PROVERBIOS 20 - Quichua Chimborazo Bible

1Vinopish, sidrapish mana cazushpa

asijta, caparirishpa rimarijta

ruranllami.

Panda yuyaita japishpa chashna

machashpalla purijca, yachaisapa

cashcataca mana ricuchinchu.

2Jatun mandaj p'iñarijpica,

huacaricuj león shina manchananami.

Pipish paita p'iñachishpaca,

quiquinllatajmi huañuita mashcan.

3P'iñanacuipi yaicunata jarcarinaca,

pitapish alli nishcatami ruran.

Ashtahuanpish ch'ahuanyashcacunaca,

p'iñanacuipi yaicunllami.

4Q'uilla runaca tamyacunmi nishpa

mana yapunchu.

Chai runaca chagrata tandana punlla

llujshirishpapish, imata mana japinchu.

5Shungullapi charishca yuyaicunaca,

ucujman tiyacuj yacu shinami.

Shina cajpipish, yuyaisapa runallami

chaitaca llujshichinga.

6Achcacunami allitami ruranchij

nincuna.

Shina cashpapish allita ruraipajtaj

runataca ¿pitaj japingari?

7Cashcata rurashpa, ima pandata

mana rurajca, huahuacunatapish cushi

causaipimi saquin.

8Ima rurashcata ricungapaj jatun mandaj

tiyarishpaca, millaita rurashcataca ñahui

ricuillahuantaj llujshichinllami.

9¿Pitaj: “Ñucaca ñami juchataca

saquircani, chuya shungumi cani” ni

tucungari?

10Pizanapi shuhuachunpish, medinapi

shuhuachunpish, Mandaj Diosca

manataj ricunachinchu.

11Huambraraj cashpapish chuya, alli

shungu cashcataca pai rurashcapi

ricunallami.

12Ricuj ñahuitapish, uyaj rinrintapish,

Mandaj Diosmi churashca.

13Ama huajcha causangapajca,

dormicunallataca ama yalli munangui.

Dormicunallata saquishpaca,

micunapajllapish pajtatami charingui.

14Randij runaca randinataca,

mana allichu nishpami huahuayan.

Shina cashpapish ña randishpaca,

alli nishpami cushicun.

15Curipish, achij nicuj sumaj

rumicunapish achcami tiyan.

Alli yuyaiyujcunapaj shimicarin,

achca valij charinamari.

16Mana rijsishca runapaj garante

tucujtaca, cullquita cungacama

churanatapish, imatapish quichushpa

saquichingui.

17Umashpalla imata japishpaca, mishqui

micuita micuj shinami cushicuncuna.

Chashna cashpapish q'uipataca, rumi

allpata shimi jundata amullishca

shinami saquirin.

18Imata yuyarinacushcapish,

cunashcahuanmi alli llujshin.

Alli pushajcunahuanmi jatun

macanacuitapish rurarin.

19Parlarijlla runaca shujtajcuna mana

yachanatapish cacharinllami.

Chashna c'allu cacharishca runahuanca,

pajta tandanacunguiman.

20Quiquin yaya mamata llaqui tucushca

alli canman nij runaca, mancharina amsa

tuta shinapimi jatun llaquipi huañunga.

21Jahualla japishca charinacunaca,

q'uipataca ima cushicuita mana cunchu.

22Canta llaquichijpica, tigra

llaquichishami ama niringuichu.

Ashtahuanpish Mandaj Diosllapi

shunguta churangui.

Paimi cantaca llaquimanta llujshichinga.

23Mandaj Diosca pizashpa shuhuajcunataca,

manataj ricunachinchu.

Mana alli balanzacunata charinaca,

mana allichu.

24Mandaj Diosmi tucuicunapaj causaita

paipaj maquipi charicun.

Pipish quiquin causai ima shinalla

canataca ¿ima shinataj yachangari?

25Mandaj Diosman imata cusha ningapajca,

alli yuyaringuiraj.

Yuyarishcahuan quiquin shimihuan ari

nishca q'uipa, mana pajtachinaca

urmana linchi shinami.

26Yachaisapa jatun mandajca, Diosta

mana manchajcunataca trillana

fierrocunapi granota ñutuchishpa,

ujshata huairapi cachaj shinami chingachin.

27Mandaj Dios cushca almaca,

ñucanchij shunguta achijyachichun pai

japichishca lámpara shinami.

Chaimantami ñucanchij shungupi imalla

yuyai tiyashcataca callarishpa ricucun.

28Jatun mandajca, llaquishpataj tucuicunapaj

allita ruraj, c'uyaj cashpallami, pai

mandanataca piman mana quichuchishpa

mandashpa causanlla.

29Huambrarajcunaca, fuerzasapa

cashpami cushicuncuna.

Yuyajcunaca, yurajlla ajchahuanmi

sumaj ricurincuna.

30Sinchita macashpa chugrichishcaca,

millai runapajca jambimi.

Sinchita llaquichishcami shungutaca

allichin.