ISAÍAS 54 - Quichua Chimborazo Bible

Mandaj Diosca Israelcunataca huiñai huiñaipaj c'uyashcami

1¡Mana chichuj, mana huachaj huarmi, cushicuiyari!

¡Manataj huachaj huarmi, jatun cushicuihuan caparishpa cantayari!

“Cusa shitashca cashpapish, canmari cusayuj huarmitapish yalli huahuacunayuj tucungui” ninmi Mandaj Diosca.

2Can causana carpa huasitaca ashtahuan jatunta shayachiyari.

Ama llaquilla caichu.

Huascacunatapish ashtahuan cachariyari.

Ishtacacunatapish ashtahuan ucujta pambayari.

3Canmantaca alli lado maquimanpish, lluqui lado maquimanpish achcatami miraringa.

Cambaj huahua huahuacunaca llajtacunatami japingacuna.

Shitashca pueblocunapimi causanga.

4Ama manchaichu, mana muspachishca canguichu.

Ama pingarichu ña mana ashtahuan pi pingaichingachu.

Can chairaj cashpa pingai tucushcatapish cungaringuimi.

Viuda cajpi canta pingaichishcataca ña mana ashtahuan yuyaringuichu.

5Canta Ruraj Diosmari cambaj cusa, paipaj shutica tucuita Mandaj Diosmi.

Paica canta Quishpichij israelcunapaj jucha illaj Diosmi.

Tucui cai pachapi causajcunapaj Dios nishcami canga.

6Cantaca cusa shitashca huarmi shina llaquilla shungu cajpimi Mandaj Diosca cayarca.

Chairaj huarmita cusa shitashca cashpapish cutin cashna nij shinami cambaj Taita Diosca cashna nin:

7“Ashacamallami cantaca shitarcani.

Ashtahuanpish cunanca jatunta llaquishpami cantaca cutin japigrini.

8Ashata p'iñarishpallami ñuca ñahuita canmanta ashacama pacarcani.

Ashtahuanpish cunanca huiñaipaj llaquishpami cantaca c'uyagrini ninmi, canta Quishpichij Mandaj Diosca.

9Noé causacui punllacunapica: Manataj cunan shina cai pachata yacuhuan cutin chingachishachu nircanimi.

Ima shinami manataj chashna rurashachu nishca shinallataj, canhuanca manataj p'iñarishachu.

Llaquichishami nishpapish manataj nishachu.

10Urcucunapish cuyuringami, lomacunapish chujchungami.

Ashtahuanpish ñuca canta c'uyashcamantaca manataj saquishachu.

Sumaj causaita canhuan ari ninacushcatapish manataj p'aquishachu ninmi canta llaquij Mandaj Diosca.

Mushuj Jerusalenmi

11¡Huairandij tamya llaquichishca huarmi huahualla cushicui illajllami cangui!

Shina cajpipish ñucami cambaj rumicunataca carbunclo jahuapi sinchita shayachigrini.

Zafiro rumicuna jahuapimi, cantaca shayachigrini.

12Cambaj ventanacunataca sumaj rumicunahuanmi rurasha.

Cambaj pungucunataca, carbunclo rumicunahuanmi rurasha.

Cambaj muyundij pircataca sumaj rumicunahuanmi rurasha.

13Cambaj huahuacunaca tucuicuna Mandaj Dios yachachishcami canga.

Cambaj huahuacunapaj sumaj causaica ashtahuanmi miraringa.

14Cashcata ruranahuan sumajyachishcami cangui.

Llaquichijcunamanta carupi cashcamanta ima manchai illajllami cangui.

Manchaihuan canaca cambajmanca mana c'uchuyana cashcamanta manchaihuan canamantaca carupimi cangui.

15Cunanca maijanpish canta llaquichingapaj huashalla yuyarijca mana ñuca cachashcachu canga.

Canta llaquichingapaj huashalla yuyarijca cambaj ñaupajpimi urmanga.

16Fierrota rupachishpa, imatapish ruraj runataca ñucami rurarcani.

Paimi macanacunacunataca ruran.

Llaquichishpa tucuchij runatapish llaquichishpa tucuchichun ñucami rurarcani.

17Canta tucuchingapaj ashtahuan ima macanacunacunata rurajpipish, cantaca chaicunaca imata mana rurai tucungachu.

Canta llaquichingapaj tucui parlanacujcunatapish, canrajmi llaquipi churangui.

Mandaj Diospajta rurajcuna japina cashcata japinaca, ñuca paicunata llaquimanta quishpichinami” ninmi Mandaj Diosca.