GÉNESIS 45 - Quichua Chimborazo Bible

Joseca paipaj huauquicunaman rijsichirishcami

1Chaimi Joseca huacanai atijpi tucui chaipi cajcunapaj ñaupajpi mana huacai tucushpaca: “Ñuca ñaupajmanta tucuicunata llujshichi” nishpa caparirca. Ña pi mana chaipi cajpimi, Joseca paipaj huauquicunamanca paicunapaj huauqui cashcata huillarca.

2Chaipica paica jatuntami huacarca. Chaitaca egipciocunapish yachaj chayarcami. Faraonpaj mandana huasipi cajcunapish yachaj chayarcami.

3Joseca paipaj huauquicunataca:

–Ñucaca Josemi cani. Ñuca yayaca causacunrajchu– nijpi, paipaj huauquicunaca paipaj ñaupajpi yallitaj musparishca cashcamanta imata mana ni tucurcacunachu.

4Chaimi Joseca paicunataca:

–Cunanca ñucapajman c'uchuyamuichij– nirca.

Paicuna c'uchuyajpimi Joseca:

–Ñucaca cancuna c'atushpa Egiptoman cachashca cancunapaj huauqui Josemari cani.

5Ashtahuanpish cunanca cancunaca ama llaquirichijchu. Ñucataca mana cancunapaj munaimantachu c'atushpa cacharcanguichij. Cancunapaj causaita quishpichingapajmi Taita Diosca ñucataraj caiman ñaupachishpa cacharca.

6Ñamari ishqui huatacunata cai pachapica jatun yaricai tiyan. Pichca huatacunahuan yaricai tiyangarajmi. Tucui chaipimari yapuipish, cozichaipish illanga.

7Cancunapaj huahua huahuacuna q'uipa punllacunapi cai pachapi causajcuna tiyachun. Cancunatapish cancunapaj huahua huahuacunatapish causaita quishpichingapajmi Taita Diosca ñucataraj caiman ñaupachishpa cacharca. Chashnami Taita Diosca ima shinapish quishpichinataj tucushca.

8Shina cajpica, mana cancunachu caimanca cacharcanguichij. Ashtahuanpish Taita Diosmari cacharca. Paimari ñucataca faraonpaj yaya shinata, paipaj huasitapish mandajta, tucui Egipto llajtatapish mandajta churangapaj pushamurca.

9Chaimanta cunanca ñuca yayapajman utca rishpa: Cambaj churi Joseca cashnami nin nigrichij: Ñucataca Taita Diosmi tucui cai Egipto llajtata mandaj cachun churarca. Ama uniyashpa ñucapajman shamupai.

10Canpish, cambaj huahuacunapish, paicunapaj huahuacunapish, tucui animalcunandij, tucui imalla charishcacunandij cai llajtapi caj Gosenpi causanguichij. Chaipi causashpami ñucapaj c'uchullapi cangui.

11Chaillapi cajpimi pichca huatacunahuan yaricai tiyai huatacunapica canmanpish, cambaj huasi ucupuramanpish, tucui canhuan cajcunamanpish yaricaihuan ama huañuchun carasha ninmi ninguichij.

12Cunanca cancunapish ñuca huauqui Benjaminpish, cancunapaj ñahuihuantajmi ñucata ricunguichij. Ñuca ima nishcatapish cancunatajmi uyanguichij.

13Cunanca ñuca yayamanca cai Egiptopi ñuca mandacushcata, tucui ima shinalla cashcata ricushcatapish huillagripaichij. ¡Utca rishpa ñuca yayataca caiman pushamugrichij!– nircami.

14Joseca paipaj huauqui Benjaminta ugllarishpa huacajpi, Benjaminpish paipaj huauqui Joseta ugllarishpami ishquindijtaj huacarcacuna.

15Joseca paipaj tucui caishuj huauquicunatapish ugllarishpa muchashpami huacarca. Chai q'uipami Josepaj huauquicunaca paihuan parlarca.

16Josepaj huauquicuna shamushcata faraonpish, faraonpajta rurajcunapish yachaj chayashpaca cushicurcacunami.

17Faraonca, Josetaca:

–Cambaj huauquicunataca cashna ni: Cancunapaj animalcunaman trigota apachishpa, Canaanman utca tigrashpa,

18cancunapaj yayatapish, paipaj tucui huasi ucupuracunatapish ñucapajman pushashpa tigramugrichij. Ñucaca paicunamanca cai Egiptopica alli llajtatami cusha. Chaipimi paicunaca yallitaj achca micunata charingacuna.

19Chaimanta cunanca caita rurai: Huahuacunata, huarmicunata pushamungapajca cai Egiptomanta carrocunata apashpa rishpa cancunapaj yayata pushamuchun mandai.

20Canaanpi imalla tiyajcunamantaca ama llaquirishpa shamuchunlla. Cai Egiptopi imalla tiyashcacunami paicunapaj canga– nircami.

21Israelpaj churicunaca chashnami rurarcacuna. Joseca faraón mandashca shinallatajmi carrocunata cacharca, ñanpi micuchunpish micunata cacharcami.

22Paipaj huauquicunamanca tucuicunamanmi mushuj churanacunata curca. Benjaminmancarin, 300 cullquita, pichca mushuj churanacunatami curca.

23Paipaj yayapajca, Egiptopi tiyaj tucuita yalli sumajcunatami chunga burrocunapi apachishpa cacharca. Paipaj yaya shamucushpa ñanpi micuchunpish chunga burracunapimi trigota, tandata, ima shujtaj micunatapish apachishpa cacharca.

24Chai q'uipami Joseca paipaj huauquicunata caya minchacama nishpa paicuna ña rigrijpica:

–Ñanpi ama p'iñanacunguichij– nirca.

25Egiptomanta huichiyashpa Canaanman chayashpaca yaya Jacobpajman chayashpami,

26paicunaca Jacobmanca: “Joseca causacushcamari, paica tucui Egipto llajtata mandajmari” nishpa huillarcacuna. Ashtahuanpish Jacobca upayajta mancharishpaca mana crircachu.

27Paicunaca José imallata nishcacunatami cutinllataj parlarcacuna. Paita pushamuchun José cachashca carrocunata ricushpa yuyai shujtajyashpa cushicushpami,

28Israelca: “¡Imatataj ashtahuan shuyashari! ¡Ñuca churi Joseca causacushcarajmari! Ñuca manaraj huañushpa paita ricunaman utca rishalla” nirca.