ÉXODO 3 - Quichua Chimborazo Bible

Moisesta Taita Dios cayashcami

1Moisesca Madián llajtapaj cura caj paipaj suegro Jetropaj ovejacunata michishpami chai llajtapi causarca. Moisesca shitashca pambata ovejacunata michinaman rishpaca, Horeb shuti Taita Diospaj urcucamami chayarca.

2Chaipica zarza yura chaupipi nina lunyacunpimi, Mandaj Diospaj ángel ricurirca. Chai zarza yurapi nina lunyashpa rupajpipish zarza yuraca mana ima tucujtami Moisesca ricurca.

3Chaimi Moisesca: “Nunca mana ricushcatamari ricuni. Ima nishpashi zarza yuraca mana rupan” nishpami ricunaman rirca.

4Moisés ricunaman c'uchuyacujpica Mandaj Diosca zarza yura chaupimantami:

–¡Moisés, Moisés!– nijpi paica:

–Caipimi cani– nirca.

5Chaimi Taita Diosca:

–Caimanca ama c'uchuyamuichu. Can shayacun cai allpaca ñucapajlla cashcamanta cambaj chaquimanta pargateta llujshichi– nirca.

6Taita Diosca cashnapishmi nirca:

–Ñucaca cambaj yayapaj Dios, Abrahampaj, Isaacpaj, Jacobpaj Diosmi cani– nijpimi, Moisesca Taita Diosta ricunata manchashpa, paipaj ñahuita taparirca.

7Chai q'uipaca Mandaj Diosca:

–Ñuca agllashcacuna Egipto llajtapi ima shina llaquita apacujtaca ñucatajmi ricuni. Paicunata llaquichijcuna llaquichicujpi paicuna caparishcataca uyanimi. Paicuna llaquita apacujtaca ñuca ñahuihuantajmi ricuni.

8Chaimi egipciocunapaj maquimanta cacharichingapaj uriyamurcani. Chai llajtamanta llujshichishpaca cananeocuna, heteocuna, amorreocuna, ferezeocuna, heveocuna, jebuseocuna causan lechepish, sacha chuspipaj mishquipish yacu llujshicuj shina tiyan shuj jatun sumaj llajtamanmi pushagrini.

9Israelcuna caparishpa mañashcaca ñuca ñaupajmanmi chayan. Egipciocuna ima shina jatunta llaquichijtaca ñuca ñahuihuantajmi ricuni.

10Cunanca faraonpajman utcashpa rilla. Ñucaca cantaca ñuca agllashca israelcunata chai llajtamanta llujshichichunmi mandani– nircami.

11Chaimi Moisesca Taita Diostaca:

–Faraonpajman rishpa, israelcunata Egiptomanta llujshichimungapajca ñucaca ¿pitaj caniyari?– nirca.

12Taita Diosca:

–Ñucamari canhuan casha. Ñuca quiquintaj canhuan cashcata ricuchijca caimi canga: Egiptomanta israelcunata ña llujshichimushpaca, cai urcu jahuapimi Taita Diosta adoracunguichij– nircami.

13Shina nijpipish Moisesca Taita Diostaca:

–Israelcunapajman ñuca chayashpaca: Cancunapaj ñaupa yayacunapaj Diosmi ñucataca cancunapajman cachan nijpi, paicunaca: Paipaj shutica ¿ima shutitagari? nijpica, ¿imatataj nishari?– nircami.

14Taita Diospish Moisestaca:

–ÑUCACA ÑUCAMI CANI– nircami. Israelcunamanca: ÑUCAMI CANI nijmi cancunapajman cachan ningui– nircami.

15Taita Diosca Moisestaca cashnapishmi nirca:

–Israelcunamanca: Cancunapaj ñaupa yayacunata Mandaj Taita Dios Abrahampaj, Isaacpaj, Jacobpaj Diosmi cancunapajman cachan ningui. Ñuca shutica, huiñaipaj chaillatajmi. Chai shutipimi, ñucataca huiñaita yuyaringacuna.

16Israelcunata cunaj yuyajcunata tandachishpa cashna nigri: Cancunapaj ñaupa yaya Abrahampaj, Isaacpaj, Jacobpaj Mandaj Diosmi ñucaman ricurishpa cashna nin: Cancunata Egiptopi ima shinalla llaquichicujta ricushpami, cancunata ricuj shamurcani.

17Ñucami cancunataca Egiptopi llaquita apacunmanta llujshichishpa, cananeocuna, heteocuna, amorreocuna, ferezeocuna, heveocuna, jebuseocuna causacun lechepish, sacha chuspipaj mishquipish yacu llujshicuj shina tiyan llajtaman pushasha ninmi ningui.

18Paicunaca can nishcatami uyanga. Egiptota jatun mandajpajmanca canpish cunaj yuyajcunapish rishpaca: Hebreocunapaj Mandaj Diosmi ñucanchijhuan tuparca. Chaimantami caimantaca quimsa punllata shitashca pambata rishpa, ñucanchijta Mandaj Diosman animalcunata cushpa huañuchigrishun ninchij ninguichij nircami.

19Egiptota jatun mandaj cancuna richun mana saquina cashcataca yachanimi. Ashtahuanpish sinchi maquihuan llaquichijpimi saquinga.

20Ashtahuanpish Egiptopi causajcunataca, ñuca maquita chutashpa chai llajtapi mancharinacunata rurashpa paicunata llaquichijpimi, israelcunataca richun saquinga.

21Cancuna chai llajtamanta llujshicushpa, ama chushaj maquilla llujshichunca Egiptopi causajcunamanca, cancunata llaquina yuyaitami cusha.

22Tucui huarmicunami egipcia huarmicunataca cancunapaj c'uchullapi causajcunatapish, cancunallahuantaj causajcunatapish, cullquimanta, curimanta rurashca sumaj charinacunata, churanacunatapish mañana canguichij. Chaicunatami cancunapaj churicunamanpish, ushushicunamanpish churachinguichij. Chashnami egipciocuna imalla charishcacunata quichushpa ringuichij ningui– nircami.