PROVERBIOS 24 - Quichua Chimborazo Bible

1Millaita rurajcuna imata charishcataca,

ama munanguichu.

Paicunahuan tandanacunallatapish

amataj yuyanguichu.

2Paicunapaj shungupica, shuhuanallatami

yuyancuna.

Shimihuanpish millaillatami rimancuna.

3Alli yachaihuanmi huasita shayachirin.

Alli yuyaihuan shayachishcataca, ima

mana cuyuchipajchu.

4Alli yachashcahuanmi huasi ucucunapipish,

shungu cushicuna sumaj charinacunata

jundachirin.

5Yachaisapa runataca, ima mana atinchu.

Alli yachachishca runapajca, imapish

mana llashajchu.

6Jatun macanacuitapish alli

yachashcahuanmi pushana.

Achca alli yachajcuna yuyaita cushcami,

macanacuitaca mishachin.

7Ch'ahuanyashca runapajca alli

yachaicunaca, mana pajtai tucuipaj

jahuamanmi tiyacun.

Pueblo pungu tandanacuipica, shimillatapish

mana pascanchu.

8Pitapish llaquichina yuyailla purijtaca:

“Caica millai shungu runami” nincunami.

9Rumi shungu runaca juchallatami yuyan.

Mana cazushpa asirijtapish, pi mana

ricunachinchu.

10Imata ruranapipish mana c'ari c'ari

cajpica, imapish ashtahuan ashtahuan

sinchimi ricuringa.

11Huañuchinaman apashcacunata

cacharichingui.

Huañunallapi cajcunatapish quishpichingui.

12Can mana yachashcanchijchu nicujpipish,

tucuicunapaj shunguta ricujca ¿imamanta

mana chaita rurashcataca manachu

yachanga imashi?

Paica tucuicunallamantajmi imata rurashca

shinallatataj cunga.

13Ñuca huahualla, sacha chuspi huachashca

mishquitaca japishpa micuilla, allimari.

Cambaj shimipi churashpa mishquichiyari.

14Alli yachaita japinaca cambaj yuyaipajca,

chai shinallataj mishquimari.

Chaita yachashpaca can japina

cashcatapish japinguimi.

Imata shuyacushcatapish mana yanga

shuyashpa saquiringuichu.

15Diosta mana manchaj runa,

cashcata ruraj runataca ama

llaquichinata yuyarichu.

Paipaj huasipi ima tiyashcatapish

ama shuhuagrichu.

16Cashcata ruraj runaca, canchis cutin

urmachijpipish, cutin jataringallami.

Ashtahuanpish Diosta mana manchajcuna

jatun llaquipi huashicushpaca, ña mana

jataringachu.

17Canta p'iñaj runa ima llaquipi

urmajpica, ama asinguichu.

Paita llaqui japijpica shungullapipish

ama cushicunguichu.

18Mandaj Diosca chashnataca mana munanchu.

Paita asishcamanta, p'iñarishpa

llaquichicushcataca paimanta anchuchinman.

19Millaita rurajcunahuanca, ama

tandanacunguichu.

Diosta mana manchaj runacuna ima

charishcatapish ama munanguichu.

20Chai millaicunapajca q'uipataca,

mana cushicui tiyangachu.

Mana manchajcunapaj lamparataca

huañuchingatajmi.

21Ñuca huahualla, Mandaj Diostapish,

jatun mandajtapish cazungui.

Imatapish yuyashpa purijcunahuanca,

ama tandanacunguichu.

22Paicunaca ñapish tucuringallami.

Ishquindij paita tucuchinataca,

pi mana yachanchu.

23Cai sumaj yuyaicunapish jatun yachajcunallataj yachachishcami:

Ima allichina cajpipish, ñahuita

ricushpalla mitsanana mana allichu.

24Millaita ruraj runataraj: “Canca

cashcata rurajmi cangui” nij

mandajtaca, tucuicunami ima llaquipish

tucushca alli canman ningacuna.

Shujtaj llajtacunapi causajcunapishmi

p'iñangacuna.

25Ashtahuanpish millaita rurajcunata

jarcajcunaca cushicungami.

Achca allicunatapishmi chasquinga.

26Alli shimicunata cutichijpaj shimitaca,

muchashcami canga.

27Llujshirishpa imatapish mashcaringuiraj.

Cambaj maquihuan chagrata ruranguiraj.

Chashna rurashpami cambaj quiquin

huasita shayachingui.

28Mandajcunapaj ñaupajpi ama pitapish

yanga llullashpa llaquipi churanguichu.

Cambaj shimihuanca ama pita umanguichu.

29Pi canta llaquichijpipish:

“Paitapish chashnallatajmi rurasha,

ñucata rurashcallatatajmi paimanpish

cutichisha” ama ninguichu.

30Shuj punllami yuyai illaj q'uilla

runapaj allpa c'uchullata rircani.

Yuyaita mana japishca runapaj uva

chagratapishmi ricurcani.

31Chai chagrapica chinipish,

cashacunapish jundashcami carca.

Chai allpa muyundijta pircashca

rumicunapish, t'unirishpa caiman

chaiman urmashcami siricurca.

32Chaita ricushpami ñuca shungupi

aparircani.

Chaihuanca cashna yuyaitami japircani:

33Umata caiman chaiman singuchishpa,

maquicunata cruzashpa, ashahuan dormisha,

ashahuan samarisha nishpa dormicujllapimari,

34Ima illaj saquirinaca, puricujlla

runa shina chayamuj cashca.

Chaimantamari huajcha saquirinaca,

huañuchij runa shina chayamuj

cashca yuyarcanimi.