NÚMEROS 25 - Quichua Chimborazo Bible

Baal-peor nishca diosta israelcuna adorashcami

1Israelcunaca Sitim pueblopi cashpami, Moabita huarmicunahuan huainayai callarircacuna.

2Chai huarmicunaca paicunapaj dioscunaman animalcunata huañuchishpa cucushpami, israelcunatapish chaiman cayarcacuna. Chaipimi israelcunaca rurashcalla dioscunaman cushcacunata micurcacuna, chai dioscunapaj ñaupajpi cungurircacuna.

3Chashnami israelcunaca, Baal-peor nishca diosta catircacuna. Chaimi Mandaj Diosca israelcunahuanca nina sindirij shina yallitaj p'iñarirca.

4Mandaj Diosca Moisestaca:

–Israelcunata pushajcunata tucuicunata japishpa, chaupi punlla inti achijnicujpi Mandaj Diospaj ñaupajpi sipishpa huañuchi. Mandaj Dios israelcunahuan yallitaj p'iñarishcata anchuchingapaj chashna rurai– nircami.

5Chaimi Moisesca, israelcunata pushajcunataca:

–Cancunapaj aillucunapuramanta maijancunalla Baal-peorta adorajcunataca, cada ailluta pushajcunallataj japishpa huañuchichij– nirca.

6Moisespish, tucui israelcunapish Mandaj Dioshuan tupanacuna carpa huasi ñaupajpimi huacacurcacuna. Paicuna ricucujpimi israelcunapuramanta shuj runaca, paicunapajman madianita huarmita pushashca chayamurca.

7Aarón curapaj nieto Eleazarpaj churi Finees chaita ricushpaca, tandanacushca israelcunapaj chaupimanta jatarishpa lanzata japishpa rishpami,

8chai Israel runapaj carpa huasiman catishpa yaicushpa, Israel runatapish, chai huarmitapish espadahuan huijsamanta huashaman pasajta satishpa ishquindijtataj huañuchirca. Chai runata huañuchijpimi, israelcunata huañuchishpa llaquichicun llaquica pararirca.

9Chai llaquipi huañujcunaca 24.000mi carca.

10Mandaj Diosca, Moisestaca cashnami nirca:

11–Aarón curapaj nieto Eleazarpaj churi Fineesmi israelcunahuan ñuca yallitaj p'iñarishcataca anchuchin. Fineesca paicunapurapi millaita rurajtaca p'iñashpa ñuca shinallataj huañuricujmi. Paimantami ñucaca israelcuna millaita rurashcamanta huañurishpa llaquichishpa tucuchinataca pararini.

12Chaimanta paimanca cashna ni: Ñucaca paimanca sumaj causaita cunatami ari nini.

13Paipish, paipaj huahua huahuacunapish, chaipaj q'uipa huahua huahuacunapish curacuna tucushpa caticuchunllami churagrini. Taita Diospajlla canamantatajca huañucuj cashcamanta israelcunapaj juchata anchuchingapaj chai runata huañuchishcamantami chashna ruragrini ni– nircami.

14Madianita huarmindijta huañuchishca runaca Salu runapaj churi Zimrimi carca. Salu runaca Simeón aillupi caj familiacunapurapi shuj huasi familiata pushajmi carca.

15Madianita huarmica, Zur runapaj ushushi Cozbi shutimi carca. Zur runaca, madianitapurapi caj familiacunapaj shuj huasi familiapaj yaya, madianitacunata mandajmi carca.

16Mandaj Dios Moisesta mandashpaca cashnami nirca:

17Madianitacunata macashpa huañuchigrichij.

18Paicunami cancunataca Baal-peor nishca diosta adoranaman umashpa pushashpa llaquichirca. Baal-peor shuti diosta adorashcamanta israelcunata llaquichicui punllapimi, cancunahuan huainayaj jatun mandajpaj Cozbi shuti ushushitapish huañuchirca– nircami.