1 SAMUEL 15 - Quichua Chimborazo Bible

Saultaca Diosta mana cazujpi mandanamanta llujshichishcami

1Shuj punllami Samuelca, Saultaca:

–Mandaj Diosmi paipaj israelcunata jatun mandaj cachun cambaj umapi aceitehuan churachun ñucata cacharca. Cunanca Mandaj Dios rimashcata uyai.

2Tucuita Mandaj Diosca cashnami nin: Israelcuna Egiptomanta huichiyacujpi ñanta p'itishpa amalecitacuna jarcashcamantaca ñucami paicunataca llaquichigrini.

3Amalecitacunata huañuchishpa imalla charishcacunata tucui chingachigri. Paicunataca ama llaquishpa c'aricunatapish, huarmicunatapish, huahuacunatapish, chuchucuj huahuacunacama tucuita huañuchigri. Vacacunatapish, ovejacunatapish, camellocunatapish, burrocunatapish huañuchigri ninmi– nircami.

4Chaimi Saulca, Telaim puebloman israelcunata tandachishpa, chaipi cajcunata yupashpa ricujpica: Chaquillahuan rijcunaca 200.000 soldadocuna, Judá aillumantaca, 10.000 soldacuna tandanacushca carca.

5Saulca amalecitacunapaj puebloman shamushpaca, chai c'uchulla pugru pambapimi, pacalla chapajcunata churarca.

6Saulca ceneocunataca:

–Cancunaca tucui israelcuna Egiptomanta huichiyamucujpica, paicunataca llaquircanguichijmi. Chaimanta amalecitacunahuan tandalla cancunata ama huañuchingapaj paicunamanta ch'icanyashpa llujshishpa richij– nijpimi ceneocunaca, amalecitacunamanta ch'icanyashpa rircacuna.

7Saulca amalecitacunataca, Havila llajtamanta callarishpaca Egiptomanta inti llujshin ladoman caj Shur llajtacamami macanacushpa huañuchirca.

8Amalec llajtata jatun mandaj Agagtaca causajtami prezu aparca. Shujtajcunataca tucuicunatami espadahuan huañuchircacuna.

9Saulpish, paipaj soldadocunapish Agagtaca mana huañuchircacunachu. Ovejacunatapish, huagracunatapish, ashtahuan allicunataca mana huañuchircachu. Huirayashca animalcunatapish, carnerocunatapish tucui alli allitaca mana chingachishun nircachu. Ashtahuanpish imapish mana vali, yangacunallatami tucui chingachircacuna.

10Chai q'uipami Mandaj Diosca Samueltaca:

11–Jatun mandaj cachun Saulta churashcamantaca, yallitajmi llaquirini. Paica ñucamanta anchurishpamari, ñuca imalla mandashcatapish mana cazun– nijpimi, Samuelca jatunta llaquirishpa chai tutaca Mandaj Diostaca caparishpa mañarca.

12Samuelca tutamantaman Saulhuan tupangapajmi utca jatarishpa rirca. Chaipimi Samuelmanca: “Saulca Carmel pueblopimi, pai imalla rurashcata yuyarina shuj pircata rurarca. Chaimanta tigrashpaca Gilgalmanmi rirca” nishpa huillarcacuna.

13Samuelca, Saulpajmanmi shamurca. Chaimi Saulca:

–Cantaca Mandaj Dios alli nichun. Mandaj Dios mandashcataca ñami pajtachimuni– nirca.

14Ashtahuanpish Samuelca:

–Mandaj Diosta can cazushca cajpica ¿ima nishpataj ovejacuna, huagracuna, huacashca ñuca rinrinman uyaricun?– nircami.

15Chaipimi Saulca:

–Mandaj cambaj Diosman cushpa rupachingapajmari, ñuca soldadocunaca amaleccunapaj ashtahuan alli huagracunatapish, ovejacunatapish apamurcacuna. Ima shujtajcunataca tucuitamari chingachircanchij– nirca.

16Chaimi Samuelca Saultaca:

–Upalla cai. Mandaj Dios cunan tuta ñucaman imalla nishcata huillasha– nijpimi Saulca:

–Huillahuailla– nirca.

17Samuelca:

–Canca cambaj ricuillapitaj yangalla cashcatami yuyarcangui. Chashna cajpipish ¿manachu Israel aillucunata mandaj cachun churashca cangui? Mandaj Diosmi cantaca aceitehuan churashpa israelcunata jatun mandaj cachun churarca.

18Mandaj Diosca cantaca: Juchata ruraj amaleccunahuan macanacushpaca tucui paicunata tucuringacama chingachina yuyaihuan richunmi cantaca cacharca.

19¿Ima nishpataj Mandaj Dios mandashcataca mana cazurcangui? ¿Ima nishpataj chai millai runacunapajta japishpa apamushpa Mandaj Diospaj ñaupajpi millaita rurarcangui?– nircami.

20Ashtahuanpish Saulca Samuelmanca:

–¡Ñucaca, Mandaj Dios nishcacunataca cazurcanimi! Pai imapaj cachashca shina yuyaillahuantaj rishpami jatun mandaj Agagtapish prezu japishpa amaleccunatapish tucuicunata huañuchircani.

21Ñuca soldadocunallami chingachinapaj cashcacunamanta ashtahuan alli huagracunatapish, ovejacunatapish agllashpa apamurcacuna. Chaicunataca canta Mandaj Diosman cushpa, Gilgalpi huañuchingapajmi charicuncuna– nircami.

22Chaimi Samuelca:

–Mandaj Diosca paiman cushpa tucui rupachijpipish, sacrificiocunata cujpipish ¿pai nishcacunata cazushcamanta shinachu cushicunga?

Sacrificiota cunapaj randi, carneropaj huirata cushpa rupachicunapajlla randica, pai nishcata uyashpa cazunami ashtahuan alli.

23Paita c'ariyanaca adivinocunata tapushpa juchallishca shinallatajmi.

Paita mana cazunaca rurashcalla dioscunata adorashpa millaita rurashca shinallatajmi.

Canpish Mandaj Diospaj shimita yanganchishcamantaca, paipish cantaca yanganchishpami, jatun mandaj canamanta anchuchirca– nircami.

24Chaimi Saulca Samuelmanca:

–Juchallishcanimari. Mandaj Dios mandashcacunata, can imalla nishcacunatamari mana cazushcani. Ñuca soldadocunata manchashcamantami, paicuna rurashun nishcata rurachun saquircani. Cunanca ñuca juchallishcata perdonashpa,

25Mandaj Diosta adorangapaj ñucahuan tigrashpa jaculla– nircami.

26Ashtahuanpish Samuelca Saultaca:

–Canllataj Mandaj Dios imalla nishcacunata yanganchij cajpimi, Mandaj Diosca cantapish yanganchishpa israelcunata jatun mandaj canamantaca ña anchuchirca. Chaimanta canhuanca mana tigrashachu– nircami.

27Samuel ña ringapaj tigrarijpimi, Saulca Samuelpaj churana puntapi japijpi chai churanaca lliquirirca.

28Chaimi Samuelca, Saultaca:

–Cantapish Mandaj Diosca cunanllatajmi israelcunata mandaj canamanta p'itishpa cambaj llajtallamantataj caj shujtaj canta yalli alli runaman mandachun cun.

29Israelcunapaj tucuita rurai tucuj Diosca, chaitataj pajtachijmi. Pai imata nishcataca pajtachingatajmi. Paica mana runacuna shina yuyaita cambiajchu– nircami.

30Saulca:

–Ñucaca juchallishcanimari. Shina cajpipish, israelcunata cunaj yuyajcunapaj ñaupajpipish, tucui israelcunapaj ñaupajpipish jatun mandaj cashca shinallatataj ñucataca alli nishpa, canta Mandaj Diosta adorangapaj ñucahuan tigrashunlla– nircami.

31Chaimi Samuelca Saulhuan tigrajpi, Saulca Mandaj Diosta adorarca.

32Chai q'uipami Samuelca:

–Amaleccunata jatun mandaj Agagta caiman apamuichij– nirca.

Agagca Samuelpajman shamucushpaca: “Ñucataca ña mana huañuchinchu” nishpami cushicuihuan shamurca.

33Samuelca Agagtaca:

–Ima shinami canpish cambaj espadahuan mamacunataca huahuacuna illajta saquircangui. Chai shinallatajmi cambaj mamapish huarmicunapurapica huahua illajlla saquiringa– nishcahuanmi, Samuelca Gilgalpi Mandaj Diospaj ñaupajpi Agagtaca, mirga mirgapi p'itirca.

34Chai q'uipami Samuelca, Ramá puebloman tigrarca. Saulpish, Gabaapi caj paipaj huasimanmi huichiyarca.

35Samuelca Saulmanta achcata huacacushpapish chai punllamanta pacha tucui paipaj causaipi Saultaca manataj ricurcachu. Mandaj Diosca israelcunata jatun mandaj cachun Saulta churashcamantaca, achcatami llaquirirca.