ÉXODO 26 - Quichua Chimborazo Bible

Diospaj carpa huasipaj jatun carpata rurachun mandashcami(Ex 36.8-38)

1Diospaj carpa huasipajca lino puchcata caupushpa ahuashca chunga cortinacunata rurangui. Chai cortinacunaca azul, morado, amsa puca cachun. Cortinacunataca querubincunayujta bordashcata ahuangui.

2Cortinacunaca cada shuj sunimanca chunga ishqui metro sujta chunga centímetro, anchomanca shuj metro pusaj chunga centímetro cachun. Cortinacunaca tucuicuna chai medidallatataj charichun.

3Pichca cortinacunaca caishujhuan chaishujhuan tupachishpa sirashpa shujllata ruranapaj cachun. Caishuj pichca cortinacunapish caishujhuan chaishujhuan tupachishpa sirashpa shujllata ruranapaj cachun.

4Punta pichca cortinacunata shujllata rurashca cortina uripica, morado puchcahuan rinrincunata rurashpa churangui. Caishuj pichca cortinacunata shujllata rurashca filopipish chashnallataj rinrincunata churangui.

5Punta pichca cortinacunata shujllata rurashca carpa filopica, pichca chunga rinrincunata rurangui. Caishuj pichca cortinacunata shujllata rurashca carpa filopipish pichca chunga rinrincunata rurangui. Chai rinrincunaca caishujhuan chaishujhuan ch'imbapurashpa siranapajmi canga.

6Pichca chunga curi ganchocunata rurashpa, chai ganchocunahuanca caishuj ladomanta chaishuj ladomanta churachingui. Chashnami Diospaj carpa huasica shuj carpa shinalla saquiringa.

7Diospaj carpa huasi c'ata jahuata c'atanapajca, chivo millmamanta chunga shuj cortinacunata sirashpa shuj jatun carpata rurangui.

8Chai cortinacunaca sunimanca chunga quimsa metro pichca chunga centímetro, anchomanca shuj metro pusaj chunga centímetro cachun. Chunga shuj cortinacunataj chai medidallataj cachun.

9Pichca cortinacunataca caishujhuan chaishujhuan ch'imbapura sirashpa shujllata rurangui. Caishuj shujta cortinacunatapish caishujhuan chaishujhuan ch'imbapurashpa sirashpa shujllata rurangui. Ñaupaj lado urita sujtapurapi shuj cortina yallishcataca pataringui.

10Ch'imbapurashpa sirana filopica pichca chunga rinrincunata rurangui. Ch'imbapurashpa sirana caishuj cortinapipish pichca chunga rinrincunallatataj rurashpa churangui.

11Pichca chunga bronce ganchocunatapish rurangui. Chaicunataca caishujhuan chaishujhuan churachingui. Ishquindijta tupachishpa sirashca jahuapi caishujmanta chaishujmanta churachijpimi, shuj carpa shinalla saquiringa.

12Diospaj carpa huasita c'atajpi huasha lado urita yallijpica, chai urita huarcushca cachun saquinguilla.

13Suniman yallishcataca, ishquindij lado quinriman chai valillatataj huarcushcata saquingui. Shuj ladoman chuscu chunga pichca centimetrota, caishuj ladomanpish chuscu chunga pichca centimetrota lado urita tapachun saquingui.

14Chai jahuata c'atanapajca carnero caracunata pucajllata tiningui. Cutin chai jahuata c'atanapajpish tejonpaj carata rurangui.

15Diospaj carpa huasipajca acacia caspimanta derecho tablacunata rurangui.

16Chai tablacunaca sunimanca chuscu metro pichca chunga centímetro, anchomanca sujta chunga canchis chaupi centímetro cachun.

17Chai tablacunataca ishquindijmanta shujlla shinata rurangapaj cada tablata ishqui espigacunayujta rurachun. Diospaj carpa huasita shayachinapaj tablacunaca tucuicuna chai shinallataj cachun.

18Diospaj carpa huasipaj tablacunataca ura ladopajlla ishqui chunga tablacunata rurangui.

19Chai tablacunataca cullquimanta chuscu chunga basacunata rurashpa chaipi shayachingui. Cada tablata ishqui basacunapi espigacunata satichishpa shayachingui.

20Diospaj carpa huasi janaj lado quinripajpish, ishqui chunga tablacunallatataj rurangui.

21Chaicunata shayachingapajpish, chuscu chunga basacunata cullquillamantataj rurangui. Cada tablata ishqui basacunapi shayachingui.

22Diospaj carpa huasipajca, inti huashicun lado patapajca sujta tablacunata rurangui.

23Ishqui esquina tabla huasha ladoman shayachinapajca shujtaj ishqui tablacunata rurangui.

24Chai tablataca caishuj tabla huasha ladoman shayachijpi, ucumanta jahuacama shujlla cachun bisagrahuan churachishpa shayachinapaj cachun. Caishuj ishqui esquinapajpish chashnallatataj rurangui.

25Huasha ladopajca pusaj tablacunata rurangui. Chai tablacunata shayachinapajca cullquimanta chunga sujta basacunata rurangui. Cada tablata ishqui basacunapi shayachingui.

26Chai carpa huasipaj tablacunapi quinriman churanapajca, acacia suni caspicunata pichcata rurangui.

27Chai carpa huasipaj caishuj lado tablapi quinriman churanapajpish, pichca suni caspicunata rurangui. Inti huashicun lado huashaman caj tablapi quinriman churanapajpish shujtaj pichca suni caspicunata rurangui.

28Chaupi tablata quinriman churana suni caspica, shuj ladomanta caishuj ladoman pasajta cachun.

29Tablacunatapish curihuan llihuingui. Suni caspicunatapish curihuan llihuingui. Chai suni caspicunata churana argollacunatapish curita rurangui.

30Chai carpa huasita shayachinapajca ima shinalla rurana cashcata Sinaí urcupi ricuchishca shina rurashpa shayachingui.

31Jarcachina shuj linsotapish azul, morado, amsa puca puchcacunahuan, caupushca lino puchcahuan querubincunayujta bordashpa ahuangui.

32Chai linsotaca curihuan llihuishca chuscu acacia pilar caspicunata shayachishcapi huarcungui. Chai caspi pilar puntapi churanapajca curi capitelcunata rurangui. Chai pilarcunata shayachinapajpish cullqui basacunata rurangui.

33Diospajlla ch'icanchishca ucuhuan, caishuj ucuhuan ch'icanchishca cachun chai linsotaca ganchocunapi churachishpa huarcungui. Chai linsohuan jarcachishca Diospajlla ch'icanchishca ucupica, Dioshuan ari ninacushca quillcata huaquichina arcata churangui.

34Dioshuan ari ninacushca quillcata huaquichina arca jahuapica propiciatoriota churangui.

35Mezataca, linsohuan jarcachishca janaj lado c'uchuman churangui. Candelerotaca ura ladoman meza ch'imbapurapi churangui.

36Diospaj carpa huasi pungupaj cortinaca azul, morado, amsa puca puchcacunahuan, caupushca lino puchcahuan sumajta bordashcacunayujta ahuanata yachajta ahuachingui.

37Chai cortinata huarcunapajca acacia caspimanta pichca pilarcunata rurashpa curihuan llihuingui. Chai pilarcunapaj capitelcunatapish curita rurangui. Chai pilarcunata shayachinapajca, bronce pichca basacunata rurangui.