APOCALIPSIS 19 - Quichua Chimborazo Bible

Cielopi cantashcacunami

1Chai q'uipaca cielopica achcacuna sinchita cashna nishpa rimanacucuj shinatami uyarcani:

“Ñucanchijta Mandaj Taita Diosca Quishpichijmari, alli nishcamari, sumaj nishcamari, Tucuita Rurai Tucuj nishcamari.

Chaimanta paitaca ¡Alabaichij!

2Paica, imatapish ima shina cashcatataj ricuchishpa llaquichijmi.

Chashna cashpami huainayashpalla causaj huarmi paipaj huainayanahuan allpa pachapi causajcunata yallitaj millaita rurachishcamantaca ña llaquichishca.

Diospajta rurajcunata paipaj maquihuan huañuchishcamantami paitapish tigra llaquichirca” nircacunami.

3Cutinmi cashna nirca:

“Chai huarmi rupashca cushnica huiñai huiñaita llujshicungallami.

Chaimanta ñucanchij Diostaca ¡Alabaichij!” nircacunami.

4Ishqui chunga chuscu ancianocunapish, causaiyuj chuscucunapish jatun tiyarinapi tiyacuj Diostaca, cungurishpami adorarcacuna. Paicunaca: “¡Chashna cachun! nishpaca, cushicushpami ¡Alabarcacuna!”

5Jatun tiyarina chaimanta shuj rimashca uyarishpaca:

“Ñucanchij Diospajta ruraj, paita manchajcunaca, uchilla cashpapish, jatun cashpapish allimari cangui nichij” nircami.

6Yallitaj achcacuna rimanacucuj shinaca, achca yacucuna huajiacuj shina, jatunta c'ulun nicuj shinapishmi sinchita cashna nicujta uyarcani:

“Tucuita Rurai Tucuj ñucanchijta Mandaj Taita Diosmari mandacun.

Chaimanta paitaca cushicushpa

¡Alabaichij!

7Ovejapaj boda ña chayamushcamanta, paipaj huarmipish ña allichirishcamanta,

cushijlla cushicushpa, paitaca jatunyachishunchij.

8Paipaj huarmimanca linomanta rurashca lamyacuj churanatami churachun curca.

(Linomanta, rurashca churanaca Diospajlla cajcuna imatapish cashcata rurashpa causashcatami ricuchin)”.

Ovejapaj bodapi jatun micuimi

9Chai q'uipami angelca ñucataca: “Ovejapaj jatun micui bodaman cayashcacunaca, alli nishcacunami” chaita quillcai nirca. Cashnapishmi nirca: “Caicunaca, Dios rimashca mana llulla shimicunami” nircami.

10Chaimi ñucaca chai angelta adorangapaj cumurircani. Ashtahuanpish paica ñucataca: “¡Riqui, ama chashna ruraichu! Ñucapish can shinallataj, cambaj huauquicuna shinallataj Diospajta rurajllami cani. ¡Diosta adorai!” nircami. (Jesús ima shina cashcata huillanaca profetacunaman espíritu huillachishca pajtashcami).

Yuraj caballopi tiyacujmi

11Chai q'uipaca cielo pascashcatami ricurcani. Chaipica shuj yurajlla caballotami ricurcani. Chai caballopi tiyarishcaca imatapish cashcata ruraj, chaitataj pajtachij shutimi carca. Paica imatapish cashcatataj ricuchishpa macanacujmi.

12Paipaj ñahui luluncunapish lunyacuj nina shinami carca. Umapipish achca coronacunata churashca, pi mana yachashca pailla yachashca shutita quillcashcatapishmi charirca.

13Paica yahuarpi tinishca churanata churashcami carca. Paipaj Shutica: Diospaj Rimaimi carca.

14Paitaca cielopi caj soldadocunami yurajlla caballocunapi tiyarishca caticurcacuna. Paicunaca ashtahuan alli linomanta rurashca yurajlla, mana mapayashca churanata churashcacunami carca.

15Tucui llajtacunapi causajcunata chugrichingapajmi paipaj shimimantaca puntasapa espada llujshirca. Paimi tucuicunata fierro varahuan mandanga. Tucuita Rurai Tucuj Diospaj p'iñarishca vinota capingapajmi uvacunata capinapi chaquihuan sarunga.

16Paipaj churanapipish changapipish: “Jatun Mandajcunatapish, Jatun Mandajmi, Mandajcunapajpish Mandajmi” nishca shutita quillcashcami carca.

17Chai q'uipaca, inti jahuapi shuj ángel shayacujtami ricurcani. Paica huairapi purij angacunatami, sinchita caparishpa cashna nishpa cayarca: “¡Dios cushca jatun micuita micungapaj, tandanacumuichij!

18Jatun mandajcunapaj, soldadocunata mandajcunapaj, c'ari c'ari cajcunapaj, caballocunapaj, caballopi tiyarijcunapaj, amopajta rurajcunapaj, amopajta mana rurajcunapaj, uchillacunapaj, jatuncunapaj tucuicunapaj aichacunata micuj shamuichij” nircami.

19Yurajlla caballopi tiyarishcahuan, paipaj soldadocunahuanpish macanacungapajmi jatun animalpish, jatun mandajcunapish paicunapaj soldadocunata tandachishcata ricurcani.

20Jatun animaltapish, llullashpa huillajtapish prezumi japirca. Chai llullashpa huillajca jatun animalpaj ñaupajpi pi mana rurai tucuipaj mancharinacunata rurashpami jatun animalpaj sellota churachijcunatapish, chai animalman rijchajta rurashcata adorajcunatapish umashpa crichirca. Jatun animaltapish llullashpa huillajtapish causajtami ishquindijtataj azufrehuan rupacuj nina cuchapi shitarca.

21Caishujcunataca chai yurajlla caballopi tiyarishcami paipaj shimimanta llujshij espadahuan huañuchirca. Paicunapaj aichacunataca tucui angacunami sajsajta micurcacuna.