2 CRÓNICAS 14 - Quichua Chimborazo Bible

Judá llajtata Asa mandashcami(1 R 15.9-12)

1Abías paipaj ñaupa yayacunahuan dormijpica, Davidpaj pueblopimi pambarcacuna. Paipaj randica paipaj churi Asami mandarca. Pai mandacui punllacunapica chunga huatatami gentecunata sumajta causarcacuna.

2Asaca, Mandaj Diospaj ñaupajpica, maiman mana anchurishpami causarca.

3Paica rurashcalla dioscunata yuyarina altarcunatapish, lomacunapi tiyaj altarcunatapish tucuimi urmachirca. Shinallataj dioscunata rurashca rumicunatapish p'aquircami. Asera huarmi diosman rijchajcunatapish tucuitami tucuchirca.

4Chashna rurashpaca, Judá llajtapi causajcunataca, paicunapaj ñaupa yayacunata Mandaj Diosman cutirishpa pai cushca mandashcata pajtachichunmi mandarca.

5Judapi caj tucui pueblocunamantami lomacunapi tiyaj altarcunatapish chingachirca. Chashna rurashpami pai mandacushpaca, pihuan mana macanacushpa sumajta causarca.

6Mandaj Dios sumaj causaita cujpimi, chai huatacunapica maijan llajtahuanpish mana macanacurca. Chaimantami Asaca chai huatacunapica, Judapica, muyundijta jatun pircacunayuj pueblocunata rurachirca.

7Chaicunata rurangapajca, Asaca Judapi causajcunataca: “Jalachij, ñucanchijta Mandaj Taita Diosca ñucanchij paiman cutirijpimari sumaj causaita cuhuan. Paimari tucui shujtaj llajtacunapi causajcuna ama p'iñachichun jarcashca. Chaimantami cai llajtataca, ñucanchijllataj charicunchij. Chashna cashcamantaca, cai pueblocuna muyundijta jatun pircacunata, torrecunata rurashunchij. Chai pircacunapica, aldabacunayuj jatun pungucunata churashunchij” nircami. Chashna nishpa chashna ruranata callarishpaca, tucuitami utca rurarcacuna.

8Asaca Judá aillumantaca, 300.000 soldadocunatami charirca. Chai soldadocunaca escudocunahuan, lanzacunahuan allichirishcacunami carca. Benjamín aillumantaca, 280.000 soldadocunatami charirca. Chai soldadocunaca escudocunahuan, arcocunahuan allichirishcacunami carca.

9Paicunahuan macanacungapajmi, Etiopía llajtata mandaj Zera shuti jatun mandajca, 1.000.000 soldadocunahuan, 300 carrocunahuan, Maresa puebloman chayamurca.

10Paicuna chaiman shamujpimi, Asaca macanacungapaj paipaj soldadocunahuan tupanaman rirca. Chashna rishpaca, chai Maresa pueblo c'uchullapi caj Sefata pugru pambapimi shayarirca.

11Chaipimi Asaca, paita Mandaj Diostaca cashna caparishpa mañarca: “¡Mandaj Taita Dioslla, can ayudashpallami achca soldadocuna cajpipish mishachingui! Ashacunalla cajpipish, can ayudashpaca mishachinguillami. Chaimantami ñucanchijta Mandaj, can Taita Diosllapi shungutaca churanchij. Ñucanchijta ayudahuaiyari. Cambaj shutipimari, cai soldadocunahuan macanacunaman shamunchij. Can Mandaj Diosmari ñucanchij Dios cangui. Canhuan macanacungapajca pipish mana shayari tucuipaj cashcata ricuchiyari” nishpami mañarca.

12Chashna mañajpimi Mandaj Diosca, Asataca Judapi causaj paipaj soldadocunahuan mishachirca. Paicuna mishajpimi, Etiopía llajta soldadocunaca callparcacuna.

13Asaca paipaj soldadocunahuanca, Gerar pueblocama catishpami, chai soldadocunataca shujllatapish mana saquishpa tucuicunata huañuchircacuna. Chashnami chai soldadocunapaj maquipi urmashpaca, shujllapish causaihuan mana saquirirca. Chaicunata huañuchishpaca, chaicuna charishca yallitaj achca charinacunatami japircacuna.

14Chai q'uipaca, Gerar pueblo c'uchupi caj tucui pueblocunapi causajcunahuanmi macanacurcacuna. Chai pueblocunapi tucui causajcunapish Mandaj Diostaca yallitajmi mancharcacuna. Judá llajta soldadocunaca chai pueblocunamantapish, imalla tiyashcacunatami quichushpa aparcacuna. Chai pueblocunapi causajcunaca yallitaj charijcunami carca.

15Shinallataj chai llajtallapitajmi, animalcunata cuidajcunatapish huañuchishpa achca ovejacunatapish, camellocunatapish apashpa rircacuna. Chai tucuita apashpami, Jerusalenman tigrarcacuna.