MARCOS 3 - Quichua Chimborazo Bible

Chaquishca maquita alliyachishcami(Mt 12.9-14; Lc 6.6-11)

1Cutinmi Jesusca sinagogaman yaicurca. Chaipica, chaquishca maquiyuj shuj runami tiyarca.

2Chai samana punllapi chai runata alliyachijpi, juchachingapajmi Jesustaca chaparacurcacuna.

3Chaquishca maquiyuj runataca Jesusca:

–Jatari, caicunapaj chaupipi shayari– nircami.

4Jesusca chaipi cajcunataca:

–Samana punllapica: ¿Allita ruranachu, mana cashpaca mana allita ruranachu, huañuimanta quishpichinachu, mana cashpaca huañuchinachu, imata ruranataj samana punllapica alli canga?– nishpa tapujpi paicunaca mana rimarcacunachu.

5Chaimi Jesusca p'iñarishpa paicunapaj ñahuita ricurashpa paicunapaj shungu rumi shina cajpi llaquirishpa chai ungushca runataca:

–Cambaj maquita chutai– nijpi, pai chutajpica chai maquica alliyarcalla.

6Chaimanta fariseocuna llujshishpaca, Herodespura caj maijancunahuan tandanacushpami, Jesusta ima shina chingachinata yuyarircacuna.

Achcacunami cucha uripi cashca

7Jesús chaimanta paipaj yachacujcunandij cucha uriman rijpica, Galileamanta achcacunami catircacuna. Judeamantapish,

8Jerusalenmantapish, Idumeamantapish, Jordán yacu ch'imbanijmantapish, Tiro, Sidón muyundijcunamantapishmi catircacuna. Jesusca achca allicunata ruracun nijta uyashpami yallitaj achcacuna paipajman shamurcacuna.

9Chaimi Jesusca paipaj yachacujcunataca, chai tucuicuna jundamushpa paita ama llapichun, shuj barcotaca rinallata charichun nirca.

10Achca ungushcacunata Jesús alliyachishcamantami, tucui laya yallitaj millai unguihuan cajcunapish alliyashca cashun nishpa Jesuspi tuparingapaj c'uchuyacurcacuna.

11Millai espiritucuna japishcacunapish Jesusta ricushpaca, paipaj ñaupajpi cungurishpa cumurishpaca:

–¡Canca Taita Diospaj Churimi cangui!– nishpami caparircacuna.

12Ashtahuanpish Jesusca, pi cashcata paicuna ama yachaj chayachichunmi sinchita rimashpa jarcarca.

Chunga ishqui apostolcunata Jesús agllashcami(Mt 10.1-4; Lc 6.12-16)

13Chai q'uipami Jesusca urcuman huichiyashpa, paita catijcunataca pai cayasha nishcacunallata cayajpi paipajman c'uchuyarcacuna.

14Chaicunataca chunga ishquicunatami paihuan cachun, paimanta huillanaman cachangapaj,

15ungushcacunata alliyachij canata cungapaj, supaicunata llujshichi tucuipaj canata cungapaj cayarca.

16Paicunaca caicunami: Shujca Pedro shutita Jesús shutichishca Simón,

17Zebedeopaj churi Jacobo, Jacobopaj huauqui Juanpishmi carca. Paicunatami Jesusca Boanerges nishpa shutichirca. Chaica “C'ulun nijpaj churicuna” nisha ninmi.

18Shinallataj Andrés, Felipe, Bartolomé, Mateo, Tomás, Alfeopaj churi Jacobo, Tadeo, llajtapi quiquin mandajta charingapaj macanacujpuramanta Simonpish,

19Jesusta huañuchichun japichij Judas Iscariotepishmi carca.

Jucha illaj Espirituta p'iñashpa c'amishcami(Mt 12.22-32; Lc 11.14-23; 12.10)

Chaimantaca huasiman tigrajpimi,

20cutinllataj yallitaj achcacuna tandanacumujpi, micungapajllapish mana pajtarircacuna.

21“Jesustaca yuyai illaj tucushpami puricun” nijta paipaj familiacuna uyashpami japishpa pushangapaj shamurcacuna.

22Mandashcacunata quillcajcuna Jerusalenmanta shamushpaca: “Caica Beelzebuhuanmari. Paica supaicunata mandajhuan cashpami, supaicunataca llujshichin” nircacunami.

23Chaimi paicunata cayashpaca, yuyachij parlocunahuan cashna rimarca:

–¿Maitataj Satanasca, Satanasllatatajca llujshichingari?

24Maijan llajtapi mandajcunapurallataj p'iñanacushpa chaupirijpica, paicuna mandacushcaca chingarinmanllami.

25Shuj huasipi causajcunapish quiquinpurallataj p'iñanacushpa chaupirinacujpica, chai huasi familiaca chingarinmanllami.

26Chai shinallatajmari Satanaspurallataj p'iñanacushpa chaupirinacujpica, pai mandacushcaca ña chingarinman.

27Maijanpish c'ari c'ari runapaj huasiman yaicushpa imalla charishcacunata shuhuasha nishpaca, paita manaraj huatashpaca imata mana shuhuai tucunmanchu.

28Gentecunataca ima juchacunatapish, p'iñashpa c'amishcacunatapish perdonangami. Chashnatajmi canga.

29Ashtahuanpish jucha illaj Espirituta p'iñashpa c'amijcunataca manataj perdonangachu. Huiñaipaj jatun llaquiman rinapajtajmi– nircami.

30“Millai espiritutamari charin” nishcamantami Jesusca paicunataca chashna nirca.

Jesuspaj mamapish huauquicunapish(Mt 12.46-50; Lc 8.19-21)

31Chashna yachachicujpimi Jesuspaj huauquicunapish paipaj mamapish chayamushpaca, mana yaicushpa canllamanta cayaj cacharca.

32Chaimi Jesuspaj muyundijpi tiyacujcunaca:

–Cambaj mamapish, huauquicunapish canllapimari canta mashcacuncuna– nircacuna.

33Chaimi Jesusca:

–¿Pitaj ñuca mama, pitaj ñuca huauquicunaca?– nirca.

34Shina nishpaca paipaj muyundijpi tiyacujcunata ricuchishpami cashna nirca:

–Caicunami ñuca mama, ñuca huauquicuna.

35Taita Dios munashcata maijanpish cazujcunami ñuca huauqui, ñuca pani, ñuca mamaca– nircami.