1Cielopica mana ricushca shujtaj jatun mancharinatami ricurcani: Chaipica, tucuri canchis llaquicunatami canchis angelcuna charicurcacuna. Chaicunahuanmi, Dios jatunta p'iñarishpa llaquichinaca tucurirca.
2Shinallataj ninahuan chagrushca vidrio shina mama cucha yacutapishmi ricurcani. Jatun animaltapish, chai animalman rijchajta rurashcatapish, paipaj shutita ricuchij sellota, paipaj shutipaj numerotapish mana churachishpa mishajcunatapishmi ricurcani. Paicunaca vidrio shina mama cucha c'uchupimi, Dios cushca arpacunata apashca shayacurcacuna.
3Paicunaca, Diospajta ruraj Moisespaj cantota, Ovejapaj cantotapishmi, cashna nishpa cantacurcacuna:
“Tucuita Rurai Tucuj Mandaj Taita Dios, cambaj rurashcacunaca jatun sumajmari.
Jucha illajcunapaj jatun mandaj.
Canca imatapish cashcata ruraj, mana llullami cangui.
4Jatun Dioslla ¿pitaj cantaca mana manchangari?
¿Pitaj Cambaj shutitaca mana jatunyachingari?
Canllamari jucha illaj cangui.
Cantaca ima shina rurashca shinataj ricuchij cajtami ricushcacuna.
Chaimantami tucui llajtacunamanta shamushpa adorangacuna” nircami.
5Chai tucuicunapaj q'uipaca, cielopica Diosta adorana huasi pascarijtami ricurcani. Chai ucupica, Dios mandashcata huaquichina Diospajlla ch'icanchishca ucumi carca.
6Diospaj huasimantaca, canchis angelcunami, canchis llaquicunata apashca llujshircacuna. Paicunaca chuya, achij nicuj, lino churanata churashca, curi tajalitapish tajalishcami carcacuna.
7Chai causacuj chuscucunamanta shujmi, canchis angelcunamanca huiñai huiñaita causacuj Dios p'iñarishpa jatunta llaquichinahuan junda canchis curi copacunata curca.
8Diosca tucuita rurai tucuj sumaj cashcamantaca, Diospaj huasipica cushnimi jundarca. Canchis angelcuna, canchis llaquicunata tucuchingacamami, Diospaj huasimanca pi mana yaicui tucurcacuna.
Who We AreWhat We EelieveWhat We Do
2025 by iamachristian.org,Inc All rights reserved.
