JUECES 3 - Quichua Chimborazo Bible

Mandaj Diosta cazujta mana cazujta israelcunata ricungapaj manaraj llujshichishpa cachashca llajtacunami

1Canaanta japingapaj israelcuna macanacucujpi manaraj huacharishca israelcunata cazujta mana cazujta ricungapajmi Mandaj Diosllataj paicunataca saquirca.

2Macanacuipi nunca mana caj q'uipa huiñai israelcuna ima shina macanacunata yachachunpishmi saquircaraj. Chai llajtacunaca caicunami:

3Filisteocunata pichca jatun mandajcuna, tucui cananeocuna, sidoniocuna, Lívano urcupi causaj heveocunapishmi carca. Paicunaca Baal-hermón urcumantaca, Hamatman rinacamami causarcacuna.

4Israelcunataca paicunapaj yayacunaman Moisesta huillachishca pai mandashcacunata cazujta, mana cazujta ricungapajmi chai gentecunataca chaillapitaj saquirca.

5Chashnami israelcunaca cananeocunahuan, heteocunahuan, amorreocunahuan, ferezeocunahuan, heveocunahuan, jebuseocunahuan chagru causarcacuna.

6Israelcunaca mana israelcunapaj ushushicunatapishmi paicunapaj huarmi cachun japircacuna. Paicunapaj ushushicunatapish mana israelcunapaj churicunamanmi curcacuna. Chashna rurashpaca mana israelcunapaj dioscunapajtapishmi rurarcacuna.

Israelcunata Cusan-risataim llaquichicujpi Otoniel quishpichishcami

7Israelcunaca Mandaj Diospaj ñaupajpica millaita rurashpami, paicunata Mandaj Diostaca cungarircacuna. Baal dioscunatapish, Asera huarmi diosman rijchajta rurashca dioscunapajtapish rurashpami causarcacuna.

8Chaimantami Mandaj Diosca israelcunahuanca nina sindirij shina yallitaj p'iñarishpa, Mesopotamia llajtata jatun mandaj Cusan-risataimpaj maquipi churarca. Israelcunaca pusaj huatatami chai mandajpajta rurashpa causarcacuna.

9Chaipi llaquita apacushpami, israelcunaca Mandaj Diosta caparishpa mañarcacuna. Chaimi Mandaj Diosca paicunata llujshichichunca shuj pushajta churashpa chai llaquimanta llujshichirca. Chai runaca Calebpaj q'uipa huauqui Cenazpaj churi Otonielmi carca.

10Otonielca Mandaj Diospaj Espíritu paipaj jahuaman shamujpimi, israelcunapaj juez tucurca. Pai macanacunaman llujshijpica Siria llajtata jatun mandaj Cusan-risataimtaca Otonielpaj maquipimi Mandaj Diosca churarca. Chaimi Otonielca Cusan-risataimtaca misharca.

11Otoniel mandacui chuscu chunga huatacunataca israelcunaca sumajtami causarcacuna. Chai q'uipami Cenazpaj churi Otonielca huañurca.

Israelcunata Moabitacuna llaquichicujpi Aod quishpichishcami

12Israelcunaca cutinllatajmi Mandaj Diospaj ñaupajpi millaita rurarcacuna. Paicuna Mandaj Diospaj ñaupajpi millaita rurashcamantaca, Moab llajtata jatun mandaj Eglontami israelcunata llaquichichun paicunata yalli c'ari c'arita Mandaj Diosca rurarca.

13Chaimi Moab llajtata jatun mandajca Amón llajtahuan, Amalec llajtahuan tandanacushpa shamushpaca, israelcunata huañuchishpa Palmera yuracuna tiyan pueblota quichurcacuna.

14Chaimi israelcunaca chunga pusaj huatacunata, Moab llajtata jatun mandaj Eglonpajta rurashpa causarcacuna.

15Chaipi llaquita apacushpami, israelcunaca Mandaj Diosta caparishpa mañarcacuna. Mandaj Diosca paicunata llujshichichunca Benjamín aillumanta Gerapaj churi Aodtami agllarca. Aodca lluquimi carca. Israelcunaca Moab llajtata jatun mandaj Eglonman convidanata cugrichunmi Aodta cacharcacuna.

16Aodca, ishqui filoyuj chaupi metro shina suni espadatami rurashca carca. Paica churana ucupi chumbillirishpami alli lado changa uripi aparca.

17Chashna rishpami Aodca, Moab llajtata jatun mandaj Eglonman convidanata curca. Eglonca gordoyashca runami carca.

18Convidanata cushca q'uipaca, Eglonca Aodtaca paihuan shamujcunandij caya minchacama nishpami cacharca.

19Chaimanta tigracushpaca rurashcalla dioscuna tiyan Gilgalman ñalla chayagricushpami, Aodca Eglonpajman tigrarca. Ña chayashpaca:

–Jatun mandaj, quiquinlla yachana shuj huillanatami charini– nijpimi Eglonca, paipajta rurajcunataca upajlla canllaman llujshichij nirca.

20Ña tucui llujshijpica, usia punllacunapi tiyana ucupi paicunalla saquirishpami Aodca:

–Can jatun mandajmanca, Dios ima nishcatamari huillaj shamuni– nijpimi Eglonca, pai tiyanamanta jatarirca.

21Pai jatarijpica Aodca, alli lado changamanta lluqui maquihuan espadata surcushcahuanmi Eglonpaj huijsapi satirca.

22Eglonca yallitaj gordoyashca cajpimi, espadata satijpica maqui lutsanandij tucui yaicurca. Chaimi Aodca espadata mana surcui tucushpa chaillapitaj saquijpi mapa llujshirca.

23Aodca, corredorman llujshishpami, pungucunata jatun fierro aldabahuan alli churashpa llujshishpa rirca.

24Ña llujshishpa rishca q'uipa jatun mandajpajta rurajcuna shamushpaca, usia punllacunapi tiyana ucupaj pungucuna huichcashca cashcata ricushpaca: “Jatun mandajca usia punllacunapi tiyana ucupi mapangapajmari huichcarishca canga” ninacurcacuna.

25Ña unita shuyashca q'uipa punguta mana pascajpi caita chaita yuyacushpallami, llaveta japishpa punguta pascashpaca, jatun mandajtaca pambapi huañushca siricujta japircacuna.

26Paicuna chashna uniyangacamaca Aodca utca rishpami, rurashcalla dioscuna tiyan Gilgalta pasashpa Seiratpi miticushpa quishpirirca.

27Israel llajtaman chayashpaca, Aodca tucuicunata tandachingapajmi Efraín urcupi gachupi tocarca. Tucuicuna tandanacushpami chai urcumanta paihuan uriyamurca. Aodca paicunata ñaupashcami uriyamurca.

28Chaipimi Aodca: “Cancunata p'iñaj moabitacunataca Mandaj Diosca cancunapaj maquipimari churashca. Ñucata catishpa jacuchijlla” nirca. Paicunaca Aodta catishpa rishpami, Jordán yacuta ch'imbanallapi junda shayarishpa, moabitacunataca shujllatapish ch'imbachun mana saquircacuna.

29Chaipimi moabitacunataca 10.000 runacunata huañuchircacuna. Paicunaca c'ari c'aricuna, alli macanacunata yachajcuna cashpapish shujllapish mana quishpirircacunachu.

30Chashnami moabitacunaca israelcunapaj maquipi ñapish urmarcacuna. Chaimantaca israelcunapaj llajtapica pusaj chunga huatacunatami sumaj causai tiyarca.

Israelcunata filisteocuna llaquichicujpi Samgar quishpichishcami

31Aodpaj q'uipaca, Anatpaj churi Samgarmi israelcunapaj juez tucurca. Paimi filisteocunataca huagracunata tujsina garrochahuan, 600 runacunata huañuchirca. Chashnami paipish israelcuna llaquita apacushcamantaca quishpichirca.