EZEQUIEL 25 - Quichua Chimborazo Bible

Amón llajtata llaquichinamanta

1Mandaj Diosca ñucataca cashnami nirca:

2“Huañujlla aichayuj runalla, Amonpaj huahua huahuacuna causacun llajtaman cambaj ñahuita churashpa, paicunata llaquichina cashcata huillangui.

3Amonpaj huahua huahuacunataca cashna ningui: Mandaj Jatun Dios rimashcata uyaichij. Mandaj Jatun Diosca cashnami nin: Cancunaca ñucapajlla huasi yanga tucushcata ricushpapish, Israel llajta llaquinayaj cashcata ricushpapish, Judá llajtapi causajcunata prezu apajta ricushpapish: ¡Allimi! nishpami cushicurcanguichij.

4Chaimantami cancunataca inti llujshin pueblocunapi causajcunaman cusha. Paicunami, cancuna causacun pueblocunata quichushpa, chaipi corralcunatapish, carpa huasicunatapish rurangacuna. Cancuna tarpushca granocunatapishmi micungacuna, lechetapishmi ubyangacuna.

5Rabá pueblotaca, camellocuna causanatami rurasha. Amonpaj huahua huahuacuna causacun llajtataca, ovejacunata michina llajtatami rurasha. Chashna rurajpimi ñucataca, Mandaj Diostaj cashcata yachanguichij” ninmi.

6Chaimantami Mandaj Jatun Diosca cashna nin: “Cancunaca israelcunata p'iñashcamantami, paicuna llaquita apacujpipish cushicurcanguichij, saltarishpami maquicunapipish huajtarircanguichij.

7Chashna rurashcamantami, ñucapish cancunataca llaquichisha. Shinallataj cancuna imalla charishcacunataca, shujtaj llajtacunapi causajcunami quichushpa apangacuna. Cancunataca shujtaj pueblocunapi causacujpipish huañuchishami, shujtaj llajtacunapi causacujpipish chingachishami. Chashnami cancunataca tucuchisha. Chashna rurajpimi ñucataca, Mandaj Diostaj cashcata yachanguichij” nircami.

Moab llajtata llaquichinamanta

8Mandaj Jatun Diosca cashnami nirca: “Moab llajtapi, Seir llajtapi causajcunaca: Judá llajtapi causajcunataca shujtaj llajtacunapi causajcuna shinallatajmi nishpami rimarcacuna.

9Chaimantami Moab llajtata janaj lado lindeta punguta pascasha. Chaipica paicuna munashca Bet-jesimot shuti, Baal-meón shuti, Quiriataim shuti pueblocunami tiyan.

10Amonpaj huahua huahuacunataca, shujtaj llajtapi causajcuna ama imata yuyarichunmi, inti llujshin llajtacunapi causajcunaman paicunapajlla cachun cusha. Paicunami Amonpaj huahua huahuacunataca llaquichingacuna.

11Shinallataj Moab llajtatapish llaquichishatajmi. Chashna rurajpimi ñucataca, Mandaj Diostaj cashcata yachangacuna” nircami.

Edom llajtata llaquichinamanta

12Mandaj Jatun Diosca cashnami nirca: “Edom llajtapi causajcunaca, paicunata llaquichishcamantami Judá llajtapi causajcunataca yallitaj llaquichircacuna.

13Chashna rurashcamantami, Mandaj Jatun Diosca cashna nini: Ñucapish Edom llajtataca llaquichishatajmi. Chai llajtapica runacunatapish animalcunatapish huañuchishpami llaquinayajta saquisha. Temán pueblopi causajcunamantaca, Dedán pueblopi causajcunacamami espadapi huañungacuna.

14Shinallataj ñuca p'iñarishpami, Edom llajtapi causajcunataca, ñuca agllashca israelcunapaj maquipi churasha. Paicunami Edom llajtapi causajcunataca, ñuca p'iñarishpa llaquichisha nishca shinallataj llaquichingacuna. Chashna rurajpimi, ñuca p'iñarishpa llaquichijlla cashcataca yachangacuna” nircami Mandaj Jatun Diosca.

Filisteocunata llaquichinamanta

15Mandaj Jatun Diosca cashnami nirca: “Filisteocunaca ñaupaman p'iñanacushcata mana cungarishpami, llaquichina yuyaillahuan causarcacuna. Chaimantami mana llaquishpa jatunta p'iñarishpa chingachircacuna.

16Chaimantami Mandaj Diostaj cashna nini: Ñuca maquita chutashpami, filisteocunataca llaquichisha. Shinallataj cereteocunatapish huañuchishami, mama cucha ladoman ashalla saquirijcunatapish chingachishami.

17Paicunataca millaita ruranata jarcashpami, yallitaj p'iñarishpa llaquichisha. Paicunataca ñuca p'iñarishpa chashna jatunta llaquichijpimi, ñucataca Mandaj Diostaj cashcata yachangacuna” nircami.