca, chai huarmipaj yahuar llujshicujtami ricun. Chai huarmipish paipaj yahuar llujshicujtami ricuchin. Chaimanta ishquindijtataj israelcunapuramanta anchuchichun.

19Cambaj mamapaj ñañata cashpa, cambaj yayapaj panita cashpa, ama llatanashpa ricungui. Maijanpish quiquin huasi ucupuracunata llatanashpa ricushca juchamantaca paillatajmi llaquita apanga.

20Maijanpish paipaj yayapaj huauquipaj huarmihuan dormijca paipaj yayapaj huauqui llatanashpa ricunatami ricun. Juchayujmi tucunga. Huahuacuna illajmi huañungacuna.

21Maijanpish paipaj huauquipaj huarmita paipaj huarmi cachun japijca, yallitaj millaitami ruran. Paipaj huauqui llatananata llatanashcamantaca, huahuata mana charingacunachu.

22Ñuca tucui chaitataj pajtachichun nishcacunata, ñuca tucui mandashcacunataca, chaitataj rurana yuyailla ruraichij. Cancuna chashna rurajpica, cancuna causachun ñuca churashca llajtaca cancunataca mana shungu tigrangachu.

23Cancunapaj ñaupajmanta ñuca llujshichishpa cachana llajtacuna rurashca shinaca ama ruranguichijchu. Paicunaca chashna millananacunata rurashcamantami ñucapajca millananacuna carca.

24Ashtahuanpish cancunataca cashnami nircani: Cancunami paicunapaj llajtataca japinguichij. Cancunamanca ñucami lechepish sacha chuspipaj mishquipish yacu llujshicuj shina tiyan chai llajtata cancunapaj cachun cusha. Mandaj Dios cancunapaj Dios ñucami cancunataca shujtaj llajtacunamanta ñucapajlla cachun ch'icanyachircani.

25Chaimanta cancunaca maijanlla animal mapa cashcata, mana mapa cashcata, maijanlla alasyuj animal mapa cashcata mana mapa cashcata alli ricunguichij. Chaimanta cancunaca ima animalcunahuan cashpapish, alasyuj animalcunahuan cashpapish, llucashpa purij ima animalcunahuan cashpapish ama mapayanguichijchu. Chaicunataca ñucami mapa cashcamanta ch'icanchircani.

26Mandaj Dios ñucaca ima jucha illaj cashcamanta, cancunapish ima jucha illajlla canguichij. Ñucami cancunataca ñucapaj cachun shujtaj llajtacunamanta ch'icanchimurcani.

27C'ari cashpapish, huarmi cashpapish huañushcacunapaj espirituhuan rimajcuna, mana cashpaca adivino tucujcunaca rumicunahuan shitashcami huañungacuna. Paicunapaj yahuarca paicunapaj jahuallatajmi canga” nircami.