1Taita Dios imalla rurashcaca, Jonaspajca mana alli ricurircachu. Chaimantami Jonasca mana jahuallata p'iñarirca.
2Chashna p'iñarishpami, Mandaj Diostaca cashna mañarca:
–Mandaj Dioslla, canca jatunta c'uyaj, llaquij, mana utca p'iñarij, alli shungu Diosmi cangui. Llaquichisha nishpa huillachishpapish, jarcarishpa saquinguillami. Ñuca llajtapi cashparajmi, canca chashna ña yacharcani. Chaimantami can mandajpica, miticushpa Tarsis puebloman ricurcani.
3Cunanca Mandaj Dioslla, ñucataca huañuchihuailla. Ñucapajca causanapaj randica, huañunami alli– nijpimi,
4Mandaj Diosca:
–¿Chashna mana jahuallata p'iñarishpaca, allitami rurani yuyanguichu imatagari?– nirca.
5Chaimantami Jonasca, Nínive pueblomantaca inti llujshin ladoman rishpa, ramacunahuan chugllata rurarca. Chai chuglla ucupimi llandurishpa tiyarirca. Chai pueblopi ima tucujta ricungapajmi, chaipi tiyacurca.
6Mandaj Taita Diosca rupai achcata t'itajpi Jonás llaquirishpa tiyacujpimi, llandurichunca pai tiyacun c'uchupi calabazo yurata huiñachirca. Chai calabazo yurata ricushpami, Jonasca achcata cushicurca.
7Cayandij tutamanta pacarinapajca, Taita Diosllatajmi chai yurata micuchun shuj c'uruta churarca. Chai c'uru micujpimi, chai yuraca chaquirirca.
8Shinallataj inti llujshijpica, Taita Diosllatajmi achca rupaj huairata cacharca. Intipish Jonaspaj umataca rupachircami. Chaimantami yuyai illaj shina tucushpaca, huañunata munarca. Paica: “Ñucapajca causanapaj randica, huañunami alli canman” nircami.
9Chashna nijpimi Taita Diosca Jonastaca:
–¿Chai calabazo yura chaquirishcallamantachu yallitaj p'iñaringui imatagari?– nijpi Jonasca:
–Ñucaca colerahuan huañucunimi– nirca.
10Chashna nijpimi Mandaj Diosca:
–Manapish can tarpushca, manapish can huiñachishca jahuamari, chai calabazo yuramantaca yallitaj llaquiringui. Chai yuraca shuj tutalla huiñashpa, cayandij tutapajca, ñapish huañurcallami.
11Nínive pueblotacarin maitataj mana llaquishari. Chai jatun pueblopica, 120.000 runacunami causancuna. Paicunaca maijan alli maqui cashcata, maijan lluqui maqui cashcatapish mana yachashca shinami causancuna. Shinallataj achca animalcunapishmi tiyan– nircami.
Who We AreWhat We EelieveWhat We Do
2025 by iamachristian.org,Inc All rights reserved.
