2 CRÓNICAS 35 - Quichua Chimborazo Bible

Pascua punlla micuita Josías rurachishcami(2 R 23.21-23)

1Josiasca, Mandaj Diosta jatunyachingapajmi, Jerusalenpica Pascua punllata rurarca. Huata callari quillapaj chunga chuscu punllapimi, chai Pascua punllata yuyarishpa, Diosman sacrificiota curca.

2Curacunataca Mandaj Diospaj huasipimi Diospajta ruranallapitaj churarca. Chai ruranacunapi churashpami, ama q'uillashpa Diospajta rurachun yuyaita curca.

3Levitacunaca tucui israelcunata yachachijcunami carca. Shinallataj Mandaj Diospajta rurangapajpish, chai yuyaimi carcacuna. Paicunataca Josiasca cashnami nirca: “Diospajlla arcataca Diospaj cachun Davidpaj churi jatun mandaj Salomón israelcunata mandacushpa shayachishca cai huasi ucupi churaichij. Cai arcataca ña mana cancunapaj rigra jahuapi maiman apanachu canguichij. Cunanca cancunata Mandaj Taita Diospajta ruranallapi yuyaita churaichij. Mandaj Dios agllashca israelcunapaj randi paipajta ruraichij.

4Israel llajtata jatun mandaj Davidpish, paipaj churi Salomonpish quillcashpa saquishca shinallataj, cada familiapura huashan huashan shamushpa Diospajta ruraichij.

5Diospajta rurangapaj cada familiapuramanta shuj mirga saquirichij. Chai saquirijcunami, cancunapaj huauqui israelcunapaj randi Diospajta rurajcuna.

6Pascua punllapi huañuchina animalta cushpa huañuchichij. Diospajta rurangapaj allichirichij. Chashna allichirishpaca, imalla rurana illashcatapish ruraichij. Chashna rurajpimi cancunapaj huauqui israelcunaca, Mandaj Dios mandashpa Moisesta huillachishcataca pajtachi tucungacuna” nircami.

7Chai q'uipaca jatun mandaj Josiasllatajmi, chaipi caj israelcunamanca chai Pascua punllapi huañuchichun, paipaj quiquin animalcunata curca. Ovejacunata, malta c'ari ovejacunata, chivocunataca, 30.000 shinatami curca. 3.000 huagracunatapishmi curca.

8Shinallataj jatun mandaj Josías churashca mandajcunapish, chaipi caj israelcunaman, curacunaman levitacunamanpishmi Diosman cushpa rupachichun animalcunata curcacuna. Diospaj huasipi Diospajta ruraj Hilcías, Zacarías, Jehiel shuti curacunapish chai Pascua punllapi huañuchingapajmi curacunamanca, 2.600 animalcunata curcacuna. Shinallataj 300 c'ari huagracunatapishmi curcacuna.

9Conaniaspish, paipaj huauqui Semaiaspish, Natanaelpish, Hasabiaspish, Jeielpish, Josabadpish levitacunata mandajcunami carca. Paicunaca levitacunamanca Pascuapi huañuchingapajca 5.000 ovejacunata, 500 c'ari huagracunatami curcacuna.

10Chashna tucuita allichishpami, curacunaca Diospajta paicuna ima shinalla rurana cashcata japircacuna. Levitacunapish jatun mandaj mandashca shinallatajmi huashan huashan Diospajta rurangapaj alli yuyarinacurcacuna.

11Chashna allichirishpami, Pascua punllapi huañuchina animalcunata cushpa huañuchircacuna. Levitacuna chai animalcunapaj yahuarta cujpimi, curacunaca chai yahuarta altar jahuapi tsiraparcacuna.

12Chai q'uipami, tucui rupachina animalcunamanta aichata japishpaca, Moisés quillcashca mandashcapi nicushca shina israelcunapaj cada familiaman mirga mirgata curcacuna. Huagracunata huañuchishpapish chashnallatajmi rurarcacuna.

13Chai q'uipaca mandashcapi nicushca shinallatajmi, chai huañuchishca animalcunapaj aichata cusashpa, Pascua micuita rurarcacuna. Diospajlla cushcataca mangacunapi, jatun pailacunapi, sartencunapi utca yanushpami tucuicunaman cararcacuna.

14Chai q'uipami, levitacunaca paicunapajllatajpish, Aaronpaj huahua huahuapura curacunapajpish paicuna micuna cashcata allichircacuna. Curacunaca tutayangacamami, animalcunata cushpa tucui rupachircacuna. Shinallataj huiratapish cushpami rupachircacuna. Chaita rurashpa mana pajtaricujpimi, levitacunaca paicunapajllatajpish, Aaronpaj huahua huahuapura curacunapajpish, paicuna japina cashcata allichircacuna.

15Asaf shuti levitapaj huahua huahuapura cantajcunapish Davidhuan Asafhuan, Hemanhuan, Jedutunhuan yuyarinacushpa mandashca shinallatajmi cantanapi carcacuna. Jedutunca Dios ricuchishcata jatun mandajman huillajmi carca. Cuidaj levitacunapish, paicuna maijanlla pungucunapi cuidana cashcallapitajmi cuidarcacuna. Paicunapajpish caishuj levitacunami Diosman cushca animalcunamanta paicuna japina cashca aichataca allichircacuna. Chaimantami paicunapish paicuna cuidacushcamantaca, maiman mana anchurircacuna.

16Chashnami chai Pascua punllapica sumajta yuyarinacushpa allichishpa, Mandaj Diospajta rurarcacuna. Jatun mandaj Josías mandashca shinallatajmi animalcunataca Mandaj Diosman cushpa, Diospaj altarpi tucui rupachircacuna.

17Chai tandanacushca tucui israelcunami Pascua q'uipaca canchis punllacama levadura illajlla tandata micushpa jatun fiestata rurarcacuna.

18Israel llajtapica pascua punllataca, profeta Samuel huañushcamantapacha, ña mana chashna rurashcacunachu carca. Israel llajtata jatun mandajcunapuramantaca maijan jatun mandajpish, chai Pascua punllataca mana jatun mandaj Josías shinatajca rurashcacunachu carca. Paica curacunata, levitacunata, tucui Judá llajtapi causajcunata, Israel llajtapi causajcunamanta taucacuna Jerusalenman shamushcacunatapish tandachishpami, Pascua punlla micuita rurarca.

19Josiasca Judá llajtata ña chunga pusaj huatacunata mandacushpami, Pascua punllata yuyarishpa chashna rurarca.

Josías huañushcami(2 R 23.28-30)

20Pascua punllata chashna yuyarishcapish, Mandaj Diospaj huasita Josías tucui allichishcapish ñami uni carca. Shuj punllami Egiptota mandacuj Necao jatun mandajca, Éufrates jatun yacu c'uchupi caj Carquemis pueblopi macanacungapaj paipaj soldadocunahuan huichiyarca. Chashna ricujpimi Josiasca, macanacungapaj tupanaman llujshirca.

21Necaoca, Josiasta cashna nichunmi huillajcunata cacharca: “Judá llajtata mandajlla, canhuanca imamanta macanacunata mana charinichu. Cunanca ñucata p'iñachij shujtajcunahuanmi macanacugricuni. Diosllataj ñucahuan cashpami ñucataca chaiman utca richun mandarca. Ñucaca Dios mandashcami ricuni, ama jarcaichu. Ñataj pai canta llaquichinman” ninmi nichunmi cacharca.

22Necaotaca, Taita Diosllatajmi chashna huillanaman cachachun mandarca. Chashna cajpipish Josiasca, huillanaman cachashcata mana cazushpami, shujtaj churanata churarishpa, paihuan macanacugrirca. Paica Necaohuanca, Meguido pambapimi macanacurca.

23Egipto soldadocunami jatun mandaj Josiastaca, arcohuan puntajlla caspita shitarca. Chai caspi chugrichijpimi, paica paipajta rurajcunataca: “Achca chugririshcamari cani, caimanta ñucata llujshichichij” nirca.

24Chashna nijpimi, paipajta rurajcunaca chai carromanta llujshichishpaca, paillataj charishca shujtaj carropi churarcacuna. Chai carropimi Jerusalenman aparcacuna. Chaipimi paica huañurca. Paitaca paipaj ñaupa yayacunata pambashcallapitajmi pambarcacuna. Josías huañushcamantaca, tucui Judá llajtapi causajcunapish, Jerusalenpi causajcunapishmi huacarca.

25Jeremiasmi pai huañushcamantaca pai alli cashcata yuyachij shimicunahuan yupashpa yupashpa huacarca. Cantaj c'aricunapish, huarmicunapish cunan punllacamami Josías huañushcata yuyarishpa, yupashpa yupashpa huacancuna. Israelcunaca huahua huahuami maijan huañui punllapica, chai shimicunallatataj rimashpa, yupashpa yupashpa huacancuna. Chai shimicunaca, huañui punllapi huacana shimicunapurallami quillcashca tiyacun.

26Josiasca, pai causacushpaca achca allicunatami rurarca. Shinallataj Mandaj Dios mandashcata quillcashcapi nicushca shinallatajmi shujtajcunata llaquishpa paicunapaj allita rurarca.

27Josías ashtahuan imallata rurashcatapish Israel llajtata jatun mandajcuna imallata rurashcata, Judá llajtata jatun mandajcuna imallata rurashcata quillcashcapimi, callarimantapacha quillcashca tiyacun.