ÉXODO 32 - Quichua Chimborazo Bible

1Moisés chai urcumanta mana utca uriyamujpimi, israelcunaca tandanacushpa Aaronpajman c'uchuyashpaca:

–Egiptomanta ñucanchijta llujshichimuj Moisestaca ima tucushcataca mana yachanchijchu. Jatari, ñucanchijta ñaupashpa richun dioscunata rurai– nircacuna.

2Chaimi Aaronca:

–Cancunapaj huarmicunapaj, cancunapaj churicunapaj, cancunapaj ushushicunapaj rinrincunapi caj curi zarcillocunata llujshichishpa apamuichij– nirca.

3Israelcunaca tucuicunami paicunapaj curi zarcillocunata paicunapaj rinrincunamanta llujshichishpa Aaronpajman apamurcacuna.

4Chaicunata paicunapaj maquimanta chasquishpa yacuyachishpa shuj curi bizita rurajpimi paicunaca:

–Israelcuna, cancunapaj dioscunaca caicunamari. Paicunami cancunataca Egiptomanta llujshichimurca– nircacuna.

5Paicuna caparinacujta ricushpami Aaronca, curi bizipaj ñaupajpi shuj altarta rurashpaca:

–Cayaca Mandaj Diospaj fiestami canga– nishpa caparirca.

6Cayandij tutamanta utca jatarishpami tucuita cushpa rupachinatapish, alli cangapaj cuna cashcatapish curcacuna. Tucuicunami micungapaj ubyangapaj tiyarircacuna. Chai q'uipaca cushicungapajmi jatarircacuna.

7Mandaj Diosca Moisestaca:

–Egiptomanta can llujshichimushca gentecunaca millaitami ruracuncuna. Paicunapajman uriyashpa rilla.

8Ñuca mandashca ñanmantaca utcami anchurishcacuna. Shuj curi bizita rurashpamari chaita adorashpa paiman sacrifiocunata cushpa: Israelcuna cancunataca cai dioscunamari Egiptomantaca llujshichimurca nicuncuna– nircami.

9Mandaj Diosca Moisestaca cashnapishmi nirca:

–Ñucaca israelcunataca yallitaj rumi shungu cajtami ricuni.

10Cunantajca ñuca paicunata llaquichishpa tucuchingapaj saqui. Canmantami shuj jatun llajtata rurasha– nircami.

11Chaimi Moisesca paita Mandaj Taita Diospaj ñaupajpi:

–Mandaj Dioslla, cambaj tucuita rurai tucuj maquihuan, cambaj poderhuan Egiptomanta llujshichimushca israelcunahuanca ama chashna jatunta p'iñarihuaichu– nishpa mañarca.

12Chaita yachashpaca, Egipto llajtapi causajcunaca: Israelcunata llaquichingapajllamari llujshichishca. Urcucunapi huañuchingapajllamari llujshichishca. Cai pachamanta chingachingapajllamari llujshichishca ningacunami. Nina sindirij shina p'iñarishpa paicunata llaquichisha nicushcataca saquihuailla.

13Cambajta ruraj Abrahamman, Isaacman, Israelmanca: Ñucami cambaj huahua huahuacunataca jahua pacha luzerocunata shina mirachisha. Paicunamanmi cancunaman cusha nishca cai allpataca cusha. Paicunapaj huiñaipaj cachunmi cusha nishpa quiquintaj nishcataca yuyaripayari– nirca.

14Chaimi Mandaj Diosca, pai agllashca israelcunata llaquichisha nishca cashpapish mana llaquichina tucurca.

15Moisesca chai urcumantaca, Dios ima shina cashcata ricuchishpa causanata mandashcata ishqui tablajlla rumicunapi quillcashcata paipaj maquipi apashcami uriyamurca. Chai rumicunapica cada tablajlla rumicunapi ishquindij ladoman quillcashcami carca.

16Chai tablajlla rumicunaca Taita Dios rurashcami carca. Chaicunapi quillcashcapish Taita Diostaj quillcashcami carca.

17Israelcuna yallitaj caparinacucujta uyashpami Josueca Moisestaca:

–Carpa huasicunapica macanacuipi caparinatamari caparicuncuna– nirca.

18Shina nijpi Moisesca:

–Macanacuipi mishashca caparita, macanacuipi mishajpi llaquilla cashpa caparitapish mana uyanichu. Ashtahuanpish ñucaca cantacujcunatami uyani– nirca.

19Carpa huasicunaman Moisés chayashpaca, bizi diostapish, gentecuna bailacujtapish ricushpami, Moisesca yallitaj p'iñarishpa pai charicushca ishqui tablajlla rumicunata pambaman shitajpi chai rumicunaca urcu chaquipi p'aquirirca.

20Chai q'uipaca Moisesca israelcuna rurashca bizi diosta japishpa ninapi rupachishpami, ñutu allpa tucungacama cutashpa yacupi churashpa chai yacutaca israelcunaman ubyachirca.

21Chaipimi Moisesca Aarontaca:

–Cai gentecunapajman cai jatun juchata apamuchunca paicunaca cantaca ¿imatataj rurarcari?– nirca.

22Shina nijpi Aaronca:

–Ñuca amito, ñucahuanca ama p'iñarihuaichu. Cai israelcuna millaita rurana yuyailla cashcataca canllataj yachanguimi.

23Paicunamari ñucataca: Egiptomanta ñucanchijta llujshichimuj Moisés ima tucushcataca mana yachanchijchu. Cunanca ñucanchijta ñaupashpa richun dioscunata rurai nircacuna.

24Chaimi ñucaca: Maijanpish curita charijca llujshichishpa apamuichij nijpi paicuna ñucaman cujpimi, chaicunata ninapi shitajpica, cai bizi llujshircalla– nircami.

25Israelcunataca yallitaj cacharishcacuna cajta ricushpa, paicunata p'iñajcunapi pingai tucungapajllataj Aaronpish israelcuna mañashcata rurashcata ricushpami,

26Moisesca carpa huasicuna ñaupajpi shayarishpaca:

–Mandaj Diospaj maijanlla casha nijcunaca ñucahuan tandanacuichij– nijpi, tucui levitacuna paihuan tandanacurcacuna.

27Paicunatami Moisesca:

–Mandaj Dios israelcunapaj Taita Diosca cashnami nin: Tucuicuna cancunapaj quiquin espadacunata changa uripi aparishca, carpa huasicunaman tigrashpa huasin huasin rishpa cancunapaj quiquin huauquicunata, cancunahuan alli apanacujcunata, cancunapaj familiacunata huañuchigrichij ninmi– nirca.

28Levitacunaca Moisés nishca shinallataj rurajpimi chai punllapica, 3.000 israelcuna huañurcacuna.

29Chaimi Moisesca:

–Cancunaca Mandaj Dios alli nishca tucungapajca quiquin churita, quiquin huauquita huañuchishpami, Mandaj Diospajlla tucushcanguichij– nirca.

30Chai cayandij punllami Moisesca israelcunataca:

–Cancunaca yallitaj jatuntamari juchallishcanguichij. Cancunapaj juchacunamanta pai yallitaj p'iñarishcata ima shinapish parachi tucushapishchari cunanmi Mandaj Diospajman huichiyagrini– nirca.

31Shina nishpa Mandaj Diospaj ñaupajman Moisés tigrashpaca:

–Cai israelcunaca curi dioscunata rurashpamari jatunta juchallishca.

32Cunanca paicunapaj juchacunata perdonapai. Paicunata mana perdonashpaca ñuca shutitapish cambaj libromanta p'ichahuai– nircami.

33Mandaj Diosca, Moisestaca:

–Maijanpish ñucata p'iñashpa juchallijpaj shutillatami ñuca libromantaca anchuchisha.

34Cunanca israelcunata ñuca maiman pushashpa richun nishcaman pushashpa rilla. Ñuca angelmi canta ñaupashpa ringa. Paicunata llaquichina punlla chayajpimi, paicunapaj juchamantaca llaquichisha– nircami.

35Mandaj Diosca israelcunataca Aarón rurashca bizi diosta adorashcamantami chugrichirca.