1Davidca cashnami nirca: “Saulpaj huasi ucupuracunaca ¿maijan causacunrajchu? Jonatanta c'uyashcamanta ñuca paipaj allita rurangapaj” nircami.
2Chaipica Saulpaj huasi ucupurapajta ruraj Siba shutimi tiyarca. Paitami Davidpajman shamuchun cayajpi chai runa shamujpi jatun mandajca:
–¿Canchu Siba cangui?– nijpi paica:
–Cambajta ruraj ñucaca chaimi cani– nirca.
3Chaimi jatun mandajca:
–Saulpaj huasi familiaca ¿manachu maijan causacunraj? Paipaj allita rurashpami Taita Dios llaquij cashcataca ricuchisha nini– nijpimi Siba runaca jatun mandajtaca:
–Jonatanpaj shuj churimi causacunraj. Paica ishqui chaquicunataj patojomi– nirca.
4Chaimi jatun mandajca:
–¿Paica maipitaj?– nijpi, Siba runaca jatun mandajtaca:
–Paica Lodebar pueblopi caj Amielpaj churi Maquirpaj huasipimi– nirca.
5Jatun mandaj David pushanaman cachajpica, Lodebar pueblopi caj Amielpaj churi Maquirpaj huasimantami pushamurca.
6Jonatanpaj churi Saulpaj nieto Mefi-boset Davidpajman chayamushpaca, Davidta alli nishcata ricuchingapaj paipaj ñaupajpi cumurijpimi Davidca:
–Mefi-boset– nijpi paica:
–Cambajta ruraj ñucaca caipimi cani– nirca.
7Chaimi Davidca:
–Ama manchaichu, ñucaca cambaj yaya Jonatanpaj c'uyaimantaca, cambaj allicunataca ruranatajmi cani. Cambaj abuelo Saúl charishca allpacunatapish tucuimi canman tigrachigrini. Canca cambaj tucui causaipimi ñucahuan micushpa causangui– nirca.
8Chaimi Mefi-boset cumurishpaca:
–Cambajta ruraj ñucaca can chashna ñucata ruranapajca ¿imataj caniyari? Ñucaca huañushca allcu shinallamari cani– nirca.
9Chaimi jatun mandajca, Saulpajta ruraj Siba runata cayashpaca:
–Ñucaca Saulpaj tucui imalla charishcacunata paipaj familiacunapaj tucui imalla charishcacunataca, cambaj amopaj nietomanmi tucuita tigrachini.
10Canhuan cambaj churicunahuan, cambajta rurajcunahuanca paipaj allpacunapi trabajanguichij. Cambaj amopaj churipaj micunapaj cachun granocunataca tucui huaquichingui. Cambaj amopaj churi Mefi-bosetca, paipaj tucui causaipimi ñucahuan micushpa causanga– nircami.
Siba runaca chunga pichca churicunayuj, ishqui chunga paipajta rurajcunayujmi carca.
11Siba runaca jatun mandajtaca:
–Ñuca amo jatun mandaj, cambajta ruraj ñucata mandashca shinallataj rurashallami– nirca.
Jatun mandajpaj churicuna shinami Mefi-bosetca, ñuca mezapi ñucahuan micushpa causanga.
12Mefi-bosetca, Micaía shuti shuj uchilla churitami charirca. Siba runapaj tucui huasi familiacunaca tucuicunami Mefi-bosetpajta rurajcuna carca.
13Mefi-bosetca, jatun mandajhuan micushpa causacushcamanta, ishqui chaquicunataj patojo cashcamantami Jerusalenpi causarca.
Who We AreWhat We EelieveWhat We Do
2025 by iamachristian.org,Inc All rights reserved.
