1¡Israel, Mandaj cambaj Taita Diospajman cutiriyari.
Canca cambaj juchallamantatajmi urmashcangui!
2Mandaj Diospajman cutirishpa cashna nishpa rogarichij:
“Millaita ñucanchij rurashcataca tucuita anchuchi.
Ñucanchij rogarishcataca c'uyaihuan chasquipai.
Chaipica ñucanchij shimihuan cantashcatami quiquinmanca cushun.
3Asiriocuna quishpichinatapish mana yuyanchijchu.
Caballocunapi tiyarishpa mishashpa quishpirinatapish mana yuyanchijchu.
Ñucanchij maquihuan rurashca dioscunatapish ña nunca: Caimi ñucanchij dios mana nishunchu.
Yaya mama illaj tucushca ñucanchijca quiquinpimi llaquij cashcataca chasquinchij” nishpa mañanguichij.
4“Israelcuna chashna mañajpica Taita Diosca cancuna c'ariyashcataca ñucami alliyachisha.
Mana c'uyaipajtami c'uyasha.
Ñuca p'iñarinaca, paicunamantaca anchunmi.
5Ñucaca israelcunapajca shulla shinami casha.
Paicunaca lirio shinami sisanga.
Paicunaca Líbano yuracunapaj sapicuna shinami ucujta ringa.
6Paicunapaj ramacunaca yallitajmi suniyanga.
Olivo shina sumajmi canga.
Líbano urcu shina mishquiman ashnacujmi canga.
7Paicunapaj llandu ucupi tiyanamanmi tigrangacuna.
Trigo shinami cutin huiñangacuna.
Uva shinami sisangacuna.
Líbano vino shina mishquiman ashnacujmi cangacuna.
8Efrainca: Rurashca dioscunaca ñucapajca imapaj mana valinchu ningami.
Chashna nijpica ñucaca pai mañashcataca uyashami, ricushami”.
Ñucaca paipajca verdijlla pino yura shinami casha.
Ñucapimi p'ucushca granotaca japinga.
9Caita entendingapajca ¿pitaj yachaisapari?
Caicunata yachangapajca ¿pitaj alli yuyaiyugri?
Mandaj Diospaj ñancunaca mana huishtuchu.
Chai ñancunataca cashcata rurajcunallami puringa.
Ashtahuanpish paita c'ariyajcunaca chai ñanllapitajmi ñitcarishpa urmangacuna.
Who We AreWhat We EelieveWhat We Do
2025 by iamachristian.org,Inc All rights reserved.
