DEUTERONOMIO 12 - Quichua Chimborazo Bible

Diospajlla carpa huasica shujtajca mana tiyanchu

1Cancunapaj ñaupa yayacunaman cancunata Mandaj Dios cancunapaj Taita Dios cushca llajtapi causashca punllacunapica mandashcacunata, pajtachichuntaj nishcacunataca caicunatami chai yuyailla rurana canguichij.

2Cancuna japin llajtacunapi causajcuna paicunapaj dioscunata adoranacunatami tucuita nunca ama tiyachun chingachina canguichij. Urcucunapi, lomacunapi, yura ucucunapi adoranacunatami chashna chingachina canguichij.

3Paicunapaj altarcunata urmachinguichij. Paicunapaj rurashcalla dioscunata p'aquinguichij. Asera diosman rijchajcunata rupachinguichij. Maquihuan rurashca paicunapaj dioscunata chingachinguichij. Chashna rurashpami chai dioscunapaj shuticunataca tucuita p'ichanguichij.

4Ashtahuanpish Mandaj Dios cancunapaj Taita Diosta adoranataca mana paicuna shina maipipish ruranachu canguichij.

5Mandaj Dios cancunapaj Taita Diosmi cancunapaj aillupurapi maipi cashpapish, paipaj shutita churanataca agllashpa chaipi causanga. Maipimi pai agllan chaimanmi paita adoranapajca rina canguichij.

6Diosman tucuita cushpa tucui rupachinata, paiman cushpa rupachinata, chungamanta shujta cunata, maquihuan huichi ricuchishpa cunata, cushatajmi nishcamanta cunata, cuna munaita charishcamanta cunata, punta huacharishca cancunapaj huagracunata, punta huacharishca ovejacunatapish chaimanmi apana canguichij.

7Chaipimi Mandaj Dios cancunapaj Taita Diospaj ñaupajpi micushpa, cancunapaj maquihuan tucui imalla rurashcapi, Mandaj Dios cancunapaj Taita Dios allicunata cushcamantaca cancunapish, cancunapaj familiapish cushicuna canguichij.

8Cunan ñucanchij cada quiquinpaj ima shinami alli ricurin, chashna ruracuj shinaca chaipica ama ruranguichijchu.

9Mandaj Dios cancunapaj Taita Dios cancuna samarichun cushca llajtamantajca cunancama manarajmari yaicunguichijchu.

10Ña Jordán yacuta ch'imbashpatajca, Mandaj Dios cancunapaj Taita Dios cancunapaj cachun cushca llajtapimi causanguichij. Chaipica paimi cancunapaj muyundijpi caj cancunata p'iñajcunamantaca samachinga. Ima manchai illajllami causanguichij.

11Mandaj Dios cancunapaj Taita Dios paipaj shutita maipi churanata ña agllajpica tucui ñuca imalla apachun mandashcacunataca caicunatami chaiman apana canguichij: Diosman tucuita cushpa tucui rupachinata, paiman cushpa rupachinata, chungamanta shujta cunata, maquihuan huichi ricuchishpa cunata, cancunapaj shimihuantaj ima ashtahuan allita Mandaj Diosman cusha nishcacunatapishmi apana canguichij.

12Mandaj Dios cancunapaj Taita Diospaj ñaupajpi cancunapish, cancunapaj churicunapish ushushicunapish, cancunapajta ruraj c'aricunapish, huarmicunapish, cancuna causanpi causaj levitacunapish chaicunata micushpami cancunahuan cushicungacuna. Paicunaca allpacunata mana charishcamantami cancunahuan cushicungacuna.

13Mandaj Diosman tucuita cushpa tucui rupachinataca, ñataj maipipish rupachinguichijman.

14Ashtahuanpish Mandaj Dios, cancunapaj aillucunapuramanta maijan aillupaj llajtapi agllashca cajpica, chaillapi tucuita cushpa tucui rupachinatapish, ñuca tucui imallata rurachun mandashcatapish ruranguichij.

15Maijanpish micuita charinata munashpaca maipi causacunllapitaj animalcunata huañuchishpa micuchunlla. Paicunaman Mandaj Dios ima shina cushca shinallataj rurachunlla. Chai aichataca cancuna mapa cashpapish, chuya cashpapish gacela, ciervo nishca tarugacunapaj aichata micuj shina micui tucunguichijllami.

16Ashtahuanca yahuartatajca ama micunguichijchu. Chaitaca yacuta shina allpapi tallinguichijlla.

17Caicunatapishmi cancuna causacunllapitajca, mana micui tucunguichij. Granocunamanta chungamanta shujta cushcacunata, vinomanta, aceitemanta chungamanta shujta cushcacunata, punta huacharishca huagracunata, punta huacharishca ovejacunata, cushatajmi nishcacunata cushcacunata, cuna munaita charishcamanta cushcacunata, cancunapaj maquihuan ricuchishpa cunacunatapish chaipica mana micunachu canguichij.

18Ashtahuanpish Mandaj Dios cancunapaj Taita Dios agllashca pueblopimi Mandaj Dios cancunapaj Taita Diospaj ñaupajpi micuna canguichij. Cancunapish, cancunapaj churicunapish, ushushicunapish, cancunapajta ruraj c'aricunapish, huarmicunapish, cancuna causacunpi causaj levitacunahuanpishmi chaitaca micuna canguichij. Cancunapaj maquihuan trabajashcamantaca Mandaj Dios cancunapaj Taita Diospaj ñaupajpi chashna cushicunguichij.

19Cancuna cai pachapi causashcacamaca, levitacunata cuidanataca amataj saquinguichijchu.

20Mandaj Dios cancunapaj Taita Dios pai nishca shinallatajmi, cancunapaj llajtata ashtahuan jatunyachinga. Chaipica aichatami micunayachinguichij, micunachishca punlla micunguichijlla.

21Mandaj Dios cancunapaj Taita Dios paipaj shutita churangapaj agllashca pueblo cancuna causacunmanta carupi cajpica, Mandaj Dios cancunaman cushca huagracunata cashpa, ovejacunata cashpapish, ñuca cancunata mandashca shinallataj cancunapaj pueblocunapi huañuchishpa cancuna munashcata micunguichijlla.

22Chai aichataca gacela, ciervo nishca tarugacunapaj aichata shinallataj micunguichijlla. Mapa cashpapish, chuya cashpapish chai aichacunataca micunguichijlla.

23Ashtahuanca yahuarta micunatatajca amataj yuyanguichijchu. Yahuarpimi causai tiyan. Causaindij aichandijca ama micunguichijchu.

24Amataj micunguichijchu yacuta shina allpapi tallinguichijlla.

25Canpish, cambaj huahuacunapish, huahua huahuacunapish alli cangapajca yahuartaca ama micunguichijchu. Cancunaca Mandaj Diospaj ñaupajpi chashna allita rurashcamantami alli canguichij.

26Mandaj Diosman cungapaj ch'icanchishpa, paiman cuna tucushcacunallata Mandaj Dios agllashca pueblomanca apashpa ringuichij.

27Mandaj Diosman cushpa tucui rupachina aichatatajca, yahuartatajca Mandaj Dios cancunapaj Taita Diospaj altar jahuapi paiman cunguichij. Yahuartaca Mandaj Dios cancunapaj Taita Diospaj altar jahuapi tsirapashca cachun. Aichataca cancuna micunguichij.

28Canpish, cambaj huahuacunapish, huahua huahuacunapish Mandaj Dios cancunapaj Taita Diospaj ñaupajpi allita rurajcuna, ima pandata mana rurajcuna cangapajca tucui cai ñuca mandashcacunata alli uyashpa huaquichinguichij.

Rurashcalla dioscunataca ama yuyaringuichijchu nishcami

29Cancuna japigricun llajtata, Mandaj Dios cancunapaj Taita Dios tucuicunata tucuchijpi ña cancunapaj cachun japishpa chai llajtapi causacushpaca,

30chai llajtapi causajcunapaj ruraicunata rurashpa ñitcaringuichijman. Ña chai tucuita chingachishca q'uipaca cancunaca: “Ñucanchijpish paicuna shina chai dioscunapaj ruranacunata rurangapaj cai llajtapi causajcunaca ima shinashi chai dioscunapajtaca rurajcuna carca” nishpa ñataj tapunguichijman.

31Chai llajtapi causajcuna ruraj cashca shinaca Mandaj Dios cancunapaj Taita Diospajca ama ruranguichijchu. Paicunaca paicunapaj dioscunapajca Mandaj Diospaj ricuipica millanana p'iñananatami rurancuna. Paicunapaj churicunata, ushushicunatami paicunapaj dioscunata alli nishpa cushpa ninapi rupachincuna.

32Ñuca tucui mandashcacunata, chaitataj pajtachina yuyailla pajtachinguichij. Chai mandashcacunataca imata ama mirachinguichijchu, imata ama anchuchinguichijchu.